Sit de coltura e attualità in lengua milanesa

Invia i tuoi messaggi a: info@elmilanes.com

I mestee di temp indree del Celeste Fontana
El Ciapparatt	El Ciapparatt I nòster nòni el ciamaven ciapparatt; incoeu inveci el se ciama “derattizzatore”. On mestee tant in vòga fina a cinquant’ann fa, quand gh’era nonanmò i règol igienich del dì d’incoeu. I sò intervent eren mai istess, el se rangiava in tutti i circostanz; el doprava di sostanz velenos, ch’el metteva in di tann di ratt, ò di trappol de tutti i tipi; la maggior part di vòlt el scombatteva i ratt domà cont on baston, ie s’ceppava sù tutti a bastonad. El se quattava i man cont i guant e la faccia cont ona maschera de coramm prima de andà denter in di sit pien pienent de ratt, e prima de vegnì foeura l’era bon de mazzann ona dusentèna. Quand el finiva de mazzà i ratt el faseva on mucc in cortil e poeu el se faseva fà la fotografia. El ciapparatt l’era pagaa a segonda del numer di ratt mazzaa. Pussee de ona vòlta i Comun daven di prèmi speciai ai ciapparatt per liberà el territòri da la presenza di ratt.
El Piccaprei	El Piccaprei La Veneranda Fabbrica del Dòmm ghe n’aveva tantissimm de scopellitt che tutti i dì sistemaven l’edifizzi religios tanto car ai milanes. Gh’aveven di baracch piscininn dedree al Dòmm, pòcch ricòrden el pasquee ch’el se ciamava el Camp Sant indove viveven quand aveven finii de lavorà. Lavoraven dì e nòtt senza straccass. In del 1872 hann faa el primm sciòpero per ‘vegh ona miglior condizion de laô, cont on risultaa su la riduzion di or, 10 or e mezza al dì. In su la strada ne lavorava tanti che picchettaven e levigaven gròss lastroni de preia. Quand pioveva e piccava el sô se quattaven cont on telo tegnuu sù da on cavallett.