Sit de coltura e attualità
 in lengua milanesa		 Invia i tuoi messaggi a:
info@elmilanes.com		 *









Ingredient per vòtt persònn.
Trii etti de farina bianca.
On etto de butter.
Quatter cuggiaa
de zuccher semolaa.
Vòtt oeuv .
On liter de latt e d’acqua.
On cuggiaa de bicarbonaa.
Rusca de limon.
Saa.
Zuccher a vel.
Cannèlla.
Dò bustin de vanillina.
Rumm.
Òli per frigg.
Tortei de carnevaa a la milanesa
 del Renato Colombo, Ann 2005

 Mescia sù el zuccher semolaa con la vanillina. Metti in d’ona cazziroeula, versegh el latt e l’acqua e giuntegh el butter, pòcca rusca de limon, on tocchellin de cannèlla, ona presa de saa e el bicarbonaa.

Mètt la cazziroeula sora el foeugh e falla buì.

Tira giò dal fornèll, tra via la rusca de limon e la cannèlla, giontegh la farina bianca tutta insèma e poeu, intanta che te messedet in continuazion cont on cuggiaa de legn, mètt ancamò el pignattin sora el fornèll.

Fa coeus per on des minutt (messeda semper senza desmètt) fin quand l’impast el se destacca minga dal pignattin el compòst el gh’ha vèss stagn e sòlid.

A sto pont smòrza el foeugh e lassa intevedi on ciccinin, allora fa amalgamà, vun per vòlta, i oeuv intregh prima de metten on alter te ghe de fa incorporà ben ben quèll prima.

Versa on quai gottin de rumm, lassa requià per on para d’or l’impast quattaa cont on foeuj de carta oleada. Fa scaldà abbondant òli in d’ona pignatta adatta a frigg (se la gh’ha el cestèll l’è mej), cont on cuggiaa ciappa on ciccin de pasta (come ona nos) e con l’aiutt de on alter cuggiaa, pocciel in de l’òli.

Quand i tortei hinn sgonfi e doraa, fai gottà tirando sù el cestèll e pòggi sora on foeuj de cartasuga. I tortei giamò pront tegni ben al cald fina a chè t’hee finii.

Poeu mètti a forma de piramid dessora on tond puttòst gròss, dagh ona spolverada de zuccher e vel e servizzi bei cald.

Come vin mì consili:
l’Albana de Romagna, Reciotto de la Valpolicèlla, Moscato spumante, Malvasia de Candia.