Sit de coltura e attualità
 in lengua milanesa		 Invia i tuoi messaggi a:
info@elmilanes.com








El risparmi gestii conven ancamò?

Dopo i ultimm scandol finanziari de la Parmalat, de la Cirio e de la Finmatica, la fiducia de la gent vers la finanza l’è rivada ai minim stòrich.  El risparmiador ved che brutta fin pòden fà i sò sudaa danee el se demoralizza el se fida pù de nissun.  D’altra part, però, i banch ruzzen semper pussè el risparmi gestii, perché l’è convenient (per lor!!) dal moment che la banca la guadagna cont i commission de gestion.  L’è facil, allora, che quand se và in banca a domandà on consili per on investiment (anca se in sto period chì ghe n’è pussee de fass imprestà che d’investì) ghe vegna propòst on investiment in fond comun, ò ona gestion patrimonial, perché el funzionari ò el consulent ghe disen che l’è ona forma d’investiment convenienta.

Ma el sarà poeu vera? Minga semper, prima de tutt investiment sicur ghe n’è minga, nanca i Bot, perché l’è assee on ciccinin d’inflazion e anca i Bot finissen de dà on rendiment pussee bass del cost de la vita. In ch’el caso chì el valor del risparmi se perd.

Qualsiasi tipo d’investiment, per fruttà, el gh’ha bisògn de vèss adeguaa ai bisògn de l’investidor. Perciò chì gh’ha de comprà la cà dopo pòcch mes l’è inutil che se impègna in on investiment longh, perché ò el ritarda el rògit de la cà ò el dovrà pagà i commission per vende el so investiment, per fala brev te ghe de pagà quand te compret te ghe de pagà quand te vendet, capii!!!  Gioann!!!!!

Quindi la prima regola l’è de capì qual è la scadenza giusta, la seconda l’è de decid quant s’è dispòst a ris’cià.  Per guadagnà bisogna ris’cià, ma minga semper numm podom ris’cià, mai fass illusion su facil guadagn, questa l’è la regola principal.

I fond azionari hinn i pussee ris’cios, la borsa la cambia de valor da on dì all’alter, in on ann la pò rend anca el 40%, ma l’ann dopo la pò fatt perd tutt quèll che te guadagnaa, perciò se te penset de faghela minga a sopportà tutti stì cambiament lassa perd ò investiss pòcch in azion.

Altra regola d’òra cerca de seguì pussee che te podet i tò danee come te vedet che l’è dree andà mal cambiel subit, senza spettà ch’el se riprend, in borsa sperà voeur dì perd.

Chì l’è bon de seguì stì regoll poeu cimentass cont el risparmi gestii, però l’important l’è fidass mai de nient e de nessun e stà semper attent a quèll che succed.

Dagh minga traa, quand i ròbb se metten mal, de stà lì a spettà quand te disen che ghe voeur cinch ò ses ann scappa subit;  tì rispondegh come diceva Keynes vunn di massimm economisti “ in on longh period a sèmm tucc mòrt “.