Sit de coltura e attualità
 in lengua milanesa		 Invia i tuoi messaggi a:
info@elmilanes.com











CARNEVAL AMBROSIAN
ona tradizion millenaria

El carneval Ambrosian, come el sann tutt’i milanes, continoa con la tradizion de prolongà per alter quatter dì dopo el mercoldì de la scendra.
I primm testimonianz, de quèsta tradizion tipicament ambrosiana, hinn nientemen che dal temp de Sant’Ambroeus che sebben el fudèss contrari al proseguiment de stì dì de fèsta, l’è minga staa bon de fà cessà stà abitudin che oramai la s’era consolidada in la popolazion.
El gh’ha provaa anca el Ludovich el Mòro, ma senza nissun succèss, anzi a favor del
prolongament da trentases dì quaranta dì s’eren dichiaraa anca tanti studios de teologia del medioev, sostegneven che bisognava rispettà la volontà de la Gesa che all’inizzi di ann mila, l’indicava in quaranta dì el temp quaresimal pari ai dì trascors dal Signor nel desert a digiun.
Anca San Carlo mal digeriva i quatter dì d’ulterior fèst e la tentaa de oppones a tal scòpo l’aveva istituii noven, preghier, ma contra el Vescov s’eren organizzaa di manifestazion de piazza con la partecipazion minga domà di popolan, ma anca di nobil.
Addirittura a Ròma eren staa spedii duu messagger dal Papa per perorà la causa di stì dì in pù, ma quèsti eren tornaa senza avè ottegnuu nagòtt.
S’è andaa avanti inscì per tanti ann, tra mediazion e compromèss, nanca i spagnoeu hinn staa bon de cancellà stì quatter dì, sebben gh’avessen come attenuant la pèste, la volontà de la gent l’è riessida semper a vègg la mej.
La fòrza del popol e la voja de volèss divertì superaren qualsiasi ostacol, tant che ancamò incoeu el Carneval Ambrosian el termina quatter dì dopo quèll tradizional roman.
I mascher de Milan
MENEGHIN: l’è nassuu in del sescent come personagg di commedi del Carlo Maria Maggi el pòrta on tricòrna, on cappèll con trè pont, la perrucca cont on coin, ona giacchètta longa de color ròss e marron, i calzon in scima ai genoeugg verd e in fond di calzètt a righ ròss e bianch.
Sòtta la giacca el gh’ha ona camisa gialda cont i bòrd de pizz e on fazzolètt intorna al còll. I scarp hinn marron, con la fibbia davanti come se usava ona vòlta.
CECCA: l’arriva pussee tardi e in còppia con Meneghin, la rappresentava, fin a 50 ann fà, el portafortuna di cà milanes.
Sia Meneghin che la Cècca hinn la personificazion di mascher milanes semper pront e attent a rispond ai domand spiritos, in manera de creà intorna a lor gioia e divertiment.