fregùj06

Sit de coltura e attualità
in lengua milanesa

Invia i tuoi messaggi a:
info@elmilanes.com

fregùj 6

Nel 2003 boom d’impres extracomunitari Crèss nel nòst paes el numer d’impres de stranier ( adèss hinn circa 140.000 ) e che dann laorà anca a italian. L’ha rilevaa ona ricerca de la Camera de Commerci de Milan. In i primm noeuv mes del 2003 i attività econòmich gestii da cittadin stranier hinn cressuu del 16.3% rispètt al 2002. I impres gestii da exstracomunitari dann minga domà laurà a immigraaa, ma anca a tanti italian, sora 230.000 lavorador ben 30.000 hinn italian.	Radiochirurgia cranica senza anestesia general Ròma, se ciama Gamma Knife e l’è el noeuv instrument ch’el permètt de eseguì trattament de radiochirurgia cranica senza anestesia general. La notizzia l’è de l’Associazion Parchi Scientifici e Tecnologici Italiani (Apsi). Cont ona localizzazion digital tridimensional di lesion cerebrai, el Gamma Knife ( domà cont anestesia local) el permètt de trattà cont ona approssimazion de 0.3 mm. L’utilizza 201 font de cobalt radioattiv che se concentren sora la lesion de irradià.
REGION LOMBARDIA, Borsa de la spesa prorogada fin a magg 2004 Milan, la s’è nonanmò conclusa l’iniziativa de la borsa de la spesa che già la Region la voeur prorogala per alter trii mes. L’iniziativa in supermercaa, negòzzi, bar e ristorant l’andrà avanti donca fin a magg e i prezzi de tanti prodott resterann bloccaa. Finadèss a la borsa de la spesa hann aderii 2.331 pont de vendita, l’8% de quei present in region. La percentual de adesion fra i supermercaa e ipermercaa l’è stada del 90%. Nel dettali, hann partecipaa 606 bar e ristorant e 1.725 negòzzi (380 de granda distribuzion, 400 de media distribuzion, 892 negòzzi e 54 tra ambulant e mercaa comunai). Tant per cambià la maggior part d’adesion la s’è avuda a Milan 30,6%), ma anca alter città gh’hann avuu percentuai alt Vares 17,6%, Brèscia 10% e Còmm 10,3%. On succèss, anca se manchen dati precis sul monitoragg di prezzi in di ultim trii mes, che l’ha convint la Region e l’Unioncamer minga domà a prorogà l’iniziativa, ma anca a diffondela pussee.	Primm concors de la 488/92 per i impres artigian Ròma, via libera al primm concors de la lègg 488 riservaa ai artigian. La nòrma, che l’ha sostituii part de l’intervent straordinari nel mezzdì ( lì l’è semper mezzdì ven mai la voeuna ) se applica anca ai aree del centro-nòrd. Obbiettiv individuaa da la Commission Euròpea, quindi el var per tutta l’Italia. Finadèss el s’era occupaa domà d’industria, turism e commerci. Da incoeu l’è avèrta anca ai impres artigian. El ministeri di attività produttiv l’ha stanziaa circa 125 milion d’euro per finanzià i progètt de noeuv aziend ò l’ampliament d’impres gemò esistent. I domand gh’varann de vèss inviaa entro el 31 magg che ven. Artigiancassa, che la cura tutt i fas de la procedura, dal riceviment di domand a l’istruttòria e formazion di graduatòri, fin a l’erugazion di di danee l’ha attivaa on servizzi d’assistenza ai impres ch’el preved la diffusion de la modulistica, l’informazion su i modalità d’applicazion de la normativa e l’assistenza a la compilazion di mòdul per la domanda, gh’è anca on sit internet ch’el contègn tutt’i indicazion util per i impres. (www.artigiancassa.it).
