Stèma
 |
Meregnan e la sò stòria
El territòri
Meregnan se tròva a des chilometer
circa a sud - est de Milan, in sul tragitt de la SS 9 Emiglia.
Situaa a on’altitudin media de 85 m., l’è traversaa a levant dal
fiumm Lamber. Confina con i Comun de San Giulian Milanes e
Colturan a nòrd, Vizzoeul Predabissi a est, Cerr al Lamber a sud
e Carpian a ovest.
La sa storia
A par che i primi abitant de Meregnan
fudessen i Ambron (de in dove che vegn el nòmm del fiumm
Lamber), che eren ona tribù di Galli Bòi quand, intorna al ‘300
a.C. s’inn stanziaa in de la la val padana. Solament in del 333
d.C. troeuvom on’indicazion del Comun, che se riferiss a ona
stazion romana per el scambi di cavall tra Milàn e Piacenza,
mettuu dent in de l’”Itinerarium Burdigalense”, in dove se
troeuva la nota “mutatio ad IX” (scambi al nòno milli),
chiarament riferibil al territori de Meregnan.
In di temp di invasion barbarch
troeuvom on riferimen a l’uccision del filòsof e consiglier del
re Teodorich, Severin Boezi. Mòrt che l’è vegnuda in del 584,
probabilment in “loco Calventiano”, in dove che adess gh’è la
Baselega de S. Maria Sunta de Calvenzann. Dòpo la dominazion di
Longobard, la battaja de Meregnan del 590 la segna la vegnuda di
Franch. In di secoi VIII e IX d.C. Meregnan l’è incorporaa in de
la contea franca de Milàn. Con la battaja de Legnan del 1176)
Meregnan l’è ceduu de i Lodigian a i Milanes.
In del period di Signorii l’è pòst
ambii in di sconter dinastich per la supremazia de Milàn. El
scrittor P. Giovio repòrta che Bernabò Viscont, Signor de Milàn,
“l’ha faa su ona cà gradissima cà simil a on castel con el
fossaa e el pont levatòi giò su i riv del fiumm Lamber in del
territori de Meregnan”. El castell l’ha semper rappresentaa ona
postazion strategega per el contròll militari del Sud de Milàn.
La battaja di Omenòni
In del 1512 el castell l’è staa daa a
Francesco Brivio con la carica de capitan e vicari ducal. In de
ch'el period chì Meregnan l’è staa teater de l’importantissima
“battaja di Omenòni” o de Marignan, del 1515, combattuda fra i
mercenari del re frances Francesco I e l’esercit di Canton
i svizzeri alleaa di Asburgh. La battaja l’è stada leggendaria e
la sò fama s’è spargiuda per l’Europa. La leggendaria battaja de
Marignano l’è stada cantada anca del poeta Gian Alberto Bòss
ch’el narrava de come prima de la battaja i poresin avessen
cantaa come gai per cinqu dì.
La bolla del Perdon
El Primm de Marz 1532 el Duca
Francesco Sfòrza II l’ha nominaa Gian Giacomo Medis Marches de
Meregnan. El fradell del Marches l’è staa eleggiuu Papa col nòmm
de Pio IV. Lù l’ha conceduu la Bolla con l’indulgenza del Perdon
(20 de Gennar 1563). Da la festa religiosa l’è nassuda la Fera
del Perdon.
Fina ai temp moderni
In del 1576 Meregnan l’è staa colpii
de la pesta e el Tribunal de la sanità de Milàn ghe fa tirà in
pè on lazarett.
Gh’è stada ona seconda ondada de
pesta in del 1630, e el Comun l’ha ordinaa des quader
raffigurant la vida de San Giovann Battista, oper espost sotta i
arcaa de la Gesa. Incoeu inn conservaa in del la Gesa de S.
Giovann e in quella de San Peder. Con San Carlo Borromeo,
Meregnan l’ha smettuu de vess possediment de la piev de San
Giulian e l’è divengnuu autonom. Sotta Maria Teresa (1748) gh’è
stada on amministrazion pussee organizzada, che l’ha remettuu
Meregnan sotta la piev de San Giulian.
In del 1796 Napoleon l’è entraa a
Milàn e, dòpo vegh “democratizzaa” i istituzion, l’ha ordinaa la
soppression de tucc i Ordin religios. I convent melegnanes inn
staa saraa e depredaa. I campan de San Giovann inn staa salvaa
dal Prevòst Candia con on stratagemma misterios: el gh’ha daa el
benvegnuu a Napoleon con ona procession solenn dove che
partecipava tutta la cittadinanza. Candia l’è andaa incontra al
cocchi imperial e el gh’haa dii duu paroll all’imperator: s’è
mai savuu cosa l’è che el gh’ha dii, ma Napoleon l’è andaa via
subit e i campann inn staa al sò pòst.
Fra i meregnanes che s’inn destenguu
in del risorgiment italian l’è important recordaa el Giusepp
Dezza, che l’ha combattuu la Prima Guerra de Indipendenza in del
1848. Lù la partecipaa con el Nino Bixio ai Brigada di Cacciator
di Alp.
Sotta la guida del Sciur Sindich
Codeleoncinn, in del primm Novecent, inn staa fondaa i pussee
important associazion e inn staa mettuu in pè i pussee important
oper pubblich, ona quai vuna anmò esistent; recòrdom l’Asilo
Social, l’Asilo Trombin, el Ricòver per i vecc, l’Ospedal
Predabissi, la Società operaia e el giornal “Il Corriere del
Lambro”. Hinn nassuu anca associazion sociai compagn de la
Società badilani bracciani e affini, l’Unione de mutuo soccors,
la Società contra l’accattonagg e, per finì, la Società 8 de
Giugn 1859, ch’el ciappava su i redus di battaj risorgimentai.
In di ultim ann de la Grande Guerra i Meregnanes s’inn stringiuu
sotta el Moviment di Moderaa, el Circol popolar e el Moviment
socialista, comenciand la secolar battaja in Consili comunal,
tra socialista e cattolich.
El Consili comunal l’è saraa in del
Giugno del 1922 e comincia l’epoca fassista.
Indubbiament la storega
predisposizion socialista e popolar di meregnanes gioeuga on
roeul decisiv e, dòpo l’armistizi, el contribuu de la comunità a
la Resistenza l’è staa notevolissim. Anmò incoeù, la capacità de
battaja e de dialogh, giust e nett bipolarism ante litteram l’ha
caratterizzaa la vida poletega sin de l’inizi del ‘900, e l’è la
fondamenta de l’alternanza bianch e ross – quand che gh’era nò
anca on’alleanza - che l’ha caratterizzaa l’amministrazion
comunal del dòpoguerra ai noster dì. |
 |
|
 |
