fregùj05

Sit de coltura e attualità
in lengua milanesa

Invia i tuoi messaggi a:
info@elmilanes.com

fregùj 5

Giovin bòss de la malavita cines arrestaa a Milan Milan, on giovin cines, ritegnuu vun di referent de la malavita local de lo Zhejiang, region a Sud de la Cina (chissà perché la malavita l’è semper al sud) e, chì in Italia, vun di capi banda che organizzen rapin, estorsion, e omicidi nei confront di sò connazionai, l’è staa arrestaa da la polizia a Milan. Il giovin, 19 ann, l’è accusaa de l’omicidi d’on sart cines avvegnuu a Milan nel 17/10/2001, a l’era anca latitant tra l’alter per vèss scappaa dal rifurmatòri. Defatt el giovin, originari del Wencheng, al temp de l’omicidi l’era ancamò minorènn. La città e la region de doe el provègn in quei da doe per la maggior part, provègnen quasi tucc i cines che vègnen con permèss regolar o clandestinament in Italia.	Tenten de robà sora on tir, ma vegnen arrestaa dopo on’inseguiment Còmm, al termin d’on inseguiment in autostrada, i poliziòtt de Bust Arsizzi hann arrestaa trè persònn menter eren dree a robà el carich d’on tir parcheggiaa ne l’area de servizzi Lario Ovest. In manètt hinn finii Giusèpp Rizzi 48 ann de Bitonto, Daniele Vecchia 32 ann de Broscia e Vincenz Laurenti anca lù de Bitonto. Hinn staa processaa per direttissima per tentativ de furto, Laurenti e el Vecchia hann patteggiaa on ann e 300 euro de multa, el primm con la sospension condizional, el second l’è finii ai arrèsti domiciliar. El Rizzi gemò cognossuu per simil episodi l’è invece in galera e el tornerà in tribunal. El furt del carich del tir (quintai de scarp) l’è andaa a mal per l’intervent de l’autista, ch’el s’è svegliaa e l’ha daa l’allarme. I lader eren poeu scappaa cont on camionsin intercettaa a l’altèzza de Lomazz pòchi chilometri pussee avanti.
Londra: in mèzz milion lassen a cà l’automòbil Dopo on ann de l’introduzion del pedagg nel centro de Londra, pressapòcch mèzz milion de persònn l’ha lassaa perd l’auto per ciappà i mèzz pubblicch. Da on ann i automobilisti londines paghen defatt 5 sterlin “ 7 euro” per andà denter nel coeur de la città dai 7 or ai 18.30. passaa stì primm dodes mes, s’è tracciaa on bilanc da i tòni on poo ciar on poo scur. Grand’uffizzi, banch e compagnii hinn favorevol a l’iniziativa, menter negoziant e ristorador se lamenten per on calo de la clientela ( magari se sbassen i prèzzi l’aumenta anmò).	A dormì tròpp fà mal e el scurta la vita Dormì de men ò pussee de sètt or e mèzz el faria mal a la salut e se scamparia anca de men. Quèsta la sorprendenta conclusion sora i effètt negativ per la salut dovuu minga soll a la mancanza de sògn (stì dati eren gemò conossuu), ma anca a on eccèss de ripòs, quèst a l’è on studi faa in Giappon che l’ha esaminaaa el dormì de 100.000 persònn. Stà ricerca l’è stada fada a l’università de Nagoya. (gh’hann temp e voeuja de trà via).
Blitz contra la manodòpera clandestina cines Ròma. Manodòpera cines clandestina, in pussee de 100 laboratòri tèssil, de pelletteria, oggettistica e attività commerciai. La polizia in collaborazion con la Dia, l’ha compii perquisizion in Lombardia, Veneto, Emilia Romagna, Toscana, Lazio, Sardègna e Campania, e l’ha scopèrt òmen e dònn ch’eren costrètt a lavorà in condizion precari. L’obiettiv de l’operazion l’è staa quèll de individuà infiltrazion de la criminalità organizzada de matris cinesa sul territori italian. Inoltre s’è cercaa de colpì l’attività che rappresenta la principal font de guadagn per l’organizzazion ossia el sfruttament in negher di immigraa clandestin ch’hinn costrètt a lavorà in condizion disuman.	l’è staa scopèrt on gene ch’el rigenera i òss L’è staa scopert da on giovin ricercador italian, Enrico Pola, on gene che l’è bon de rigenerà i òss indebolii da l’osteoporosi. El gene che se ciama LMP-3 (Lim Mineralizator Protein 3) e che l’è on controllor important del svilupp di òss in quant el saria bon de stimolà tucc i cellul mader del tessuu osseo. L.M.P-3 l’è donca bon de rigenerà i òss danneggiaa in frattur vertebrai e de rimedià ai falliment di pròtes all’anca.
