Sit de coltura e attualità
 al cent per cent in lengua milanesa		 Invia i tuoi messaggi a:
info@elmilanes.com

PREGHIERA DE PASQUA del Renato Colombo

Stanòtt, nel veder de la finestra hoo vist on riflèss, foeura gh’era scur la nòtt l’era nera, se vedeva nient gh’era on ciccin de scighera, ma mì seri curios vorevi vedè l’instèss.

Me sembrava on vis on bèll vis, gh’aveva i man giont el me guardava, me pareva de conossel el pregava, seri estasiaa come se fùssi sta in paradis.

L’era biond con la barba longa e i oeugg celèst, gh’aveva ona corona de spin in sul coo, me sorrideva, son restaa interdètt per on poo, finalment hoo capii on miracol l’era quèst.

Seri lì a tù per tù col Signor Crocefìss, me contava che l’è sta tradii, piccaa, sbeffeggiaa, l’è stà persin torturaa ma l’haa no ottegnuu quèll che sera prefìss.

Per tutta l’umanità el s’è faa mett in cros, ma l’è staa tutt inutil, gh’haa de vegnì ancamò perchè sta razza umana la ghe va pròppi nò, allora el voeur fà sentì an’mò la sua vos.

Gh’è a stò mond tròppa gent sorda, nissun ch’el mètt in pratica el Vangel, allora el voeur vegnì giò cont i sò Angiol per mètt ordin a stà tèrra tròpp ingorda.

Ad on tratt l’hoo vist pù che me sia sognaa hoo guardaa ben ben, seri indepermì e nel veder de la finestra l’era pù lì on dubbi da quèll moment m’haa tormentaa.

Poeu hoo capii finalment còssa l’era succèss, l’era el Venerdì de Pasqua, Venerdì Sant, el mè coeur che de fed l’è pien pròppi tant, m’era sembraa de vedè el Signor in quel riflèss.

Ma mì speri de vessèss minga insognaa, chè l’era pròppi el Messia pròppi Lù, che serom in quèlla sera verament in duu, ch’el vegna ghe nèmm de bisògn in tutt’i cà.

Ghe n’èmm talment de bisògna per stò nòster mond inscì martoriaa, che da allora foo minga alter che pregà e speri che ancamò mì el sògna.

Te preghi ò Signor Benedètt torna sù stà nòstra tèrra, sù sto mond, che par a mì l’haa toccaa el fond ven me raccomandi, famm nò sto dispètt.


ARTICOL