Sit de coltura e attualità
in lengua milanesa		 Invia i tuoi messaggi a:
info@elmilanes.com






Analis del sistema bancari italian del Massimo Intropido

El sistema bancari italian l’è staa, dai ann 30 ai ann 80 dominaa da ona matris unica de tipopubblich-garantista. Pubblich perché de fatt l’era el Stato a vègh el contròll di pussee important banch nazionai, garantista perché in cambi de sto contròll el Stato l’intervegniva quasi semper a salvà i dissèst ò i problemi che chì a là se verificaven.
In tutti stì ann el marketing bancari l’è staa pressoché inesistent, la part primaria di banch l’era quèlla de cattà sù danee e conced prèstit.
I cont corrent vegniven minga dervii a tucc quei che ne faseven domanda, ma domà a quei che daven di garanzii per emètt assègn.
Per tutti i alter gh’era el librètt de risparmi ò de depòsit, quanti n’èmm rovaa in di cassettoni di nòster nònni. La banca la gh’aveva nissuna necessità de acquisì client, ma al contrari de casciann via on quaivun.
Cont i ann 80 i ròbb cambien, la società italiana, ona vòlta risòlta la crisi d’identità (liberista,ò cattolica ò socialista ò cattocomunista, boh??) la ciappa di modei anglosasson e la se derva ai idei de marketing, efficienza, budget, just-in-time, leasing, franchising e alter.
La banca, grazie a l’informatizzazion (ma semper pussee lenta rispètt a alter settor), la ved el pròppi personal men pressaa da el laorà contabil e pussee utilizzabil per acquisì client e affari.
La borsa, mercaa ancamò gridaa e donca dominaa da i agent de cambi, l’è pù el règn di addètt ai laô, ma la comincia ad attirà almen i investidor pussee sofisticaa.
Comincia a balenà qualche idea de marketing, ma gh’è nanmò on ver e propri personal addètt a la vendita.
Tròpp important hinn anmò i figur poeu sparii come el riscontrista (quèll ch’el predisponeva la contabilità necessaria per i operazion bancari) e el casser specializzaa.
El livèll qualitativ del personal l’è elevaa, ma specialistich, tuttavia pròppi in stì ann la professionalità in di banch la riva al top.
I ann 90 se poden definì i ann da bev de la finanza, l’informattizzazion la se complètta e la lassa del temp ai impiegaa da dedicà ai client.
Sparissen figur purament esecutiv come el gemò vist riscontrista, se assist a on vera e pròppi boom de noeuv agenzii e de filiai, poiché se comincia a prend coscienza che se dà on servizzi e vun di princippi d’on servizzi l’è senz’alter quèll de la comodità. I agent de cambi fann on error ch’el porterà a la scompasa de la categoria, accetten el passagg al mercaa telematich in nòmm d’ona modernità utopistica (tanti mercaa important hinn ancamò vosaa in gir per el mond) e consenten ai banch de ciappà el sò pòst. El nass in Germania e se diffond anca chì de numm el modèll de la Banca Universal, ossia l’azienda finanziaria che la dà tucc i servizzi finanziari possibil e immaginabil. Se introduss in la gestion del personal on concètt estrèmm de flessibilità (tutti gh’hann de vèss bon de fa tusscòss) che l’è incompatibil cont el gran profil professional che ghe voeur per laorà in de l’ambit finanziari.
Quand l’Italia l’è andada denter in la Comunità Economica Europea gemò fin da l’inizzi l’ha comportaa ona crescita di mercaa azionari e ona diminuzion di rendiment di titol de Stato che porterann tanti risparmiador a tentà l’avventura in borsa.
E el terren l’è fertil per l’esplosion de la promozion finanziaria.
Te see quanti gener de commisson cont el tò laorà, l’è la domanda con la quale se acquisissen potenziai promotor. Tanti ciappen la valisètta e se butten in l’avventura, senza tegnì cont di cicli di mercaa finanziari.
In Italia crèss el risparmi gestii, anca se i primm fond comun d’investiment hinn per lo pù obbligazionari, el succèss di promotor, l’alta redditività del risparmi gestii e l’abbassament di margin in la gestion di danee ruzzen i banch a la definitiva svòlta commercial: la banca l’è pù l’azienda di danee, ma la diventa on supermercaa di prodott finanziari.
La vegnuda de Internet el permètt de dà a la lus anca el Trading On Line, per tirass via di scatol e dal borsin i client che voeuren specolà direttament sora i titol.
El borsinista dev vèss on venditor, minga on consulent de borsa.
Nassen conteporaneament el trader professionista, ossia quèll che fa danee da cà soa con tant de campionaa nazional e el scalper, quèll che semper da cà soa el sfrutta i piccol variazion di prèzzi per guadagnà pòcch e de spèss.
Senza fondament: la professionalità la crèss spontanea in del pubblich e la cala in banca, là in doe la dovaria vèss tanta.
La cala perché di 10 or de formazion, 8 hinn dedicaa al marketing e domà 2 a la conoscenza di mercaa e di sò regol.
I banch in del frattemp hinn privatizzaa e comincen pertant a fondes insèma, perché se gh’è minga el Stato che de dà solidità, te la cerchet in del mòtt l’union fa la fòrza.
El diminuiss drasticament la differenziazion di prodott che l’era stada tanto gradida dal pubblich in la prima metà di ann 90.
Oramai tutt i banch che se ristrutturen vann di sèss società de consulenza: logich che poeu modei e prodott sien i medesim.
El sbom del 2000-2002 e i ultim scandol finanziari mètten in evidenza el falliment generalizzaa d’on modèll de marketing finanziari e derven la crisi de fiducia pussee grave de tucc i temp di risparmiador in Italia.
Tratto da “Aspetti pratici della propensione alla consulenza”, Investimenti Finanziari, n. 2 2004, per gentile concessione.

  (1 - l’è minga finida) F