Sit de coltura e attualità
in lengua milanesa		 Invia i tuoi messaggi a:
info@elmilanes.com

Prof. Pierluigi Crola
On omagg ai martir de Gòrla,
Articol del 2004, del Pierluigi Crola

Per fortuna che el Signor l’è superior a tutti i miseri e ai debolezz (disemm inscì) uman, perchè s’el gh’avaria el nòster meter de giudizzi, stariom fresch! President de provincia che dann prèmi a chi ròba e s’ceppa i vedrinn; giudes che condannen gent e sindich che regolarment protesten contra chi viv in la illegalità; la Gesa cattòlica, quasi tutta, molto generosa cont i nemis de semper, i mussulman, e molto pòcch attenta ai sò radis e a quei che creden in Lee; parlamentar che se batten per fà sbatt foeura de galera i delinquent e per contrastà la pèna de mòrt, ma che fann de tutt per impònn l’abòrt e la mòrt dolza; e, soratutt on president, ch’el dovaria vess de tucc, domà per el stipendi che ghe pagom, che se desmentega de onorà i 200 e passsa mòrt innocent causaa dai “nòster” amis american, amis che ne voeuren tanto ben de casciann in di còst anca i Turch.

Doo la mia adesion donca con tutt l’entusiasmo possibil a sta manifestazion de gent vera, che l’ha ingiustament soffrii per colpa de l’ipocrisia e de ona politica sporca, che la guarda prima de tutt i sò interess e poeu, fòrsi, quei di alter. Ma doo la mia convinta e sincera adesion specialment per on’altra reson: perchè speri che questa sia l’occasion per dà ona solidarietà minga de part, e che i partii, tutti i partii, staghen foeura perchè i mòrt hinn mòrt de qualsesia color politich e la sofferenza vera la gh’ha de vess rispettada da tucc. Me auguri donca ona esagerada partecipazion, senza però nissuna bandera de part. Speremm che i martir de Gòrla sien servii a on quaicòss, anca se gh’hoo i mè dubbi! Bon Natal a tucc e soratutt a quei 200 e passa angiol che domà per la fin ch’hann faa hinn senz’alter tucc in Paradis!