Sit de coltura e attualità
in lengua milanesa		 Invia i tuoi messaggi a:
info@elmilanes.com




Ona idèa fondamental che, però, al dì d’incoeu, la par trascurada ò desmentegada

 L’òmm l’è minga una bistecca.
Articol del 2000 del Pierluigi Crola

L’alter dì on mè scolar, dato ch’el conosseva la mia idèa politica, el m’ha domandaa: «Scior professor, l’è content che in Spagna l’ha vinciuu l’Aznar?» Quand gh’hoo risponduu: «Minga tròpp!», el m’ha ribattuu: «El preferiva la vittòria del ross?»

«L’è minga question de ross ò negher», gh’hoo risponduu, «el fatt l’è che vun el var l’alter, la vittòria de on òmm de sinistra ò de destra l’è la stessa ròba; de fatt, gh’è minga differenza tra el primm ò el second, consideraa che, al dì d’incoeu, anca in de numm, tanti ròbb ch’el dis el Cavalier fann part del programa politich del president del consili D’Alèma: paròll come federalismo, privatizzazion, mercaa liberista, globalizzazion hinn concett accettaa, in del ben ò in del mal, da quasi tutti i politich, tanto de destra che de sinistra». Al moment el scolar l’è restaa lì come on orlocch, poeu el m’ha repiaa: «Ma el primm minister spagnoeu l’ha sbassaa la disoccupazion, l’ha portaa avanti iniziativ turistich important che portarann on bordell de danee a tanta gent …..». A la fin de sto discors gh’hoo domandaa:

«El scior Aznar cosa l’ha faa per i coltur locai, per i tanti pòpol che stann in del sò paes?»

Gh’hoo de scusamm per sta longa introduzion, ma l’era necessaria per sottolineà on’idèa fondamental che però, al dì d’incoeu, la par trascurada ò desmentegada: l’òmm l’è minga una bistecca.

L’è vera che, specialment adess, cont i crisi econòmich e cont el progress tecnològich, el pòst sicur l’è semper pù on miragg e la tranquillità econòmica, per tirà sù anca on fioeu soll, l’è on traguard tegnuu molto in considerazion, ma l’è altertant vera che, in d’ona famiglia, cunten nò domà i danee; cunten soratutt i ideai e i valor che mì doo ai mè fioeu, la disponibilità, l’affett e l’amor che ghe trasmetti: de fatt, quanti famili de sciori hann daa ai sò fioeu domà ghei, gh’hann scoduu tutti i petitt e s’hinn trovaa con di sbarbaa, viziaa, con di randa, quand l’andava ben, ma anca con di drogaa, teppista, gent che tira i sass contra ai macchin per fà on quaicòss de divers, per fà passà la nòia? Quanti famili, al contrari, gh’aveven minga tanti danee, gh’aveven spess nanca i oeugg per piang e i sò fioeu hinn cressuu motivaa, responsabil, generos e pien de amor per el pròssim, con tanti ideai e progett de realizzà?

A la stessa manera se pò parlà de on pòpol ò de tanti pòpol che viven insèma: el sò papà, el primm minister , el gh’ha minga de preoccupass domà de fai mangià, ma soratutt de pensà a la soa anima, ai sò valor, in d’ona paròla a curà i radis e i tradizion different e a dà sostanza ai ideai de tutt quei che viven sòtta el stess tecc. Perchè quell che on pòpol el soppòrta nò l’è minga el pòcch mangià, ma la mancanza de valor e sentiment: i innamoraa se desmenteghen anca de mangià, perchè el mangià el fà scampà, ma el sentiment e i valor fann viv. E allora, scior Aznar e tutti quei come lee, ricordéves: a ògni pòpol podarann levagh la vita, ma ghe levarann mai …. La libertà! Chi el gh’ha oregg per capì ….