Sit de coltura e attualità in lengua milanesa

Invia i tuoi messaggi a: info@elmilanes.com

I mestee di temp indree del Celeste Fontana
El Scoinatt	El scoinatt Anca sta figura chì la fa part de quell mond bellissim che l’era e el rappresentava la realtà di ambulant per i strad de Milan e la va a sommass a quei figur coloraa, che sbraggiaven, tipich del mond lombard, che se pò vedè ormai domà in d’ona quai fotografia ingialdida. El scoinatt el menava in gir per i strad de la città i sò merci faa de scov e de spazzett che attiraven i dònn de cà che vegneven foeura di sò abitazion per comprà la soa mercanzia. Ona quai vòlta se vedeva girà anca on quai scoinatt su de on carrett ch’el vosava i pregi di sò prodòtt. Anca perché tanti eren mingà domà venditor, ma anca fabbricant di sò scoinoni. Oltra ai scov vegneven venduu spazzett, forbes, manich de scoa, piumitt, scovitt per la cà, per i poggioeu, per i gabinett, per i soree, per i cantin. Incoeu, l’è on cas rar, se ved anmò on ambulant de scov su de on carr motorizzaa ch’el fa la reclamm al sò prodòtt e l’invida a comprall minga con la soa vos potenta, ma cont on megafon ò adrittura cont on altoparlant.
El Brumista	El brumista Quand in del 1870 hann cominciaa a girà per i strad de Milan i primm omnibus a cavai l’è anca cominciada ona lòtta dura tra i brumista, che guidaven i brumm e quei che guidaven i moderni tranvai de allora. Caratteristich l’è el vestii del brumista, faa de tunica e pantalon de pann bloeu scur filettaa de ross, con botton de metall bianch; cravatta bianca; gilé de pann ross con botton de metall bianch, e on cilinder, perchè se leg in d’ona crònaca del temp, a propòsit del cappell, “ oltra a vess el pussee elegant e el pussee adatt, el gh’ha el vantagg de tegnì al sò interno on volumm d’aria maggior”. Poeu quand hinn rivaa i macchin, i bus, i tassì, per el pòver brumista gh’è stada ona fin inesorabil.