Sit de coltura e attualità in lengua milanesa

Invia i tuoi messaggi a: info@elmilanes.com

---

Stèma

Gorgonsoeula El territòri Situada 18 km a nòrd-est de Milan, a 133 m s.l.m., Gorgonsoeula la se estend per ona superfice de 1.69 kmq. El stèmma L'origin del stèmma la va indree fòrsi ai simbol araldich di esercit medioevai. Con tutta probabilità, la torr l'è de la Famiglia Torrioni, che in del medioev l'era feudataria del territòri. I duu leoni rampant vegnen foeura dal stèmma di Serbelloni, che dal 1689 hann dominaa la zòna. L'impostasion iconografica definitiva de l'antigh gonfalon, contornaa de motiv floreai e sormontaa da ona coròna, la va indree al princippi del XVIII sècol. I different ipòtes del nòmm El nòmm "Gorgontiola", giamò prima de l'ann Mila, l'è present in d'ona quai carta del monaster de Sant Ambroeus a Milan, in doe se fa riferiment al fatt che la piev de Gorgonsoeula l'era consacrada a San Protas e a San Gervas. L'origin del nòmm la va indree, come prima ipòtes, a "Curte Argentia". El nòmm roman l'indicaria on insediament arent a Argentia, tra Milan e Bèrgom. Second on'altra ipòtes, la saria ona stazion per el cambi di cavai in su la strada per Bèrgom, al 14° mia. In del cors di sècol, el nòmm el se saria trasformaa in Curt-argentia, Cortargentiola e a la fin Gorgonsoeula. La stòria Incoeu la piev de Gorgonsoeula la gh'ha ancamò el nòmm de Sant Protas e Sant Gervas (Sant Ambroeus l'ha ritrovaa i sò còrp in del IV sècol). Voeuna di comunità religios che la s'è sviluppada dòpo, l'ha sostegnuu l'attacch di Unni che, in del 453, hann distrutt Argentia. E dòpo de alora, el piccol insediament arent Argentia, de origin cèltica, l'era diventaa el pussee  important del territòri. Gorgonsoeula e tutta la pianura padana hann partecipaa a tanti avveniment important del medioev. Anca Gorgonsoeula l'ha partecipaa al sconter cont el Barbarossa in del 1176. Dòpo la pas de Costansa (1183), che l'aveva determinaa l'autonomia di Comun italian, l'è stada teater de ona lunga lòtta fada dai ered del Barbarossa. In del 1245, quand Federico II de Svevia l'era 'dree  a attaccà Milán, i trupp lombard s'eren ritiraa a Gorgonsoeula; in de la brusca battalia, hinn staa faa presonee dal nemis tutt e duu i comandant di esercit. In de la torr de Gorgonsoeula l'era tegnuu adrittura Re Enso, fioeu de l'Imperador.       In di document, el nòmm del paes el se troueva  domà in del 1510: l'è la prima vòlta che "Gorgonsola" el compariss stampaa, in del "Sacramentarium Ambrosianum". Intanta, dòpo el 1457, Francèsch Sfòrsa l'aveva decis de realisà ona red de canai navigabil tra el Pò, el Tesin e l'Adda. El navili de la Martesana, ch'el passa in mess a Gorgonsoeula, l'è in collegament cont i alter navili milanes dal 1497. L'è ciara l'importansa econòmica e strategica de on'òpera simil per la comunità in del cors di sècol. In del XVI sècol anca Gorgonsoeula l'ha subii l'ondada de la pest. On Lassarètt l'era staa faa sù arent la città e in quella occasion el futur San Carlo Borromee l'aveva faa visita a la popolasion.   In del XVIII sècol, anca el pòpol de Gorgonzoeula l'ha cominciaa a sentiss pussee "tiraa denter" in di sò origin e in la soa comunità, e semper pussee insofferent a la dominasion di Asburgh, che la doprava el pòpol in di sò terren come manovalansa. El 24 ottober 1785 la Cancelleria de Gorgonsoeula la istituiss ona noeuva fera paesana in del dì de Santa Caterina, el 25 de november, per la promosion del commerc de bestiamm, cereai, lin, ecc. La fera, simbol de l'operosità di popolasion locai, l'è stada per tanto temp on important appontament commercial. La fera del dì d'incoeu la s'è adattada a l'agricoltura industrial e l'è l'esempi de l'economia briansoeula cont i sò artigian specialissaa e i piccol e pròsper impres. La cittadinansa l'è stada tant attiva a comincià dai Cinq Giornad de Milan fina a l'Unità del 1861. Gianmò in del censiment de ch'el ann, Gorgonsoeula la gh'aveva pòcch men de 30.000 abitant. Sto attivism popolar el se ved in tutti i guerr de la stòria italiana da la metà del XIX sècol, da la guerra d'Eritrea a la Guerra Mondial ai martir de la Resistensa. El Gorgonsoeula De sigur, la città l'è conossuda depertutt in del mond pròppi per sto formagg. Gh'èmm nò di document cert, ma se pensa che el gorgonsoeula l'esistess giamò in del Rinasciment. La definision giusta la saria stracchin de Gorgonsoeula, nassuu dai vacch 'stracch' che vegneven a pascolà da la bergamasca. La lavorasion particolar la fond ona caggiada calda con voeuna freggia e la pòrta a la formasion de la muffa caratteristica, che l'è la principal differenza cont el stracchin tradizional. Gorgonsoeula l'è gemellada cont el piccol paes de Ambert, in Francia, in doe fann on formagg cont ona caratteristica muffa dolsa...