al cent per cent in lengua milanesa
info@elmilanes.com
|
|
|
Sit de coltura e attualità al cent per cent in lengua milanesa |
Invia i tuoi messaggi a: info@elmilanes.com |
|
Stèma       |
SÈST SAN GIOANN e la soa stòria prima part del Giovanni Costanzo El territori A la destra del Lamber cont ona estension de 11.74 kmq, Sèst se troeuva 9 km a NNE de Milan. Nòmm e stèmma La paròla Sèst second ona comun usanza romana, la stà a indicà la distanza in miara da la città principal, San Gioann l’indica la dipendenza, intorna al 1100 del territori de l’omònima Basilica de Monscia. On scud ch’el presenta alsò intèrno on castèll cont i torr tegnuu insèma da on compass(anticament sèst), nel cors di ultim duu secol el stèmma l’è cambiaa pussee d’ona vòlta, fin a rivà a quèll del dì d’incoeu stabilii nel 1954 quand Sèst l’è diventaa città. I origin Probabilment d’origin roman, de cert el territòri l’è staa sòtta la dominazion di Longobard in la seconda metà del VI secol. Quasi nient ch’el testimonia di vicend in epoca medioval, forse anca per el fatt ch’el territòri a chi temp l’era pròppi piscinin. I primm notizzi demografich ghi èmm grazie a on censiment di spagnoeu intorna a la metà del cinchcent cont ona popolazion de 437 unità, el 70% lavorava in l’agricoltura, ma coltivaven camp minga de proprietà, ma appartegniven a sciori milanes, con alter censiment del 1770 effettuaa dai austriach la popolazion l’è de 1277 abitant quasi tucc ancamò contadin. El vòttcent Sèst l’è faa da on nucleo stòrich e da ona vintèna de cassin, melgon e mais costituissen i coltivazion principai, ma anca vit e moron, grazie ai quai s’era inviada ona attività manifatturiera de lavorazion de la seda in del territòri (Puricelli Guerra 1832), quarant’ann pussee tardi i aziend tessil sarann sètt. Nel 1840 nel tòcch che collega piazzal Lorètt a la Villa Real de Monscia se inaugura la seconda ferrovia italiana, che la gh’ha ona fermada a Sèst visin al rondò. Nel 1876 il primm tramm trainaa da cavai (ippovia) che poeu la Edison la elettrificherà nel 1901. In di ultim vint’ann del vòtt cent nassen i primm organizzazion di lavorador come la Società de mutuo soccors fra operari e contadin e la Società cattòlega de mutuo soccors San Clement. In sto period gh’ha inizzi anca el procèss de industrializzazion de Sèst, procèss ch’el garantirà el svilupp per tutt el Noeuvcent, cont i caratteristich de urbanizzazion che ancamò incoeu manifesten la soa tradizion industrial in del panorama italian. Nel 1899 la ven fondada la Tessidora meccanica de Sigmund Strauss, dotada de pussee de cent telar meccanich, nel 1891 la nass l’Osva la pussee antiga impresa sestes. L’industrializzazion I grand imprendidor milanes capissen l’enòrme potenzialità del territòri de Sèst, grand spazzi, cost pussee contegnuu dai terren a la manodopera facilità de collegament con Milan e el rest d’Euròpa hinn fattor tròpp important e invitant per minga vèss sfruttaa. La cental elettrica de Cassan d’Adda la garantiss anca la necessaria font d’energia. Tecnich e operari gh’hann disposizion la ferrovia e la tramvia per i sò spostament e l’è inscì che se crea el primm vera e grand fenomen de pendolarismo laorativ de la Lombardia. I impres sestes del primm noeuvcent 1903: Società italiana Ernesto Breda; Stabilimento Davide Campari. 1904: Fratelli Santambrogio (costruzioni). 1905: Edizioni Barion; Edizioni Madella; Ercole Marelli; Fonderia di ghisa Attilio Franco; Fonderia di ghisa Luigi Balconi; Officine elettromeccaniche fratelli Menin; Pompe Gabbioneta; Società ing. Banfi; Nastrificio Kruse; Trafilerie e corderie Luigi Spadaccini. 1906: Distilleria Alemagna; Acciaierie e ferriere lombarde Falck; Gola e Conelli (decauvilles). 1907: Soffieria Monti; Laminatoio nazionale. 1909: Distillerie Roberto Moroni; Ditta Emilio Muller (ascensori e montacarichi); Società anonima trafilerie e punterie lombarde; Società editoriale milanese. 1910: Società italiana dei prodotti alimentari Maggi. 1911: Chioderia nazionale Orsenigo; Sinner Distillerie italiane. 1913: Orenstein & Koppel (decauvilles, macchine per l’edilizia e la pavimentazione stradale); Stabilimento Barelli (trafileria e corderia). 1914: Società anonima produttori alcool. 1917: Acciaierie elettriche; Puricelli società anonima strade e cave; Scaini (accumulatori). 1919: Arti grafiche Goretti; Curt Georgi Leipzig (essenze, oli e profumi sintetici); Magneti Marelli; Moto Garelli; Scatolificio ambrosiano. La trasformazion urbanistica La rapida industrializzazion la comporta, de conseguenza, on notevol aument de la popolazion, in des ann, tra el 1901 e el 1911 i sestes raddoppien (13.667) la nass inscì la Sèst modèrna, al de là de la ferrovia. I stèss imprendidor che hann portaa in paes i pròppi aziend hann contribuii a la realizzazion di infrastruttur urbanistich del noeuv cors de Sèst San Gioann, costruissen cà popolar per i pròppi operari, on do ut des per ottegnì manodopera fissa. Sèst la se trasforma da paes agricol in vun di pussee important centri industrial d’Italia, con di pussee grand impres metalmeccanich e metallurgich. L’arriv d’ona granda massa de noeuv operari la stravòlg tutt l’ordinament social, ma la troeuva in di sestes on pòpol pront a capì e a integrà i noeuv immigraa.
|
