Sit de coltura e attualità
in lengua milanesa		 Invia i tuoi messaggi a:
info@elmilanes.com

Stelle rosse a Milano

Articol del 2005, del Stefano Sportelli

La descrizion di Cinch Giornad de Milan, con testimonianz e aneddot che tanti rivisitazion hann tasuu e, minga conossuu ai appassionaa de stà epoca Risorgimental che l’haa portaa a l’unificazion de l’Italia.

Roberto Villa l’haa vorsuu trasmètt sora i pagin del sò liber, minga documentazion stòrich conossuu da tucc, ma domà la soa passion, per ona vòlta, dà risalt e importanza a quei figur sconossuu, umil e popolar che hann daa tanto a la rivòlta contra i tognitt.
L’ha lassaa de part, i sòlit “noti”, quei personagg che per tanti ann hann impienii i liber de stòria, ma l’ha daa spazzi al bagatt, al prestinee, al tappezzee, al sacrestan a tucc chì figur popolar che in chì dì, con impètt, con passion, con ideai fòrt, hann impienii i strad, i vicol, i strecc d’ona città che da tanti ann la subiva i prepotenz d’on stranier che la dominava, de spèss anca con feròcia e senza libertà.
Il liber l’è divis in dò part: la prima la và dal 4 settember 1847 quand Milan l’era in fèsta per l’arriv del noeuv Arcivescov, monsignor Bartolomee Romilli, e attravers discors e inconter de patriòtt, scritt in dialètt meneghin, che organizzaven la sommòssa e aspettaven el dì de la riscòssa.
Conossom inscì el Ceccot, el Carloeu, el Tognèlla, el Pierin e tanti alter personagg minor, de la Milan che la lavorava e la sgobbava, di persòmm pover e sfruttaa da ona class sciora e dominatris, tucc intent a organizzà quaicòss che i avaria faa diventà protagònisti in la stòria, ma che sarien per semper restaa in del silenzi pussee complètt in di liber de stòria che hinn semper pront a esaltà i nòmm, i personagg i persònn illuster.
La seconda part la conta sù i fatt e i avveniment de la battalia contra i todèsch e, la ghe fa conoss la Milan de la metà del vòtt cent, i strad, i rion, i bottegh che appartegniven ai combattent ai amis e a tucc quei che credeven fortement in la rivòlta contra i oppressor.
On liber che l’è nò domà ona documentazion stòrica, ma anca on spaccaa de la vita de tutti i dì. Se legg volentera, de facil interpretazion, che te ciappa e che ògni milanes e minga, dovaria veghel in la pròppia bibliotècca.