Sit de coltura e attualità
in lengua milanesa		 Invia i tuoi messaggi a:
info@elmilanes.com






Polenta e luna, Articol del 2005, del Stefano Sportelli

 Contando e cantando sulle rive dell’Adda

El liber l’è faa in trè part: la prima l’è dedicada ai poesii (62), la seconda al teater, la terza ai canzon.
El Cècu el comincia da la soa nascita a Lòd, el paes indove l’è nassuu, el spiega con precision i moment de la soa vita, la bellezza de la campagna, di cortil di cassinn, di bei giornad passaa in la soa Lòd.
Inscì el ne fa conoss i campagn del Dinin quattaa de nev, i stagion che trasformen i campagn con tanti color.
Dòpo avè parlaa di sò campagn el ne fa conoss San Bassian e la soa festa, in de l’osteria de la Ranetta cont el sò vin e el sò salamm.
El Cècu el desmentega nò de parlà de la bellezza di gamb de la Lina e i basitt daa a la Margherita sfregandos in sui sces de l’òrt del pret.
Poesii pien de candor e metrica pura che quand t’ie leget te se sentet protagonista insèma al Cècu.
Hinn 62 in tutt, che descriven con maestria on spaccaa de la provincia lombarda fada de ròbb sempliz, naturai e sann, come i ròbb di bosin.
El liber el cunta anca, in forma teatral, la stòria de ona tosa del Cècu restada gravida a quattòrdes ann. Duu temp de grand saviezza popolana che la riess a mendà in di moment difficil che se creen in la famiglia, con la dignità e la fòrza de la fed che tanti incoeu dovarien ‘vegh.
In l’ultima part del liber gh’è di motiv e canzon ispiraa ai origin e ai tradizion popolar che al dì d’incoeu, con la modernizzazion, se riess con fadiga a ritrovà.
A la fin del liber gh’è ona sfilza de paròll, poeu, per vuttà a fass comprend anca da quei che lodesan hinn nò.