Sit de coltura e attualità
 in lengua milanesa		 Invia i tuoi messaggi a:
info@elmilanes.com		 *




Terza part, de Milan come l’è nassuu?
second el nòno Berto

El commercio el tirava ben e i Milanes faseven sù on mucc de danee e pian pian s’hinn romanizzaa: via i bragh su la tòga. Anca se i roman rumpeven anmò i marroni, i milanes gh’hann avuu el bon sens de restà foeura dai guerr social (i sòci di roman pretendeven i stess diritti e donca s’hinn daa bòtt de la madòcina). Dòpo che s’hinn piccaa per ben, i roman hann faa la pas, gh’hann daa la leg ai veneti (la lex julia) in del 90 a.c. E la (lex plautia papiria) 89 a.c. E per ultim come semper a nun grazie a la legge (lex pompeia de traspadanis). Proposta da P. Strambone che el gh’ha da la (ius Latii minus) perchè nun milanes emm minga tradii i roman.
Gh’è passaa pussee de quarant ann e finalment sòtta Caio Giuli Ceser per via ch’el doveva dagh el duu de picch ai Galli Transalpin. L’ha faa de Milan on “Castrum” (ona città fortificada) de 50 ettari de forma de on quadraa tutt stòrt 700 meter per lato (on sit che se pò anmò vedè el se troeuva in via Disciplini, in sul canton con la via Cornaggia ch’el passa arent la città repubblicana.) El fòro el se trovava sòtta la Bibliotecca Ambrosiana de adess, in piazza San Sepolcher; chì se incrosaven el Cardus Maximus (SO-NE arent la via Nerino - S. Margherita) e el Decumano Maximus (NO-SE arent la via S. Maria a la Pòrta vers el Cors de porta Romana.
Quand Ceser l’haa conquistaa la Gallia el gh’ha daa el duu de picch anca al Pompeo. E infin el gh’ha faa ciappà la cittadinanza de Municipium civium romanorum anca a nun con la Lex Roscia (49.a.c.) e Mediolanum l’è staa iscritt a la tribus Oufentina. Inscì Milan l’ha faa pù part de la occupazion militar e finalment l’è diventada ona città autònoma.
Cinch ann dòpo ona cricca de senatur in del nòmm de la libertà gh’hann faa la pell al Giuli Ceser, inscì el sò nevod Ottavi l’è diventaa Imperadur senza stà lì a cinquantalla sù.
Pian pian senza dì nagòtta el s’è slargaa foeura, l’è diventaa ona città bella granda che in del 42 l’imperador Ottavian l’ha miss insèma a l’Italia con tutta la region Transpadana e in del 14 a.C. l’è staau promòss città principal de la XI region de l’Italia.
Milan intant el creseva de importanza tanto che in del 48 d.C. l’Imperador Claudi l’ha conceduu la cittadinanza romana a tutta la Gallia Transpadana e Milan el gh’ha avuu el titol “onorific” de colònia Imperial. E Milan el cresseva d’importanza coltural tanto che fina el Virgili l’è vegnuu chì a studià e el Catullo l’ha bandonaa la poesia celebrativa per quella lirica.
S’ciao a la pròssima

E                              Storia de Milan                          F