Sit de coltura e attualità
in lengua milanesa		 Invia i tuoi messaggi a:
info@elmilanes.com





Trè dispens de letteradura milanesa
del Stefano Sportelli, articol del 2004

Pierluigi Cròla l’ha condensaa, per cunt de l’Antiga Credenza de Sant Ambroeus, in trè bellissim dispens on cors de letteradura milanesa che l’ha seguii con estrèma attenzion e che l’ha vorsuu ricapitolà in trii fascicol “sostanzios”, indove l’ha mettuu in evidenza i passagg principai su la nascita e el svilupp de la lingua e letteradura milanesa.
In pratica, el Cròla el fà conoss ai lettor interessaa a la soa milanesità, el dialett che l’ha cominciaa a ‘vegh ona soa forma e ona soa struttura fina dal 1200, grazie ai document lassaa da Pietro da Barsegapè e da Bonvesin dra Riva.
El primm autor, discendent da on’antiga nòbil famiglia lombarda,l’ha creaa ona voluminosa òpera enciclopedica costituida da dodesmila vers, basada su episòdi de stòria sacra, contaa sù cont on stil fantasios e comment ingenov.
El second autor, inveci, l’era on maester de grammatica e l’insegnava letter latin e volgar. El s’è daa de fà per formà ona lingua comun, on “volgar padan”, esigenza de comunicazion fondamental per i traffici numeros e i passagg di mercant, che attraversaven la pianura padana per fà vedè i sò mercanzii e per comprann di alter; el sò “volgar padan” l’era on mismasc di dialett locai, milanes, veneti e emilian doperaa dai mercant.
El Cròla, donca, el tacca da sti primm autor, consideraa i antenaa de la lingua e letteradura milanesa, e, a travers on’analisi e on’antologia de tutti i alter autor che hinn vegnuu dòpo a comincià pròppi dal 1200 fina al dì d’incoeu, e che hann lassaa a nun on badalucch de testimonianz scritt, l’è staa bon de seguì on percors talment linear e sempliz, che la lettura la se fà in d’on boff , perchè la te tira denter on bordell.
I pagin se sfoeujen cont ona certa curiosità, anca se hinn domà dispens, che però riessen a fà vegnì la voeuja de scoprì come la lingua local l’è cambiada in di ann e in di sècol, a travers i different dominazion che hann “mandaa sòttsora” la Lombardia e tutti i modifich linguistich che hinn derivaa.
In la seconda dispensa el Cròla l’analizza con maggior precision e approfondiment i diversi autor, a comincià da la Battalia de Benevent (1266) fina al dì d’incoeu, riportando brani, testi, poesii, comment, inscì come hinn staa “partorii” dai sò autor. De soramaròss, el Cròla el fà ona sommaria descrizion de la vita, di studi, di attività di autor, come hinn diventaa important, come hann portaa avanti la soa “dialettalità” in d’on mondo e in d’on period che privilegiava i lingu di Stati, come el frances, l’ingles, el spagnoeu, l’italian.
On’oggiada particolar el Cròla le da anca a la letteradura milanesa, dal 1848 a la fin del ‘900, època de Emilio De Marchi, Carlo Bertolazzi, Giovanni Barrella, Luigi Medici e Delio Tessa, per rivà a Carlo Emilio Gadda, domà per citann on queivun.
El terz volumm, che l’è el pussee sostanzios, l’è ona ricerca de la produzion letteraria minor del ‘900 con riferiment biografich quasi unich. El merit de l’autor l’è staa quell d’avè ritrovaa cont ona pazienza de Giòbb, test, poesii, brani, testimonianz, ormai quasi scompars, a travers ona ricerca de certosin in di vari Circol, su test pien de polver di vegg bibliotecch, de testimonianz daa a vos da vegg e savi personagg de la vita e de la coltura milanesa.
On lettor attent el podarà senza dubbi trovà in sti pagin chì on quaicòss de sò, che l’ha compagnaa fina da la giovinezza, quand Milan l’era anmò attraenta, paesana, pussee calda e meno caòtica e “foresta”, come purtròpp l’è incoeu.
Troeuvom in di volumm poesii de Marzagalli, de Amietta, de Lauzi, de Cavenago, de Candiani e de tanti alter che lassom a la scoperta del lettor. Sti poetta moderni, tanti ancamò al mond, hann lassaa on segn molto fòrt che incoeu l’è quasi on dover seguì.

Al Cròla ghe femm i compliment pussee esageraa per el lavora che l’ha faa, per la pazienza ch’el gh’ha avuu a mett tusscòss insèma, per avè recuperaa brani ormai scompars.