Prometteven interèss da favola, risparmiador bidonaa Sondrio - Truffa aggravada e abusiva attività de raccòlta del risparmi. Con stì accus la Procura de Sondrio, al termin d’indagin svòlt dai investigador del capitan Massimiliano Re, de la Polizia Tributaria de la Guardia de Finanza de Sondrio, l’ha rinviaa a giudizzi trè persònn. Nel procèss, che l’incomincerà nel Tribunal de Morbègn (SO) el pròssim trii de giugn, sarann giudicaa Renato Trussoni, 55 ann, affermaa imprenditor de Rogolo (SO) titolar d’ona importanta azienda de ferramenta, Camillo Libera,54 ann, allevator de bestiamm de Colorina (SO) e Rosanna Cusini, 30 ann, originaria de Grosio (SO), ma da qualche temp domiciliada a Castelnuovo Rangono (MO) e ritegnuda la ment de l’organizzazion. L’attività de raccòlta del conquibus tra i risparmiador, 3 ann fa, la s’è estenduda da la Valtellina ad alter provinci de la Lombardia, finn a interessà l’Emilia Romagna. Ai client vegniven faa sottascriv di ver e pròppi contratt, prometteven interèss mensil da capogir, oppur di finanziament de l’Union Euròpea per el migliorament di pròppi aziend, per gl’imprenditor borlaa denter. “Investom in ona central per el pompagg del petròli in Nigeria, el guadagn l’è assicuraa” prometteven i component de l’organizzazion finida nel mirin de la Guardia de Finanza de Sondrio. Invece i danee vegniven dirottaa sora di cont corrent “protètt” ch’eren staa dervii da i truffador e da alter complici la cui posizion l’è ancamò al vaglio di magistraa. “Quand me sont accòrt de vèss staa imbroiaa -el dis voeuna di 150 vittim- cont alter amis, che anca lor aveven perduu i risparmi d’ona vita de sacrifizzi, se sèmm rivòlt a l’avocatt Alberto Zecca de Morbègn per denuncià i responsabil che, s’è poeu vegnii a savè, aveven cattaa sù circa 4 miliard de vègg lir.	Cart de credit clonaa: l’inchiesta de Cremòna la se slarga Cremòna, la se slarga l’inchiesta sora la vicenda di cart de credit clonaa, scopèrta a Cremòna, che l’ha portaa a la denuncia de trii cittadin romen trovaa in possèss de dò cart che conteneven i còdis d’ignari titolar. S’è poeu vegnii a savè che la banda la se impossessava di còdis attravers Internet, menter i propietari di cart de credit se collegaven per fà di comper. I inquirent gh’hann individuaa alter complis, anca lor rumen, tra questi dò dònn. Voeuna, immigrata clandestina, l’è stada individuada e espulsa el scors genar. L’altra l’è stada condannada a noeuv mes de preson, a Còmm in seguit a on’altra indagin, la questura de Cremòna l’ha domandaa la trasmission di att da la procura lariana e l’ipotizza di ramificazion in tutta la Lombardia, ma anca in Svizzera, Olanda e USA. Des condann per la banda di auto DE LUSSO Lècch - l’è terminaa con des condann e trè assoluzion el procèss a la banda, specializzada in auto de lusso, ch’el vedeva imputaa di lecches accusaa, a vario titol, per complessiv 80 furt de macchin de gròssa cilindrada, compres anca di Ferrari, i automòbil vegniven modificaa e rivenduu a l’ester. I pènn del Tribunal de Lecch vann da on ann e duu mes a ses ann e quatter mes a seconda di vari posizion di imputaa. I reati vann indree fin ai primm anni 90, el procèss s’è conclus dòpo on longh iter in Tribunal.
Vandalismi da duu ann contra i macchin responsabil ona dòna de 60 ann nel cremones da mes tutti se tegniven lontan dal parchegg Cremòna - l’inafferrabil vandalo che per duu ann l’ha sfregiaa i macchin in piazza IV November a Casalmorano e costrètt i automobilisti a tegniss lontan da quèlla zòna e obbligaa el Comun a installà di telecamer gh’ha on nòmm e ona faccia che sorprenden. Hinn quèi de ona sciora de sessant’ann, pensionada, che la stà de cà nel paes e che l’è stada denunciada dai carabinier per danneggiament aggravaa e continuaa. I militar de l’arma l’hann individuada e incriminada dòpo settiman d’appostament. La dòna l’ha faa marron menter la se aggirava tra i macchin in sòsta cont in man di ciav, on puntiroeu e di fòrbis. La colpiva indifferentement a la mattina e a la sera. I macchin danneggiaa sarien ona sessantina. Nonostant l’è stada ciappada in castègna la negaa ogni evidenza.	Rapinn in di vill: derven minga la cassafòrt, duu anzian malmenaa; l’è succèss nel milanes, i rapinador la pòrten via sarada sù L’ha ris’ciaa tantissim ona còppia de Gaggian (MI) che ona nòtt, pur sòtta la minaccia di arm da part de cinch malvivent, hann minga voruu dervì la cassafòrt che la se trovava in cà. I banditi, dòpo che i aveven piccaa tutti e duu, hann deciduu de portala via anmò sarada e s’hinn allontanaa senza faggh ulterior mal. Tutt l’è succèss ai dò or de nòtt, in ona abitazion che la se troeuva sora al ristorant gestii da la còppia: i rapinador, cinch òmen, da la pèll olivastra e cont on accent stranier, hann sorpres in del sògn Raffaele R. 75 ann e Rita L. la miee d’origin finlandes, e sòtta la minaccia di arm voeureven faggh dervì la cassafòrt ma lù pur malmenaa l’ha rifiudaa. A quèll pont i cinch hann piccaa la dòna sòtta i oeugg del marì, ma anca lee l’ha minga ceduu, a sto pont i cinch on poo disorientaa per la resistenza che se spettaven nò, hann pensaa de ciappà la cassafòrt, di orelògg e di gioiei e de allontanass. Prima de smammà, però s’hinn faa dà i ciav de la macchina ona mercedes 200, per podè caricà la cassafòrt, el valor de la rapina saria de circa 30.000 euro senza contà quèll de la mercedes.
