Sit de coltura e attualità
in lengua milanesa		 Invia i tuoi messaggi a:
info@elmilanes.com









...La Scala ristrutturada
Articol del 2005, del Vittorio Bianchi

Martedì 7 dicember 2004 Milan l’ha vivuu vun di moment che la gent la spettava pussee in tutt l’ann, la riapertura dòpo vintiquatter mes de lavorà per el restaur, del Teater a la Scala. Per sta occasion chì l’è stada scernida on’òpera che giamò, el 3 de agost del 1778, l’aveva dervì la stagion de l’allora Noeuv Regio Teater de Santa Maria de la Scala, cioè l’ “Europa riconosciuta” de l’Antonio Salieri.

Hinn staa dispòst per l’occasion, al Teater di Arcimbòld (sed provvisòria de la Scala in sti duu ann chì de lavorà) e in de la Galleria Vittòri Emanuell di maxischermi per la proiezion de l’òpera; per sta occasion chì poeu hann faa nass on bordell de iniziativ colturai, moster, conferenz, lezion, che hann attiraa l’interess del pubblich per ona serada che la gh’ha avuu el savor de ona noeuva inaugurazion.
L’avveniment de la giornada de Sant Ambroeus, l’è andaa pussee in là de on aspett purament musical, che l’è passaa squas in second pian se confrontaa con l’importanza de la kermess mondana e del sò significaa a l’interno de la vita coltural de la città.
L’òpera che hann scernii l’è minga voeuna di miglior, la compòrta di ver acrobazzii vocai, i ari hinn nò propriament memorabil, anche se on quai brano strumental el gh’ha on profil melòdich interessant. La reson stòrica l’ha vinciuu sul gust del pubblich cont el recuper de un’òpera rarissima, talment rara che l’è stada rappresentada domà ona vòlta in 226 ann.
El Maester Muti, l’ha faa senza dubbi ona scelta coraggiosa, che risulta però, da on’analisi di fatt pussee attenta, on po azzardada: l’òpera la tira nò da la soa part e la gh’ha minga di motiv memorabil, i compless vocai e strumentai hann minga faa on particolar approfondiment de natura interpretativa e i cantant gh’aveven spess pussee importanza rispett a l’orchestra, che, d’altra part, la gh’aveva on son credibil e sicur, senza però rivà a livèi particolar de espressività. Salieri l’ha cercaa de fà sù on’òpera, sul modell de la riforma del Gluck, che la gh’avess ona drammaticità pussee spiccada e la se limitass minga a ona ordinaria ripetizion de recitativ e ari, seguii da on tòcch d’insèma a la fin de ògni att. L’òpera la risulta fada in manera ambiziosa, cont on tentativ consapevol de mantegnì viv el fluss drammatich de la stòria, anche se i ari paren pensaa pròppi per svoiall, dal moment che hinn convenzionai in de l’invenzion, prevedibil in del svilupp, piatt in di conclusion.
L’interess mediatich, consideraa anca el scars interess prodòtt da l’òpera (el recuper a dì la verità, l’è mai pars necessari a nissun) el s’è concentraa su la mondanità de l’avveniment, su la reclamm esagerada fada prima, su la sfilada di sòlit peronagg conossuu semper pront a dagh on’importanza de portada stòrica, second lor, squas rivoluzionaria proporzionada a l’importanza de la riaperuta de el teater.
El success de la rappresentazion l’ha portaa a dodes minutt el battiman per tutt el grupp, on ver e pròppi trionf, cont i ovazion pussee rumoros riservaa al direttor de l’orchestra Riccardo Muti e ai cantant, impegnaa in d’on ver e pròppi tour de force de ari acrobatich, piroett e vocalizzi, nòt altissim e part vocai difficil de eseguì.
Senza dubbi l’operazion missa in pee da la città de Milan l’ha faa on certo effett, l’ha faa diventà la riapertura del teater on avveniment de dimension global, che l’ha tiraa denter tutta la città, informada fin tròpp minuziosament sul restaur de la Scala, al ponto che tucc saveven in di minim particolar i differenz tra el noeuv e el vegg edifizzi, provocando on tal moviment in Piazza de la Scala che da temp el se vedeva minga, con tanti turista (e anca tanti milanes), tucc ciappaa a curiosà intorna a la noeuva costruzion fada a barchetta indove hann trovaa el pòst i camerin di artista e a commentà come la se integrava con la facciada neoclassica del Teater. Da ona part, donca, l’è staa curios osservà el comportament da espert di passant vers el Teater che adess el mett visin puttòst che fondi i element archittettònich in netta opposizion reciproca, da l’altra, inveci, l’è stada ona ròba che l’ha tòlt el coragg sentì i affermazion trionfant de la giunta Comunal, cha la s’è fada granda sui temp rispettaa per el restaur.
A la fin de la fera, s’è trattaa de on avveniment de sicura importanza, montaa in di sò significaa, e in fond minga del tutt “induvinaa” in de la scelta artistica, anca se, finalment, l’ha portaa a la riapertura de on spazzi irrinunciabil per la coltura mondial, che el gh’ha minga de fà desmentegà el Teater di Arcinmbòld (che in sto ann chì, a bon cunt, lè anmò protagonista de numeros spettacol del calendari “scaliger”) ma valorizzall come pont de riferiment per on coragg maggior in la scelta de la programmazion artistica.

 ARTICOI