Sit de coltura e attualità
in lengua milanesa		 Invia i tuoi messaggi a:
info@elmilanes.com











































VOLONTARI DE LA PROTEZION CIVIL de la Emanuela Cancellieri
El volontariaa de la Protezion Civil l’è diventaa in di ultim ann on fenòmeno nazional che l’ha portaa a caratter de partecipazion e de organizzazion particolarment significativ.

I primm mobilitazion de ona certa importanza de la gent comun, de cittadin de ògni età e condizion social cors de volada a miara da tutti i canton del paes in di zòn danneggiaa per mettes a disposizion e “dà ona man”, hinn cominciaa sòtta la spinta di grand emergenz capitaa in Italia a partì da l’alluvion de Firenze del 1966 fina ai terremòtt del Friuli e de l’Irpinia.
In sti occasion s’è scopert che quell che mancava l’era nò la solidarietà de la gent, ma puttòst on sistèma pubblich organizzaa ch’el fudess in grado de impiegà e valorizzà la generosità di “volontari”.
Dòpo el terremòtt de l’Irpinia el President Sandro Pertini, con l’onestà intellettual che le caratterizzava, l’ha denunciaa, rivolgendos a la Nazion, l’irresponsabilità, l’inerzia, i ritard de ona Pubblica Amministrazion disorganizzada e minga bòna de portà soccors con la prontezza che ghe voreva in quella disgrazia. El President l’ha rivòlt on appell ai italian, con sti paròll:
“Voeuri rivòlg anca a vialter Italian on appell, senza enfasi, ch’el ven foeura dal mè coeur...., chì gh’entra nient la politica, chì gh’entra la solidarietà umana, tutti i Italiani gh’hann de sentiss mobilitaa per andà in soccors de sti fradei colpii da sta disgrazia”.
Paròll che hann piantaa, in del nòster paes, la semenza de ona “coltura” de la Protezion Civil e hann daa l’inviada a ona pianificazion organica del sistèma del volontariaa come espression de ona moderna coscenza collettiva del dover de la solidarietà, indove se mes’cen spint de natura religiosa e laica, che gh’hann in comun la volontà de soccorr chi gh’ha bisògn e de affermà al stess temp el diritto de vess soccors con la professionalità de ògni volontari e con l’amor che tutti i volontari dimostren quand scernissen, spontaneament e a gratis de vuttà tucc quei che gh’hann bisògn de lor.
In di ultim des ann, ona legislazion saggia l’ha riconossuu la fonzion di associazion de volontariaa e di grupp comunai de Protezion Civil, come espression de solidarietà, partecipazion e pluralismo, ne ha incoraggiaa e sostegnuu sia la coltura che el svilupp organizzativ. De fatt, quand, in del 1992, l’è staa istituii el Servizzi Nazional de la Protezion Civil, l’è stada espressament riconossuda, anca ai organizzazion de volontariaa, la fonzion de “struttura operativa nazional”, part integrant donca del sistèma pubblich, compagn di alter component istituzional, come el Còrp nazional di Pompier, i Fòrz Armaa, i Fòrz de Polizia, el Còrp forestal statal, ecc.
Sta fonzion innovativa, coraggiosament riconossuda al volontariaa, sia dal Dipartimento de la Protezion Civil che da la Presidenza del Consili di Minister, e l’attenzion sistematica a redù al minim i “barrier” burocratich tra volontariaa e Stato central l’ha contribuii a fà nass on’identità nazional del volontariaa de Protezion Civil, che la s’è rivelada de fondamental importanza in di emergenz seri di ultim ann, e che adess se voeur ricreà, a l’interno di autonomii locai a comincià dai comun, dove la Protezion Civil l’è indicada come servizzi fondamental compagn de quell di Provinc, che gh’hann la fonzion de coordinament cont i Region.
