Sit de coltura e attualità
 in lengua milanesa		 Invia i tuoi messaggi a:
info@elmilanes.com		 *












Decima part, de Milan come l’è nassuu?
second el nòno Berto

1152 - 1186 - FEDERICO I° DETTO EL BARBAROSSA
LEGA LOMBARDA BATTAGLIA DI LEGNANO

Federico I° l’è diventaa imperador in del 1152 e l’ha pensaa ben de vegnì in Lombardia a fà ona visitina ai milanes (1154), e de domandà cunt di sò azion vers i alter città lombard ch’eren andaa de lù a caragnà.
I milanes credeven de falla franca, de cuntà sù al Federico ona quai balla e dagh sòtt man on poo de danee e on quai regal de valor. Ma el Federico el ghe sentiva nò da quella oreggia lì, l’ha convocaa la prima dietta de Roncaglia, con tanti dottor de leg vegnuu appòsta de Bològna. Poeu el Federico ghe l’ha cantada sù ciara e netta: Milanes fasii nò i prepotent cont i alter città lombard , i tass che cattii sù hinn mè, minga vòster, se de nò ve foo fà la fin de Tortòna (april 1155).
I milanes hann cominciaa a fagh vedè i danee al Federico ma lù, vist che cont i bon capiven nò, el 6 de agost del 1158 l’ha assediaa Milan ch’el s’è arrenduu el 7 de settembre. El Federico intanta el s’è faa incoronà rè d’Italia a Monza, poeu l’è andaa a Ròma dal Papa a fass incoronà imperador.
Con la seconda dietta de Roncaglia i consol e el vescov hinn andaa a rend omagg al Federico. Dòpo on poo i milanes hinn minga staa ai patt e Federico el s’è incazzaa! L’ha pòst Milan al bando da l’impero - l’era el 1159. L’ha condanaa al sacchegg e a la schiavitù. L’ha miss l’assedi in del 1162. L’ha ciappaa per famm e per i division tra i Meneghin (pret contra mercant) e, per finì, el Giordan Scaccabaròzz el tifava per Federico.
La distruzion de la città l’è stada vorsuda dai cremones, novares, comasch, paves, sepries , martesanes e, infin, dai lodigian, i pussee incazzaa. El Federico el voreva nò la distruziòn de la città, ghe bastava 400 milanes in ostagg, ma i alter città eren inscì incazzaa che voreven sentì nò reson. Brusaa el caròccio tutt i bander hinn diventaa strasc de pé. I milanes
hinn staa confinaa in quatter borgh: Nosedo, Vigentin, Carraria (Lambraa), San Sir alla Vepra. Insòma semm andaa per ortigh per on poo de temp. Sto purgatòri l’è duraa circa 5 ann. Intanta ch’el Federico l’era in Germania per i sò affari che andaven nò per el vers giust, quatter città venet hann fondaa la lega Verones, formada da: Veròna, Vicenza, Trevis, Padova, cont el concors esterno de Venezia, e de l’imperador de orient e per finì dal Papa Alessandro III°. Dòpo trii ann s’hinn taccaa alter città: Bergom, Cremòna, Mantova, e Lòd ( costretta pussee che invitada) e inscì l’è nassuda la Lega Lombarda. El primm penser de la Lega, l’è stada la ricostruzion de Milan, (giurament de Pontida e benedizion de l’arcivescov Galdin, - 1166 -1176-, poeu faa Sant) e Milan l’è entraa a fà part de la Lega. Hann faa sù de noeuv i bastion, hann slargaa i fòss de difesa, rifaa i torr, insòma tutta la città in d’on boff l’è diventada pussee granda e bella de prima. Al Federico gh’è rivaa a l’oreggia tutt sto frecass; inscì, on poo per vedè se l’era vera sta Lega pian pianòtt, in del 1174, el ven giò cont on esercit minga tròpp fòrt; el se n’è incorgiuu a l’assedi di Alessandria, che l’è minga staa bon a ciappalla.
L’ha ciamaa alter soldaa da la Baviera che hinn minga rivaa. Intanta l’ha cercaa de mettes d’accòrd con la Lega, cicciara cicciara, a la fin, s’è faa on bell nagòtta. Con la ripresa de la guerra, el 29 de magg del 1176, el Federico, pian pianòtt, l’era adree a andà incontra al Marches de Monferraa, quand, (el vegneva de Còmm), a Legnan, i avanguardi se incontren, e subit se dann bòtt de la Madòcina. Quei de la Lega eren adrea a ciappai, ma i rinforz hinn rivaa subit (brescian, verones e tutta la battera de riserva). Intanta intorna al carròccio, la battalia l’era pussee dura e la Compagnia de la mòrt la se batteva come mìla leoni (su l’Alberto de Giussan gh’hinn nò font stòrich, me dispias), el Federico el borla giò de cavall, l’è ferii, i sò el creden mòrt e de volada vann visin a Pavia, città imperial. La tregua l’è stada firmada a Venezia in del 1177.
In del 1183, con la pas de Costanza, el Federico el riconoss ai comun ona larga autonomia, ma semper con la soa benedizion.
In del 1186, per el matrimòni del sò fioeu Enrico con la Costanza d’Altavilla, i milanes gh’hann riservaa on accoglienza trionfal, fest a pù no pòss, on gibilé de la madòcina e alter cent leccad de c.. L’è pròppi vera: semm minga bon de tegnì rancor, semm bon come gadan.
El Federico I° l’è partii per la crosada, el gh’ha lassaa el pellòtt.
E s’ciao!

                      E                              Storia de Milan