Sit de coltura e attualità in lengua milanesa

Invia i tuoi messaggi a: info@elmilanes.com

I mestee di temp indree del Celeste Fontana
La Piscinina	La piscinina L’era inscì ciamada la tosa che faseva i commission per i sart e per i modist, portando pacch voluminos de vari pes: da quei legger a quei pesant. La caratteristica de la piscinina l’era de vess allegra, semper gioiosa e senza penser, prerogativa di tosann de quella età. L’era ona margniffona e la se faseva nò ingattià da tutti i slandroni che l’incontrava per strada. Semper con la rispòsta pronta, la reussiva a repià a tutti i “battud”, anca scabros, che ghe faseven. La parlava domà el dialett cont on frasari tipich del sò temp, che incoeu putròpp l’è ormai andaa perduu.
La Puttana	La puttana Conossuda anca come dònn de l’M, ma a dì el ver con sto nòmm chì eren identificaa i dònn che eren fiss in di bordei, con la soa bella patent e regolarment schedaa in questura. I puttann de strada, inveci, se insubiven sui marciapee, per i strad, se mostraven ai probabil client e conosseven ben i sò “rendiment amatòri”. Vegneven apostrofaa con tanti nòmm, i pussee conossuu eren (e fòrsi hinn anca adess) loeugg, baltròcch, sguang, slander, pelander. Ona profession, donca, che la pò minga considerass come mestee de alter temp, ma mestee anmò attual ch’el rend “on bordell” minga domà a chi l’esercita, ma anca a chi sta “dedree” a lor.