Region e Provinc gh’hann come obiettiv, insèma ai Associazion de volontariaa de Protezion Civil, de creà in ògni territòri on servizzi de pronta rispòsta ai esigenz de la Protezion Civil, bon de operà integrandos, in cas de necessità, cont i alter livèi de intervent previst in l’organizzazion del sistèma nazional de la Protezion Civil ma in tutti i maner bon de dà ona prima rispòsta fondamental ai cittadin in cas de calamità, attivando subit i pròpri struttur, e soratutt individoando ògni comun fattor de ris’c e strategii de difesa e soccors.
I organizzazion de volontariaa che intenden collaborà in del sistèma pubblich de Protezion Civile, gh’hann de iscrives in register, regionai e nazionai creaa per l’occasion. Al moment, in l’elench nazional del Dipartiment de la Protezion Civil hinn iscritt circa dòmilacinqucent organizzazion, e tra quei gh’hinn i “grupp comunai” nassuu in certi region italian, per on total de pussee de on milion e tresentmila volontari disponibil. Tra questi, circa sessantamila hinn pront a intervegnì in del gir de pòcch minutt sul sò territòri, inveci circa tresentmila hinn pront a intervegnì in del gir de ona quai ora.
Se tratta de associazion a caratter nazional e de associazion locai, coordinaa tra de lor sul territòri de comun, provinc e region, in manera de formà, in cas de necessità, on’unica struttura de facil e rapida mobilitazion. La Region Lombardia, per esempi, l’ha da pòcch istituii ona soa “colònna de protezion civil”, del tutt autosufficiente sia sul pian logistich che per dotazion de materiai de pront intervent, bòna de mobilitass e de rivà in sul sit de l’emergenza in del gir de ona quai ora.
A l’interno di organizzazion de volontariaa se troeuveno tutti i professionalità e i mestee de la società civil: sto miscmasc l’è ona gran risorsa, sia per el numer che per la qualità, fondamental soratutt in di emergenz pussee seri, quand el success di intervent el dipend da l’union de tanti specializzazion different (dai dottor ai ingegnee, dai infermer ai elettricista, dai coeugh ai legnamee).
Certi organizzazion hann scernii la strada de ona alta e tipica specializzazion, come i grupp che lavoren con i can e quei che vann sòtt’acqua, i grupp de radioamador, quei che vann sòtta terra ò in di gròtt, el volontariaa per combatt i incendi in di bosch, oppur, a seconda di realtà locai, s’hinn specializzaa per fà front a emergenz particolar, come, per esempi, el comitaa ch’el mett insèma on poo de comun de la Provincia de Milan cla s’è specializzada in del soccors in cas de ris’c idrogeològich.
La fonzion insostituibil che la gh’ha incoeu el volontariaa de Protezion Civil, cont el sò dover de custòd natural de tutti i territòri e fòrza civil de tutela e protezion de ògni comunità, la merita minga domà on riconosciment total da part di istituzion, ma anca on semper maggior sostegn pubblich per i dotazion de mezzi, de materiai, de attrezzadur, de formazion, preparazion e per vess semper al corrent de tusscòss.
Va sottolineaa infin che, a travers el volontariaa, la “Protezion Civil” l’è pù “ròba per pòcch tecnich”, ma l’è finalment diventada patrimòni coltural e social de tucc. Ògni cittadin el gh’ha de diventà part attiva in di situazion de emergenza che podarien verificass e minga soggett passiv, perchè Protezion Civil significa minga dòmà emergenza e soccors ma anca e soratutt:
* formazion de la coscenza civil intesa principalment come educazion a la protezion civil destinada soratutt ai popolazion di zòn a ris’c, ai giovin e ai student de la scòla de l’òbbligh;
* prevision intesa per studià i caus di fenòmeni calamitos, per identificà i ris’c e individoà i sit pussee soggett a ris’c;
* prevenzion intesa a evità ò redù al minim la possibilità che se verifichen dagn in conseguenza a calamità, a promoeuv e curà l’educazion de la popolazion a l’autoprotezion.