Sit de coltura e attualità in lengua milanesa

Invia i tuoi messaggi a: info@elmilanes.com

I mestee di temp indree del Celeste Fontana
el Molétta	el Molétta On mestee chesschì, che se pò vedèll ancamò al dì d’incoeu, sebben on poo de rar. Con sto termin veniva definii on laorà continov ch’el straccava assee e de pòcch guadagn.  L’è semper staa on laorà ambulant faa de gent che la vegniva quasi tutta da la Valtellina.  I personagg eren artigian cont ona pazienza de Giòbb laoraven in silenzi e con tanta cura. L’attrezzadura del molètta l’era sempliz, settaa giò sora on scagnin con la fòrza d’on pedal azionaa cont el pee sinister faseva girà la roeuda e de conseguenza la mòla, l’affilava lamm, falcètt, forbis e cortei. Sora la mòla la gottava de l’acqua per raffreddà la lama che la rendeva pussee facil l’affiladura. El girava per i vii e el vosava “molètta, mòlètta l’è rivaa el molètta dònn gh’è chì el molètta” El compens per el sò laorà l’era pròppi ona ciallada.
el Zapattee	el Zapattee Altra figura d’ambulant, al dì d’incoeu completament scomparsa. Girava anca lù per i strad per vend sciavatt e pantofol, el taccava la soa mercanzia al còll ò in su el brasc, l’invidava i dònn a affacciass ai finester per podè rimirà la pròppia mercanzia e ghe l’offriva cont estrema educazion a tucc quei che l’incontrava longh la via. I sciavatt eren faa tutt a man, con ritaj, disègn e material anca costos, eren rinforzaa sotta la soeula con còrda de canapa per fà in manera che resisteven pussee nel temp per minga rovinai subit.