Sit de coltura e attualità
 in lengua milanesa		 Invia i tuoi messaggi a:
info@elmilanes.com





El Tredesin de Marz del Renato Colombo

El vegniva da l’orient, l’era alt de statura, de bèll aspètt, con di cavei long longhent.
L’era rivaa a Milan, stracch e pien de polver, el 13 de marz de l’ann 52 dòpo Crist.
Come bagali el gh’aveva domà, ona sacca a tracòlla, ona gamèlla per bev l’acqua da i pozz e on baston tutt gròpp doe in cima l’aveva miss ona canna in manera de formà ona specie de cros; el sera fermaa in di bosch che gh’eren foeura de la città visin a la pòrta Oriental, pront a comincià la soa mission.
El sò nòmm vera l’era Giusèpp, ma l’era conossuu come Barnaba, che voeur dì fioeu de la consolazion.
L’aveva ciappaa el pòst, tra i Apostol de Giuda el traditor, e l’era partii per portà la paròla del Signor in dì paes al de chì del mar.
Nel pòst doe el s’era fermaa per riposà, el pont pussee in alt del bosch, Barnaba l’aveva cominciaa a fà i primm discepol, a l’ombra de la soa cros de legn che l’eva piantada in ona gròssa prèia.
Lu el voreva nò vegnì denter in città, per minga passà davanti a i statov pagan che eren mis lì a guardia de Milan e tutt quei che vegniven in città eren obbligaa a rendegh penitenza.
Domà dopo tanto temp, e l’era ona bella giornata de sô, Barnaba l’ha impugnaa la soa cros e a la testa de tutti i sò discepol l’ha deciduu de fà on gir intorna a Milan al sò passagg i statov crodaven in terra a tòcch tant che gh’è ne restaa in pee nanca voeuna.
Inscì l’omm rivaa da l’orient l’è riessii a entrà in città, poeu el s’è fermaa  a porta Ticines per celebrà i primm battesim e per continoà la soa mission.
Ma purtròpp a Milan el s’è fermaa pòcch temp, par chè gemò l’ànn dopo, la lassaa la città, ma prima l’ha consacraa el gregh Anzalon primm vescov de Milan.
Ai milanes come pègn de fed l’ha lassaa la soa cros de lègn conficcada in d’on sass, e doe l’aveva celebraa la prima messa cont i primm battesim i fedel hann tiraa sù la gesa de sant’ Eustòrg; ancamò al dì d’incoeu gli arcivescov quand vegnen nominaa se fermen a memòria del primm predicator cristian.
A ricordà la vegnuda de Barnaba, a Milan s’è tegnuu per secol ona festa ciamada el tredesin de marz,  olter a i funzion religios gh’era ona fera de fior e on mercaa de roba dolza.
Incoeu el tredesin de marz l’è diventada ona fera come tutt’i alter, ma a testimonianza gh’è anmò el sass doe l’era stada piantada la cros e se poo vedè l’incision cont i tredes tacch che indichen el dì che Barnaba l’è rivaa a Milan.
La prèia dopo vari traslòcch se troeuva adèss in de la gesa de Santa Maria del Paradis a pòrta vicentina.
Purtròpp gh’è restaa nient de la cros de legn, el temp l’ha cancellaa tutt i tracc.