Sit de coltura e attualità in lengua milanesa

Invia i tuoi messaggi a: info@elmilanes.com

Milan come l’è nassuu? second el nòno Berto La tradizion, che gh’ha contaa Tito Livio, l’è dovuta a ona migrazion di Galli Bituringi, nel stèss temp del Tarquinio Prisco (segond tutti i stòrich del mond el primm rè de Ròma, i quatter prima de lù par che sien dovuu a la fantasia del pòpol). Allora stì Gallich Bituringi, eren tròpp prolifich, se daven de fà come conili, la popolazion l’era cressuda de matt, saveven pù che sant pregà in quant i giovin taccaven lit tra de lor. El rè de i Gallich, el ciappa i sò duu nevod ( Belloveso e Segoveso ) e i a manda vun de chì, l’alter de là, el Segoveso in la Selva Ericina (l’odierna Germania meridional), menter el Belloveso chì in la val Padana. Quei ch’eren gemò chì i Gallich Insubri (sò cusin bon come di gadan), i Liguri che eren i pussee vègg del pòst insèma a i Golasècca, i Etrusch (commerciant de tèsta fina, faseven affari con tucc quei che ghe capitaven sòtta a i ong), davanti a stà gent chì hann faa finta de nient e quèsta abitudin purtròpp l’è continuada fin al dì d’incoeu. Se pò nò capì come mai stì Gallich s’hinn fermaa chì, on territori tutt piatt, pien d’acqua minga tròppa bòna per cavai e vacch (l’è bon però per i rann) e, menter intorna gh’era trii fiumm el Tesin el Pò e l’Adda, a nòrd de bei collin pussee vivibil e difendibil. La scèlta l’è stada fada cont ona gran fèsta religiosa, da i sacerdòtt Celtich i Druidi. Gh’hann daa el nòmm de Mediolanum (che voeur dì el pòst de mèzz), se vardi ben i cart geografich el center passa prèssa pòcch visin a la Scala i diagonali del quadraa, Tesin e Adda che vegen foeura dal Lagh Maggior e dal Lagh de Còmm prima de sbattes nel Pò. Per dilla giusta l’era minga ona città l’era pussee on borgh, on insèma de capann de lègn, in quant la tèrra succia l’era minga poeu tanta, se andi al Carròbi in fond de via Turin e vardì vers el Dòmm vedarii la via Soncin e la via Stampa ch’hinn anmò in discèsa, a proposit de Milan ghe n’eren on cinch o ses in tutta Euròpa a chì temp lì. Per adèss el nòno Berto el finiss de cinquantalla sù. S’ciao....