Salvaa in montagna, poeu se ven a savè che l’è on bracconier On bracconier precipitaa in ona scarpata l’è staa salvaa dal Soccors Alpin e poeu denunciaa, l’era finii in on burron per scappà ai guardiacaccia. L’òmm che l’aveva daa l’allarme cont el telefonin el sostegniva de vessèss perduu dopo on incident de montagna, l’era finii in del burron profond circa 200 meter, dòpo s’è scopert che L. M. de 49 ann resident a Buglio in Monte (Sondrio) in realtà l’era on bracconier con tant de s’ciòpp.	L’è rivaa el pan biotech tolleraa dai celiaci Ròma, l’è staa sfornaa el pan biotech tolleraa anca da gent che la gh’ha el mòrb celiaco e quindi hinn intollerant al glutin. A creall hinn staa ricercador de l’università de Bari e Napoli (poeu disen che fann mai nient), che hann utilizzaa ona biotecnologia tradizional che la preved l’uso de lievit natural selezionaa e 24 or de fermentazion. I michètt faa a stà manera gh’hann valor nutrizionai e organolettich superior a quei pan speciali attualment in commercio.
5 euro de tassa per ògni ora de laô, ses arrèst Ona banda Aspecializzada nel fà vegnì chì immigraa da la Polonia e da la Romania l’è stada sgominada dai Carabinier de Potenza. Ses i persònn arrestaa con l’accusa de associazion per delinquere finalizzada a l’immigrazion clandestina. Stì immigraa eren costrètt a pagà ona tassa de cinqu euro per ògni ora de laô che faseven. I Carabinier hann interrott ona riunion in la quale i ses (tucc stranier regolarizzaa) eren a dree pianificà di noeuv attività.	Pubblicità 50 ann de mama RAI sòtta forma de sògn Milan, se numm italian in di ultim 50 ann sèmm diventaa quèll che sèmm gh’èmm de ringrazià i sògn che la pubblicità televisiva l’ha lassaa denter de numm. Questa considerazion la nass dal desideri de celebrà i cinquant’ann de la RAI, ona mostra che per l’appont l’ha gh’ha sto titol “ Dreams “ alestida a la Triennal de Milan . i “Dreams “ in milanes “ Sògn” hinn quei lassaa a numm italian da i vari messagg pubblicitari dal Calimero a la particèlla de sòdi in deperlee che la gira in ona bottiglia. Mì soo nò se ne pensii vialter a mì la me par ona gran stupidada.
El guida cont on squalo taccaa a ona gamba Australia, Om òmen attaccaa da on squalo intanta ch’el noava, l’ha guidaa la macchina in cerca d’aiutt con l’animal anmò taccaa a ona gamba. Luke Tresoglavic intanta che l’era in l’acqua a fà el bagn a Lake Macquarie, 110 km. a nòrd de Sydney l’è staa sgagnaa da on squalo long 60 cm. de la specie wobbegong; dòpo de chè la bèstia el mollava minga la presa, l’òmm la guidaa fin a on club de bagnin che in riessii a staccall cont ona pompa che la spruzzava acqua dolza. El malcapitata se l’è cavada cont on taj.	I nas multen trii sindich nel milanes Trii sindich, de Comun chì nel Milanes hinn staa multaa dai Carabinier del Nas per minga avè dispòst l’esposizion in di locai pubblich de soa competenza i cartei cont el diviètt de fumà. L’ha comunicaa el Comand di Carabinier per la Sanità de Milan, hann anca precisaa che i contravvenzion hinn staa daa ai sindich di comun de Vaprio d’Adda, Inzagh, e Pozzoeu Martesana.