Sit de coltura e attualità
in lengua milanesa		 Invia i tuoi messaggi a:
info@elmilanes.com















On ball ...in di temp indree de la Marina Galeoni

On giovedi sera a teater, sora al palcoscenich Julie Dossavi, ballerina originaria del Benin, naturalizzada francesa, cont on aspètt pròppi african, con di gèst altrettant african, la musica elettronica inscì pòcca africana.
Sto visibil contrast el diventa important per riflettegh a sora e fà vegnì a la memòria di ricòrd lontant, ma mai desmentegaa. I ann trascors in Africa con la mia familia me acconpagnen da semper. La mia adolescenza passada tra palm, tèrra rossa, forèst equatoriai, deserti, mar bloeu, grand metròpoli e villagg piscinin, riviven ògni dì tra i mascher coloraa, statuètt in lègn e bronz e tra tucc i ricòrd che m’hann seguida in di vari traslòcch da on paes a l’alter.
Normalment numm occidentai tendom a considerà l’Africa e i african come on’unich paes e on’unich pòpol. In realtà anca a l’intèrno d’on stèss paes troeuvom tribù con lengua, stòria, tradizion e coltura divèrs che spèss hinn i motiv de ver e pròppi guèrr.
Ma gh’è ona ròbba che rend tutt instèss l’Africa e i african anca quei che ghe viven pù, magari da generazion; l’è la danza el ball! On fluid magich ch’el ciappa ògni cellula, l’è el riciamm d’ona fòrza ancestral, la danza l’accompagna da la nascita a la mòrt la vita de tucc i african, riti e cerimòni hinn danza e musica, hinn ona liberazion d’energia che coinvòlg tucc, da quei pèna nassuu portaa sora la s’cèna de la mama ai pussee vègg, sia nel sperduu villagg che in di grand città.
Anca se la colonizzazion e la coltura occidental hann modificaa i culti animistich in Africa, fortunatament el folklore african l’ha contaminaa i stili e i form occidentai, per mòda ò tradizion, cont on spirit ottimistich e pien d’energia ch’el pò nò fa alter che aiutà a creà armonia e cooperazion tra tucc i òmen del mond.
Troeuvon traccia di ritmi african in di pussee tradizionai ball latin-american, anca Fred e Ginger tra ona capriòla e l’altra ghe inseriven di pass de la tradizion afro-americana!
Quèst’ultima partida da i ball di s’ciav in di campi de coton e da i riti woodoo, attravers tip tap, fox trot, blues, jazz l’è rivada ai form pussee moderni di band metropolitan cont el funki, la street dance, l’hip hop l’R&B. Gh’hinn pù i mascher ò i cappei con piumm e perlin, sottanin in paja, i simboll noeuv hinn giubbòtt in pèll, cappellitt miss al contrari, bandan, jeans cont el cavall bass e improponibil scarp de tennis molleggiaa e pien de lus, ma quand se ved stì giovin esibis anca se inscì lontan di sò missee se intuissen istèss i movenz primordiai e la naturalèzza, stì dòti se ved che i a porten nel sangh nel d.n.a. pròppi come el mè nevodin Luca per metà congoles che se moeuv a temp de musica quand la sent in television a la radio ò quand la ven foeura di sò gioeugh.
Incoeu in di ball de còppia sicurament podom lègg la necessità de cercà i occasion, on temp pussee numeros, de contatt dirètt, che l’è vegnuu a mancà a causa de la vita semper pussee frenetica e con la comparsa di cellular, video telefoni, computer e via... “A ballà ben se fà la morosa” el diseva el mè nòno e el gh’aveva reson.
I temp hinn cambiaa e anca al dì d’incoeu la ricerca de l’anima gemèlla la passa attravers di noeuv maner de comunicazion, ballà l’è comunque comunicà, derviss ai alter a se stèss e liberass di energii negativ.