al cent per cent in lengua milanesa
info@elmilanes.com
|
|
|
Sit de coltura e attualità al cent per cent in lengua milanesa |
Invia i tuoi messaggi a: info@elmilanes.com |
 |
Pasqua e i sò tradizion
del Stefano Sportelli La celebrazion de la Pasqua, dal latin e da l’ebraich Pesah, l’è la massima festività de la liturgia cristiana, doe el ven rappresentaa el mister de la Resurrezion de Gesù Crist. Fin da quand el Cristianesim l’ha cominciaa a fa i sò proseliti e la religion l’incominciava a espandes in tutt el mond allora conossuu, la Resurrezion del Crist la vegniva ricordada la domènega con cadenza de sètt dì. S’hinn formaa ai temp dò corrent de penser: voeuna ciamada PAOLINA-GIOVANNEA, che la voreva celebrà l’event esattament el dì in cui l’era succèss, in qualsiasi dì de la settimana saria capitaa, e se saria festeggiaa el stèss dì sia la mòrt che la Resurrezion de Gesù. La seconda corrent ciamada PETRINA, invece che la voreva festeggià la domènega successiva al dì de l’anniversari. In nassuu inscì, nel mond cristian, di grand controvèrsi, che s’hinn risòlt domà cont el consili de Nicea (325) doe s’è deciduu che la Pasqua la doveva vèss celebrada da tutta la cristianità in del stèss dì. El compit de stabilì, ògni ann, sto dì l’è staa affidaa a la Gesa de Alessandria, ma successivament, in del 525, la Pasqua l’è stada fissada tra el 22 marz e el 25 april. Incoeu, la data la se calcola con rigor scientifich, se basom su l’equinòzzi de primavera e la luna pièna. In di ges ortodòss la Pasqua la coincid nò con quèlla de la Gesa Cattolica perché lor utilizzen on calendari divers da quèll Gregorian. La Pasqua ebraica Ai so origin la Pasqua l’era ona fèsta pastoral, praticada da i popolazion nòmadi del Visin Orient, doe vegniven offert i primizzi di ròsc. Poeu in seguit a ona maggior sedentarietà di gent semitich, la saria diventada anca fèsta agricola e, se offriven i primizzi de la mietidura de l’òrz, con la cottura del pan AZZIMO. Stì dò fèst, con Mosè hann ciappaa on noeuv significaa, hinn diventaa el moment per ricordà la liberazion del pòpol ebraich da l’Egitt. Mosè l’aveva ordinaa al pòpol, prima de abbandonà l’Egitt, che ògni familia la sacrificass on piccol animal (agnèll, pegora, cavra) senza nissun difètt, de circa on ann d’età e che se bagnass cont el sang i stipit e i pòrt di pròppi cà. I cap familia doveven consumà el past in pee cont el baston tra i man, pront per partì, partenza che la saria avvenuda la nòtt stèssa dòpo che l’Angiol del Signor el saria passa per mazzà i primmgènit di egizian, l’avaria risparmiaa i primmgènit di ebrei el segnal di cà ebrei l’era el sang sora pòrt e finester. I egizian hann faa pression per fai partì a svelt, i ebrei hann dovuu portà la pasta per el pan che l’era nonanmò lievitada, ossia el pan azzimo. Inscì come el Signor la vegliaa tutta la nòtt per salvà el sò pòpol, quèst el vegliarà in la nòtt de Pasqua. La Pasqua cristiana La Pasqua cristiana, come la ven festeggiada in Italia, l’è preceduda da on period de penitenza. Sto period ciamaa QUARESIMA el dura quaranta dì, el và dal mercoldì di CENERI (scender) che l’è el dì in cui el sacerdòtt el mètt sora el coo di fedei la scendra in ricòrd de la scendra de l’uliv benedètt brusaa, al Sabet Sant (el sabet prima de Pasqua) in sto period bisògna seguì on certo digiun soratutt al venerdì. In di ultim dì prima de la domènega de Pasqua, in Italia, come in di alter paes cattòlich se tegnen diversi riti che rievochen la Passion de Crist. In st’occasion, se tegnen tantissim cerimòni folcloristich doe se rappresenten di episòdi de la Passion, se benedissen i cà, se mangia l’agnèll pasqual se dann via i oeuv e se fann di dolz a forma de colomba. La tradizion de regalà i oeuv l’è ligada al fatto che la Pasqua la coincid con l’inizzi de la primavera, che anticament l’era celebrada cont i riti per la fecondità e el rinnovament de la natura. L’oeuv el simboleggia, defatt, la vita che la se rinnova. Dòpo la longa preparazion de la Quaresima, i riti pasquai raggiungen el massim al Venerdì Sant. Con la Pasqua la comunità di fedei la viv on dì de lutt universal, anca se different hinn i formi de partecipazion popolar. In tantissim region italian, a l’alba del Venerdì Sant, i dònn vann in gesa e a genoeugg biòtt sora el paviment, reciten ona brev preghiera. Tantissim preghier del dì d’incoeu hinn antichissim. Oltre a la preghiera, la riproduzion di event che hann compagnaa la mòrt e la resurrezion de Crist hinn la manera pussee dirètta che la gent la gh’ha per partecipà al dolor de la perdita de Gesù. 
 |