Sit de coltura e attualità
 in lengua milanesa		 Invia i tuoi messaggi a:
info@elmilanes.com

on regòrd del Peppin Prisco...
el pussee amaa di Interista (ma minga domà di Interista...)

El 10 de Dicember del 2001. L’è ona Domènega come on’altra quand, a la trasmission Controcampo, el vegn presentaa on òspit cognossuu de tucc: el Peppino Prisco, che el compiss 80 ann.
L’ “Avocatt” a l’è in pièna forma: el rid, el schèrsa, el fa i sò tradisionai provocasion pien de simpatia, el rattèlla ridend cont on alter avocatt, el Vittorio Chiusano, president de la Juventus, che el lassarà ‘sto mond on poo de mes pussee tardi. On Prisco in pièna forma, a quèsta fèsta de compleamus che la se seguiss in miara e miara de television. Duu dì dòpo, el 12 de Dicember, l’ “Avocatt” el moriva, serenament. Ai funerai, tanti tifos interista, ma anca on bel poo de sostenidor milanista. Già, perchè, se per i negher-bloeu el Prisco l’era on sìmbol vivent, el primm tifos, el vicepresident inossidàbil, per i ross-e-negher l’era l’avversari implacàbil, l’antimilanista doc, quèll che el se vantava de ‘vègh nanca on milanista in famiglia e, naturalment, quèll de ciappà in gir tutti i vòlt che el Milan el vinceva o l’Inter la perdeva. Ma on avversari che... guai a ‘vèghel nò.
El Peppin l’era nassuu a Milan in del 1921, e l’era (olter che el pussee cognossuu tifos de la Beneamata) anca vun di pussee important penalista milanes, e el president de l’Órdin per tanti ann. E l’era anca on Alpin de la Julia. On alpin che l’aveva faa la ritirada de Russia: vun di 3 officiai soravivuu a la tragedia di giass (su 53), premiaa con la Medaja d’argent al valor militar. Ona vita dividuda in trii, insòma: el lavorà de avocatt penalista, i Alpitt e l’Inter. E hinn ligaa al fòlball i tanti, tanti moeud de dì irònich, i tanti spìrit che hinn giamò diventaa ona leggenda. Ona selesion? Te la chì. Dedicaa al Milan: «El Milan l’è finii in Serie B dò vòlt: voeuna pagand, l’altra a gratis». Dedicaa a la Juventus: «El rigor negaa (al Ronaldo, ndr) in del Juventus-Inter in del mes de April del 1998 l’è staa pròppi nò on robalissi. In realtà, l’è stada ona ricettasion». Dedicaa al Turin: «Vialter del Turin gh’avii giamò on mérit in partensa: quèll de giugà el derby con la Juventus». Dedicaa a l’Inter: «Mi voo nanca del cardiòlogh che, tra parentesi, el me costa car. A l’è assee, e el me avansa, andà a vidè l’Inter».
E, per finì, on spirit… dedicaa al Prisco. Quèll che l’è succeduu prima: in la Coppa di Campion 1971-72, l’Inter l’è impegnada in cà del Borussia Mönchengladbach. La squadra del Netser e compagnia la stravinc: 7-1. Ma, in sul 2-1, ona bottigliètta la colpiss el Boninsegna, che el va foeura del camp. L’Inter la fa ricors e, difenduda de l’avocatt Prisco, la rièss a fà annullà e giugà anmò la partida. El spìrit (on poo inrabii) di giornai todèsch: «El difensor pussee bravo de l’Inter l’è staa l’avocatt Prisco, che l’è riussii a... tirà foeura de la pòrta 7 gòl!». Per la crònaca, cont on 4-2 in cà e on 0-0 in trasfèrta, l’Inter la andarà innanz, e la rivarà fin a la final, perduda contra l’Ajax per 2-0...