Sit de coltura e attualità
in lengua milanesa		 Invia i tuoi messaggi a:
info@elmilanes.com





















I rappòrt privilegiaa cont
el fòlber e el spòrt in general  del Pierluigi Crola

Disen che semm tucc italian e, almen formalment, me par che se pòda minga affermà el contrari; ma in la realtà semm sicur che l’è pròppi inscì?
Lassemm bui la stòria official, che spess l’è tutta ona gran balla, e demm domà on’oggiada ai fatti, ò mèj, a certi fenomeni, in apparenza secondari, e capiremm come anca in di ciallad, quell che disi l’è vera.
Me riferissi a trii fatti che hinn capitaa recentement (al massim on para de ann fa) e che riguarden el mond del fòlber e del spòrt in general.

1. in sti dì chì quasi tutt el governo l’è ‘dree a pensà de fà on decrett “salva-dèbit” per quei società che hann cercaa de vess pussee scròcch e de pagà minga i bollitt e, in tanti casi, anca i stipendi di giugador. El minìster di affari sociai, el Maron, l’è contrari a sto provvediment; el vice president e el president del consili, inveci, come del rest la maggioranza del governo, disen che sta misura chì l’è necessaria perchè el fòlber l’è anca ona quistion social, gh’è el ris’c che, se metten foeura del gioeugh certi squader, podaria vessigh ona rivoluzion. A prima vista, sti considerazion podarien parè giudizios, ma se se fermom a pensagh on poo a sora, allora la rispòsta la ven foeura, ciara e netta, da quatter domand:

a. perchè quell che var per Lazio e Ròma e per tanti alter società, el var minga per la Fiorentina? I dò squader roman gh’hann dèbit per pussee de 500 miliard e seguten a vess in serie A, la Fiorentina, che l’era caregada de dèbit molto pussee inferior, l’è andada drizza ‘me el fus in serie C2 (trii basei sòtta), e poeu l’è stada ripescada in serie B (per salvà el Catania, la Salernitana, el Genoa, el Napoli e el Venezia);

b. perchè i princippi hinn meno important di ricatt sociai? Allora l’Agnelli, domà perchè l’è important el pò fà quell ch’el voeur, se de nò el cascia via a pesciad on bordell de gent?

c. perchè ona regola la var domà per i “dimension” e minga per la bontà de l’idea?
L’è minga sbaglià robà, l’è sbaglià fall se te seet piscinin, perchè te paghet anca per i grand, che la fann semper franca, pròppi come a militar e, in general, in tutta la società;

d. perchè se cunten sù di ball, disendo che bisògna salvà prima de tutt la funzion social e educativa del spòrt, quand, inveci, el motiv l’è soratutt econòmich?
Se salta el mond del fòlber, salta la schedina e donca salten anca on bordell de danee per el Stat. Perchè l’è pròppi quest el sciroeu del problèma: se l’è giust che tucc gh’hann de rispettà i régol e se sbaglien gh’hann de pagà, l’è anca vera che lè minga giust che se vun el guadagna 100 el ghe vegn in saccoccia domà 30 (su ògni 100 franc de schedina, 30 vann al Stat, 30 al CONI, 8 ai tabacchee che la venden e domà 32 ai società de fòlber, che hinn i veri protagonista di pronòstich).

2. el 21 de marz el se saria dovuu giugà el derby Lazio - Ròma, ona partida importanta tra i dò squader pussee “cicciaraa” del moment. La partita l’è stada sospesa per volontà di giugador e per minacc de on quai brutt lavativ d’on randa, domà per ona notizia falsa de on fiolett coppaa da la polizia. Per fatti pussee gravi (38 mòrt prima de la final de la Coppa pussee prestigiosa in del 1985 in Belgio tra el Liverpool e la Juventus, 200 mòrt per i bomb di mussulmani in Spagna el 21 de marz de quest ann) i partid hinn staa giugaa istess, inveci, per la stupidità di spettador e la debolezza (anca se saria mej dì “complicità general” per fà pression sul governo per approvà el decrett “salva-dèbit”) la partida l’è stada interròtta on para de minutt dòpo l’inizzi del second temp (inscì el bigliett el gh’ha minga de vess rimborsaa!!) e probabilment la sarà ripetuda. On paes seri, al contrari, l’avaria faa ona bella ròba: se saria giugaa la partida normalment, se i tifos de ona squadra invadeven el camp quella squadra la saria stada penalizzada, se l’era minga assee, la stessa squadra l’avaria giugaa i partid fina a la fin del campionaa senza pubblich e se saria staa minga ancamò assee, assenza per cinq ann da tutti i gar internazionai. In Inghilterra hann faa inscì e quei che eren consideraa tra i tifos pussee violent del mond hinn diventaa di beritt. Chì, inveci, in la repubblica di banann tiraremm giò i bragh denanz a l’impertinenza de quatter cafù!

3. la gran considerazion che gh’è per el Nòrd l’è ona ròba che la fa commoeuv: on para de ann fa, in agost, in 20 dì emm vist, a la television, 7 partid, nanca tanto important, de la Ròma, e naturalment, ona squadra lombarda, el Brescia, ch’el giugava ona final per andà in Euròpa (l’Intertòto), l’è stada vista sì in television, ma cont “el binòcol” (che in italian voeur dì che la gh’è stada minga). Se poeu passom a alter spòrt, la solfa l’è la stessa: la coppa del mond de sci, l’è scomparsa per tanto temp da la television, e el campionaa mondial per club de l’hockey (dove la squadra de Milan l’è rivada seconda) e tutt i partid de campionaa, se veden minga e, de soramaross, i risultaa vegnen nanca scrivuu in sul televideo!

E disi pù nagòtt se de nò me querelen! In compens, i conclusion e i maledizion je lassi a vialter!