Sit de coltura e attualità
in lengua milanesa		 Invia i tuoi messaggi a:
info@elmilanes.com
Lombardia

Mantova
Sondri
 Conoss la Lombardia, Mantova e Sondri, Articol del 2005,
del Stefasno Sportelli

El viagg in Lombardia el va avanti: dòpo vess passaa de Bergom, Bressa, Còmm e Cremòna, semm rivaa a Mantova e Sondri.

Mantova
La città de Mantova l’e nassuda su ona penisola piscinina, creada intorna al VI sècol a.C.. Ciappada dai Gall, con l’imper roman, l’e diventada ona colònia cont el nòmm de Mantova. La ven sacchegiada dai Gòti, in del 1160 la se allea cont el Barbarossa, dòpo la fa part de la Lega di comun lombard, per combatt a Legnan. Con l’arriv di Gonzaga la città la cress in tutti i maner, la fa on salt de qualità. La passa sòtta el domini de l’Austria in del 1707, gh’è stada ona parentesi napoleònica, prima de la nascita del Stato Italian.
Gh’è tanti bei pòst de visità, vun l’è Piazza Mantegna, visin a Piazza di Erb in del center de la città, con la soa Basilica de Sant Andrea pièna de affresch e pal de altar del cinchcent; bei la Madòna e i sant del L. Costa.
Piazza di Erb l’è cintada de cà medievai; chì se troeuva la Rotonda de San Lorenz, gesa romanica, e el Brolett. In Piazza Sordell gh’è el Dòmm, el Palazz Ducal con tanti affresch e òper de artista famos. In del castell de San Giòrg se troeuva la famosissima Camera di Spos, pitturada con tanti bei affresch dal Mantegna. Poeu gh’è Palazz Te, la grandiosa residenza di Gonzaga in stil rinascimental.

Sondri
La conossom cont el nòmm de Sondrium, ma gh’hemm in man pòcch per savè el dì de la soa nascita. La dipend giuridicament de Còmm, in del 1000 la famiglia De Capitenei, l’ha faa fà sù on castell.
In del 1336 i Viscont l’hann annessa a Milan. Poeu l’è passada con la Valtellina ai Grigion e con la restaorazion l’è restada taccada a la Lombardia.
La città la te offriss el Palazz Pretòri, edifizzi in stil rinascimental; la Collegiada di Sant Gervas e Protas cont a l’interno la Madòna del Rosari con Gesù e i Sant del Ligari e l’Assunzion de la Vergin de G. Gavezzani; el Palazz Sertoli, cont el salon decoraa de affresch; el Palazz Carbonera con la soa magnifica lòbbia settcentesca.
Anmò se pò rimirà el castell di Masegra ch’el dòmina tutta la città dal montesell omònim.