Sit de coltura e attualità
in lengua milanesa		 Invia i tuoi messaggi a:
info@elmilanes.com




Sant Ambroeus, Orazion in dialet Milanes,

Articol del 2005, del Stefano Sportelli

Tradù Sant Ambroeus in dialètt milanes. Sta idea del segrates Sergio Domenico Marni, guidaa in de la traduzion dal ‘maester’ Cesare Comoletti, l’è ona novità. Nissun el gh’aveva mai pensaa, eppur se parla milanes da pussee de mèzz millènni - anca se semper men - , e se conossen i test de Sant Ambroeus da pussee de 1600 ann. La sta pròppi chì la creatività del liber: mett insèma, senza mètt nagòtta, dò tradizion che - purtròpp - hinn ‘dree a sparì.
Quanti cristian (de Milán ò minga de Milán) e quanti milanes (cristian ò minga cristian) hann mai legiuu on test de Sant Ambroeus? Eppur, tutt duu, podarien conoss on ciccinin pussee la pròpria radis. El “numm ve slongarèmm la man” a l’ombra de la Madonina de D’Anzi el nass da l’orazion del patron de Milán, ch’el domanda: “Anmò ona vòlta, ò Pader, tend i tò man per accettà el pòver” e dal coeur di cristian de ier e d’incoeu che hann seguii l’esempi. La nòstra esperienza present la gh’ha i sò radis in de la tradizion de la Gesa de Sant Ambroeus. Per amà de bon el nòster present, gh’èmm de riscoprì el nòster passaa; se de nò el nòster present el saria tròpp fragil e impotent contra i attacch di different ideologii del mond. Gh’èmm ammirazion per Sant Ambroeus: per la coscenza de la fed come compiment de ògni cultura umana; per l’amor a la Gesa come sit de l’autentica libertà e, donca, per la responsablità de difend la libertà de la Gesa (e d’ògni òmm), contra l’attacch de ògni poter.
El test del Marni, on tascabil, el gh’ha 65 orazion cattaa foeura da l’immensa Opera Omnia da Mons. Inos Biffi. Hinn curt e nassen dal coeur del sant, con semplicità. El Marni l’ha ricevuu dal Patriarca de Venezia ona lettera ciara e pièna de stima: “Egregio Dottore, Le sono grato per l’originale pubblicazione che traduce talune preghiere di Sant’Ambrogio nel dialetto milanese, stuzzicando così la lettura dei testi del Patrono di Milano”.
Sto liber l’è ona sfida: el pò vegnì on quaicòss de bon dal milanes, dai pòcch che le parlen anmò e dai giovin che voeuren imparall? Per scoprill, l’è possibil leg sti orazion de Sant Ambroeus in milanes (e scoprì anmò anca lù).
El liber (edizion de la CUSL) l’è in vendita a la Libreria Milanese, Via Meravigli 18, Milano; Libreria ‘Parole Nuove’, via Kennedy, Brugherio (denter al center commercial); Libreria ‘Cooperativa Fausta Restelli’, Piazza San Vittore 5, Rho. L’è possibil anca visità el sit www.cusl.it, oppur invià ona mail a marina@cusl.it - (tel. 02/45472229).