Sistema satelitar GALILEO

Sit de coltura e attualità
in lengua milanesa

Invia i tuoi messaggi a:
info@elmilanes.com

GALILEO
sistema satellitar de navigazion global
(Angiol Verones)

I marinar del diciassettesim secol stimaven la pròppia posizion vardand quanto che el Sô l’era alt in su l’orizzont, in ‘sta manera cognossevan la latitudin. Ad esempi all’equinòzi, al mesdì local a Pavia el Sô l’è alt squas 45 grad de l’orizzont; se andemm a l’equator inveci el troeuvom a perpendicol in sul cô.
Per capì anca la longitud l’era pussee complicaa: gh’aveven bisògn de on orelògg a pendola che batteva i or del meridian de Greenwich. Quand che la nav la viaggiava in su la circonferenza terrester, se saveva che ogni 15 grad de longitud percorsa, corrisponden a on’ora in avant o indree a seconda se la nav la se moeuv verso occident o orient (15 grad x 24 or = 360 grad, che l’è l’intera circonferenza terrester).
I orelògg del diciassettesim secol sbagliaven a batt i or e in on dì podeven restà indree anca per on second. Se el viagg l’è cort gh’inn nò problema, se sbagliava de on quai kilometer, ma se te gh’hee de traversà l’Atlantich, te podevet sbaglià la rotta de ona quai centinaia de kilometer.
Incoeù i nòster orelògg inn pussee precis. Se utilizzen i orelògg atòmich, che in basaa in su i oscillazion di level atòmich di atom compagn de l’idrògen, del cesi o del rubidi.
L’oscillazion di level atòmich l’è inscì stabil, che chì orelògg inn precis a la tredecesima o a la quattordecesima cifra decimal. El voeur dì che perden on second ogni squas quatter million de ann. ‘Sti orelògg atomich vegnen imbarcaa in su i satellitt artificiai che òrbiten intorna al mond per indicà ai nav, ai aerei, ai tren e a tucc i viaggiator, dove che hinn con ona precision de on quai kilometer. Incoeù gh’inn domà duu sistema inscì: quel di american: el GPS (Sistema de Posizion Global) e quel di russ, el GLONASS (Sistema Satellitar de Navigazion Global). Inn tucc e duu sistemi satellitar in man ai militar e studiaa per la guerra freggia, per guidà in su i obiettiv militar i nav, i missili e i aerei. Incoeù chì sistema de navigazion satellitar inn indispensabil per tucc i traffich aerei e marittim del mond. Gh’è puu nessun che usa el sestant e la pendola per determinà la sò posizion e se pò minga res’cià che chi sistema de navigazion vegnen sarà sù de on dì con l’alter per question de importanza militar. L’Euròpa giamò dal dumila l’è dree a costruì on pròppi Sistema Satellitar de Navigazion Global (GNSS) ciamaa GALILEO, che sarà in di man di civil e podarà dà garanzii de vess affidabil.
El sistema Galileo el sarà costituii de ona trentena de satellitt artificiai che pirlerann in su tri òrbit intorna a la Terra per garantì ona covertura global de la superfis e ona precision de posizionament de squas on meter. Al soeul ghe sarann diversi antenn che controllerann vintiquatter or su vintiquatter la precisa posizion di satellitt in su l’orbita e che garantirann l’esatta sincronizzazion de tucc i orelògg atomich al centro de controll a Terra e in su i satellitt in del spazi. Controllà ‘sti ròbb l’è fondamental per vegh ona precision de squas on meter inveci che on quai kilometer compagn del GPS.
Incoeù quand che capita on incident aereo o ferroviar se cognoss mai con precision la posizion, e allora se perd temp a cercà el loeugh de l’incident. El temp l’è fondamental per i soccors: anca on quai minutt in men pò salvà di vit uman.
El Galileo costerà 3,2 miliard de eur, compagn de la spesa per 150 Km de autostrada o de la spesa del tunnel principal in su el tragitt de alta velocità tra Lion e Turin. El costa gnanca tant, e el frutterà almen cinqu voeult tant, contand solament i applicazion in su i traspòrt ferroviari e aerei.
El Galileo ‘iutterà i pòrt marittim come Genoa a raddoppià el traffich commercial de carich e scarich, perchè ghe sarà puu pericol de incident tra nav, dato che la posizion se cognosserà semper con on quai meter de precision.
Quand che su l’autosô in Emiglia ghe sarà la nebbia, i veicol con el GPS poderann vess rallentaa o guidà automaticament d’el satellitt, e a quei de dree sarà possibil comunicaa squas in temp real se gh’è staa on quai incident.
I TIR e i camion poderann vess monitoraa e el commerciant savrà semper dove che inn e quand che el produtt vegnarà consegnaa ai client.
I pullman e i tren poderann segnalà la pròppia posizion e i orari in di stazion vegnarann aggiornaa in temp real, inscì el viaggiator savrà quand che i mezz pubblich riven.
I aerei poderann atterrà anca quand gh’è nebbia a Milan, senza vess dirottà a Bergom.
Ma Galileo gh’avarà anca diversi applicazion commerciai, minga solament in su la sicurezza e l’affidabilità di traspòrt.
Galileo poderà monitorà i spostament di continent, di fran in su i montagn e di fagli geològich compagn de quei che gh’emm in del mar, per prevedè i terremoeut, i fran o i eruzion vulcanich o i ond anòmai compagn di tzunami.
L’applicazion pussee commercial sarà quella collegada ai telecomunicazion e ai servizi bancari che gh’hann bisògn de savè esattament l’ora di transizion bancari per l’e-commerce e i cart de credit. Tucc i telefonitt ad esempi sarann equipaggiaa de on GPS per savè la pròppia posizion e per cognoss precisament el temp. In puu tucc i sistemi GPS sarann equipaggiaa de on sistema per i ciamaa de emergenza al 112 in Euròpa e al 911 in di USA per vess rintracciaa con ona precision de on quai meter anca in di città.
Galileo podarà dagh ona man anca a l’ambient, perchè sarà bon de relevà el posizionament anca di animal e di pess in del mar. Applicazion util sia per i pescherecc sia per i studios di animal in via de estinzion per determinaa quali inn i habitat de preservà.
Ona larga banda de operazion sarà usada anca da i nazion che collaboren con el progett Galileo. Se de ona part saremm pussee sicur e viaggerem mei, de l’altra la polizia poderà controllà mei miliard de persònn senza fass scovrì e senza magara dagh cont a nessun. Tra i collaborator de l’Euròpa in del progett Galileo, s’è mettuda anca la Cina, che l’è minga la nazion pussee democratega del mond.