Sit de coltura e attualità
in lengua milanesa		 Invia i tuoi messaggi a:
info@elmilanes.com












Stòri de ringhera

“Quand Milan l’era Milan, Milanin piscinin, coi palazz e i sò giardin, moresin, verdesin, coi navili e i sò barcon, lumagon, buseccon, coi carròzz e i biroccin!”, inscì la diseva ona famosa canzon del grand Walter Valdi, vun di pussee important artista milanes.

Minga on nostalgich voltass indree ai bei temp passaa, ma ona attenta riflession sui valor de on temp che al dì d’incoeu paren scompars, come l’aveva giamò scrivuu el De Marchi in del sò capp d’òpera Milanin Milanon.

Renato Colombo cont el sò volumm Stòri de ringhera el par andà adree al stess schèma.

E le fa minga esaltando la bellezza di cà de ringhera, ma scrivendo poesii che parlen soratutt de l’attualità del dì d’incoeu, descrivendo minga domà avveniment, ma dando anca giudizzi de valor sui fatti di nòster tempi: come quand el parla de George Floyd, quell fioeu negher, coppaa ingiustament da polee bianch. El scriv el Renato: “Anca el pussee criminal di òmm / va trattaa m’el fudess on galantòmm”, testimondiando on nòbil garantismo che l’è minga de tucc.

Troeuvom anca paròll de comprension per Willi Monteiro Duarte, quell sudamerican piccaa a mòrt da assassin senza scrupol: i inquilitt hinn cambiaa, ma el spirit di cà de ringhera, formaa da milanes pront a ricev chi ven da foeura, ona vòlta da la bassa Italia, incoeu da paes pussee lontan, l’è semper el medèmm.

Cambien i latitudin, ma i milanes hinn minga cambiaa. Come l’è minga cambiaa el desideri de condanà i angarii subii dal pòpol, da qualsesia pòpol, come mirabilment l’accusava el nòst Carlin pussee de dusent ann fa.

Manchen nò riferiment a la politica, anca se vist da ona certa angolazion. Manchen nanca moment de vera poesia (Primavera, Autunn in del bosch, Cavei bianch). L’è on liber che senza dubbi gh’emm de leg, perchè denter lì pòdom ritrovà i nòster valor pussee s’ciasser.

E con nòster voeuri dì lombard.

Pierluigi Crola