Sit de coltura e attualità in lengua milanesa

Invia i tuoi messaggi a: info@elmilanes.com

---

I NÒTT DEL POÈTTA I nòtt del poètta hinn infinii, menter i alter dormen lù l’è sveli, di penser del mond s’è impadronii, l’è come s’el fuss su ai sètt cieli, lontan dal baccan de la città, per podè con calma ‘ndà pensà. Da la finèstra el guarda giò, cà senza praa e brutt capannon, e in fond a la strada el rondò, come fà la ment vègh invenzion, anca el ciel l’è nègher tutt scur, par de piccà contra on gran mur. Poeu in ciel gh’è ona sciarida, la bianca luna la fà capolin, tra i nivol la fà ona sortida, in del coo ghe se pizza el lumin, sul foeuj comincia a spegascià, paròll che vegnen tutt d’on fiaa. Cont i oeugg l’accarèzza la luna, che par la dondola sù, tra i stèll, ma del poètta l’è la fortuna, ghe nient al mond de pussee bèll, l’è lee, che ghe dà l’ispirazion, ghe fà batt el coeur da l’emozion. El pensa, el scriv con la soa musa, quèll che i alter poden nò vedè, ma poeu par che ghe domanda scusa, la luna saveva el perchè, le saveva, ma gh’aveva pudor, l’era nò lee, ma el primm amor.