Sit de coltura e attualità
 in lengua milanesa		 Invia i tuoi messaggi a:
info@elmilanes.com		 *











Sesta part, de Milan come l’è nassuu?
second el nòno Berto

 Invasion barbarich.
Milan a chi temp lì l’era tròppa bèlla e tròppa sciora tròpp danee e i Visigoti hann pensaa ben de dagh ona spazzetada nel 401 hann passaa i alp e nel 402 gh’hann daa el duu de picch i hann lassaa in mudanda. L’è andada mej nel 408 cont i Visigoti de l’ Alerico, per merit del Stilicone ma mòrt el Stilicone nel 410 , alter repulisti gh’hann lassaa domà i oeugg per caragnà. Poeu l’è rivaa l’Attila 452 altra batòsta la buttaa giò i monument roman - Se ved che la trovaa minga tanti danee e el s’è incazzaa- L’è minga finida lì e dedree de lor; vun el và l’alter el vegn on gibilee de la malora. Cala in la vall Padana vers el 488 indovinii chi - Gli Ostrogoti - Vialter disii saran staa on desmila, vintmila, trentamila, NO! car i mè sciori eren la bellèzza de centmila sti Tognitt de la Ucraina. I comandava el re Teodorico, nominaa 4 ann prima da Zenone imperador d’occident. Riassunt in centann in passa per Milan: Alemanni Burgundi, Franchi, i Vandali. Svevi, Unni e per finì i Goti. Regno Ostrogoto 493-551 Nel 493 el magister militum Tufa general de l’ Odoacre che el comandava a Milan el consegna la città al Teodorico. L’Odoacre el se incazza come ona bèstia el ciama i Burgundi sò amis e metten l’assedi a Milan, i Burgundi, che ona vòlta conquistaa, saccheggen per pròppi cont e minga content porten via on poo de milanes insci come suvenir. El Teodorico ghe la fa nò passà liscia a l’Odoacre e a Ravenna dòpo on assedi de trii ann el coppa l’Odoacre. E Ravenna la diventa la capital del regno Ostrogoto. Milan con Pavia e Verona resten di città men important. Sto règn chi di Ostrogoti el gh’ha minga tròppa fortuna. Nel 535 l’imperador de Bisanzio el Giustiniano el manda el general Belisario a combatt i Ostrogoti. Nel 538 i milanes de provegnenza latina hann pensaa che l’era el moment bon per ribellass ai Tognitt: e convint dal vescov Dazio hann casciaa via a pesciad in del cuu i Ostrogoti e Belisario l’entra a Milan da padron. Il re di Goti Vitige -on permalos de la madòcina - el manda Uraia sò nevod con Ostrogoti e Burgundi nel 539 a fagh on paltorèll ... giò cà giò ges coppen pussee milanes che poden per Milan ona vera tragedia e poeu sèmm resta foeura dal gioeugh politich per tant temp. Intant la guerra Gotica - Bizantina l’andava avanti con coppament de generai e re fina al 551 con la mòrt in combattiment del re Baduila detto Totila l’è finida el domini di Ostrogoti. El general bizantin Narsete el voeureva restaurà Milan ma l’è staa casciaa via dal Giustiniano nel 565.
S’ciao a la pròssima

E                              Storia de Milan                          F