Sit de coltura e attualità in lengua milanesa

Invia i tuoi messaggi a: info@elmilanes.com

I mestee di temp indree del Celeste Fontana
El Cadregatt	El Cadregatt Ricòrdi quand seri piscinin hoo faa in temp a vedei, giraven per i strad e vosaven per mètt in mostra la specialità de la cà che l’era quèlla de mètt a pòst i cadregh (dal latin c_tedra) i aggiustaven i impajaven i a lucidaven. Con la vos invogliaven i dònn a portà in strada i cadregh, se sentiven ben quand rivaven anca perché allora gh’era minga tutt el baccan di macchin e del traffich, el cadregatt l’impajava i cadregh in d’on canton de la via el studiava attentament in doe mettes per fass vedè el pussee possibil (anca allora la pubblicità) e el laorava settaa giò sora on piccol cadreghin e ògni tant el faseva on quai vèrs per fass sentì. El cadregatt de minga sconfond cont el cadreghee ch’el faseva nolegg de cadregh a pagament per i piazz in di moment de spettacol a l’avert e anca in gesa in di moment de funzion religios particolarment affollaa. Mestee chesschì che purtròpp hinn restaa in la memòria di nòster nòni e in qualche fotografia on poo sbiadida (a part che mì mi a ricòrdi e son minga nòno ciappa su e pòrta a cà).
El Maniscalch	El Maniscalch Me piasaria savè quanti di nòster lettor poden vantass de conoss la stòria del Sacro Ciod rinvegnuu da Sant Ambroeus visin a Ròma, poeu portaa a Milan e conservaa in la vòlta de l’abside del Dòmm? E in doe l’è staa trovaa? Pensii on poo da on maniscalch! El maniscalch l’è staa ona figura de laorà importantissima fin a pòcch temp fà, fin quand i lor bottegh se trovaven a ògni canton de via e doe tanti possessor de cavai se recaven per la ferradura di animai. El maniscalch l’era utilissim a tucc i abitant che staven in città, per i contadin che staven in campagna e per i militar di caserm. Defatt quasi tucc i famili possedeven on cavall, animal util per viaggià da on pòst a l’alter e purtròpp util anca per i guèrr. El maniscalch costruiva fèrr su misura poeu i a metteva ai zòccor del cavall, con tutt i operazion che attegniven a la ferradura, el curava anca eventuai lesion, in alcuni cas l’è conossuu anca cont el nòmm de fèrree di cavai.