Sit de coltura e attualità in lengua milanesa

Invia i tuoi messaggi a: info@elmilanes.com

I mestee di temp indree del Celeste Fontana
Quèll del Disco	Quèll del Disco On mestee noeuv e innovativ di primm ann del noeuvcent, quand ancamò sferragliaven sora i binari i primm tramm cittadin e intercomunai. On laô dur, che’l vegnina faa in ògni condizion atmosferica: acqua, sô, nev e soratutt nèbbia. Quèll del disco, el doveva vèggh ona vista acuta e cercà de scòrg in la nèbbia el soragiung del tramm per cercà de segnalà el sò arriv per minga fall incrosà cont on alter tramm. L’òmm del disco el tegnìva in man on pal alt pussee de duu meter con de sora on disco de segnalazion a seconda de come le girava el segnalava la via libera ò occupada . Al dì d’incoeu el pòst de sto impiegaa de la strada l’è stà ciappaa dai semafor ò dai vari incros con relativ rotatòri che hinn dree vegnì sù in ògni canton de la città.
El Spazzarotai	El Spazzarotai Incoeu i a podom vedè ancamò, ma minga a pee cont in man el baston ch’el termina cont ona palètta per cattà sù, ma con di macchin meccanich che netten e spazzen via dai binari ògni forma de ostacol che podà da fastidi ai roeud di tramm. El spazzarotai el percorreva a pee tutt l’itinerari di tramm per tirà via ramm sècch, foej e fanga per rend inscì pussee sicur la corsa di tramm. A la sera el rivava a cà stracch me on asen per el gran camminà e cont i man tutt piagà per avè tegnuu in man tutt el dì el baston. Anca se el laô l’era dur, eren in tanti a cercà de fall anca perchè l’era pagaa abbastanza ben e el dava ona sicurèzza econòmica a la familia de l’operari.