Sit de coltura e attualità in lengua milanesa

Invia i tuoi messaggi a: info@elmilanes.com

---

DE SORA AI TREMILA Su on sentee de preia viva de sassoni fà a basei, su lastroni pien de spigoi or e or emm rampegaa, cont i man e cont i pee sott on sô ch’el ne inciocchiva. Rampegavom e sbanfavom per el fiaa ch’el ne mancava, ma con tanta voeuia dent de rivà de sora i nivol. Ultim sforz per rivà in scima poeu....vision de cavà el fiaa nivol sgonfi ‘me bombas carezzaven con passion ‘me moros innamoraa quij bei scimm quattà de nev ris’ciaraa da on ragg de sô. Nel silenzi quasi magich anca numm adess tasevom e scoltavom domà el vent ch’el diseva pian sott’vos guardee intorna.....el Paradis! Alarico Zeni

El temp l’è minga On gamber Vèss a Milan adèss che tristèzza! Gh’è passaa tròppi ann da quand gh’avevi vint ann. El temp l’ha cambiaa i nòmm anca ai tosann. Gh’è pù la Maria la Rosètta ò la Pina adèss gh’è la Deborah la Jennifer la Sabrina. In di strad gh’è ona gran confusion de macchin de gent che vann come i ratt quand gh’è corr adree on gatt di nòster navili gh’è restaa trii moncon a pensagh me ven el magon. Ma l’è el temp che passa a cambia tusscòss a Milan gh’ha robaa anca i rann e i fòss. Ciao Milan di lader di biciclètt e de polee el temp l’è minga on gamber el và nò indree. Giuseppina Cadé

Primavera milanesa Tener ogin bianch te guarden in l’erbeta smeraldina e disen ala gent sera e matina: “guardes in gir, Milan l’è pusee vera, bela e gentil perchè l’è primavera, adess in del’aria gh’è l’inquinament e l’ossido ‘l ven foeura dal scapament ma i fior nasen semper in sta citaa perchè anca ‘l Signor de lee l’è inamoraa.” Angela Brambilla