Completada la costruzion d’ona gesa nel bergamasch dòpo 300 ann Bergom – grazie a on accòrd tra el comun e, cont el coinvolgiment d’ona fondazion e de alcuni privaa a Rovètta, nel Bergamasch, l’è stada ultimada la costruzion de la gesètta de la Confraternita del Suffrag, pensà che el termin di laorà el se attendeva da ben 300 ann. Finii i laorà la gesa cont annèss i locai storich diventerann on museo e loeugh de conferenz e inconter a Rovètta. El fabbricaa l’è staa recuperaa grazie a on finanziament da restituì senza interèss a la Region. I spazzi che s’hinn ottegnuu sarann utilizzaa per esponn i arredament sacri. L’è stada anca ricavada ona sala per riunionn cont ona capacità de 100 pòst.	Tumor. Ona medesina sperimental l’inibiss la replicazion de la cellula tumoral Milan - ona medesina sperimental bòna de fà inceppà i meccanismi de la replicazion cellular d’on tumor e de distruggel. Quèsta l’è la strada percorsa da Jerry Shay de l’università del Texas a Dallas e che l’ha presentaa al Convègn Internazional de l’IFOM-IEO de Milan, i risultaa de la sperimentazion hinn incoraggiant e hinn rivaa gemò a la fas clinica, in collaborazion con la società Geron Parmacy. La differenza tra ona cellula sana e voeuna tumoral sta nel fatt che menter quèlla sana la se replica on numer limitaa de vòlt, prima de la senescenza e de morì, quèlla tumoral la se replica a l’infinii l’è praticament immortal. Stà medesina la và denter in tutt i cellul in quei san la troeuva nò el bersali e la agiss minga, in quei tumoral i a blòcca.
Lombardia: stanziaa 10.5 milion per di restaor in la region. A Milan hinn previst 30 òper de “maquillage”. Villa Real de Monza Milan – musei, òper d’art, archivi e palazz stòrich de Milan e de la Lombardia sarann sòtta pòst a “maquillage”. El minister per i Beni Cultural Giuliano Urbani l’ha firmaa el pian d’intervent ordinar 2004. In la Lombardia hinn previst 98 intervent, 30 per i ben stòrich-artistich, 33 per i ben architettònich e per el paesagg, 24 per l’archeologia, 7 per i archivi, 3 per i ben librari e vun per l’art e l’architettura contemporanea, per on impòrt complessiv de 10.531.027 euro (gh’hann miss anca i 27 euro questa sì che l’è precision). In particolar a Milan hinn previst 30 intervent: 9 per i ben architettònich e del paesagg, 11 per el patrimòni stòrich-artistich, 2 per i archivi e 8 per l’archeologia per on impòrt de 3.280.440. tra i alter sarann faa òper al Palazz Ducal de Mantoa, al Castèll Scaliger de Sirmion, al Palazz de la Lòggia a Brescia, al Castèll Sforzesch de Vigeven e a l’area archeològica de Castelseprio. Alter intervent strategich sarann in del pian del lott 2004-2006 ch’el sarà presentaa in di prossim dì.	Da Cremòna l’idrovolant el lancia ona sfida a l’auto e al treno Cremòna – te saludi noios cov in macchina sora strad e autostrad e prèst anca di treni lumaga se podarà fann a men, la novità l’è collegà i città cont on servizzi d’idrovolant, l’è pròppi convint el president de l’azienda di pòrt de Cremòna e Mantoa Giorgio Albera, che l’ha promovuu ona singolar iniziativa: collegà la città del Torrazz e i principai città del nòrd Italia cont i idrovolant. La proeuva la s’è gemò effettuada dal pòrt fluvial a la periferia de Cremòna ghe partii el primm idrovolant de la compagnia veronesa Magiair, l’iniziativa promòssa da l’Azienda di Pòrt de Cremòna e Mantoa in collaborazion con la Clipper Aviation, società tedesca, che l’òpera in sto particolar settor de l’aviazion civil. L’aereo a vòtt pòst, utilizzaa per la proeuva, el provegniva da S. Moritz, in Svizzèra, dòpo on scal a Còmm per i pratich doganai l’è planaa in l’avanconca, subit dòpo gh’è staa el vol dimostrativ. Cremòna la se candida per diventà el terminal de sto servizzi d’idrovolant. La tratta vers l’Idroscal de Milan la sarà de 20 minutt, per Venèzzia 35, per Genoa 45, per Sondrio 40 e per Ancòna 1 ora e 10 minutt. I cost, disen che, sarann pressapòcch paragonabil a quei d’ona automòbil, inscì de permètt l’utilizzi a tucc e minga domà ai sciori, se podarà fà anca del turismo on poo divers dal sòlitt.