Sit de coltura e attualità
in lengua milanesa		 Invia i tuoi messaggi a:
info@elmilanes.com



La piazza del Dòmm pensada dal Lagh de Lecch
(a la faccia del Minister) del Tullo Montanari

Estaa. Seguten a dì che fa cald a Milan. On cald de bestia. Ma va’ là, l’è cald come tutti i estaa ma ògni vòlta par che sia la prima e che i ann indree gh’avessom l’aria condizionada anca in strada. Adess poeu el scior minister l’ha dii che se i vegg (i ha ciamaa “anziani” per minga offendei) gh’hann cald, de portai ai center commerciai dove gh’è l’aria condizionada che la costa nagòtt. Ona idea fantastica, ròba de terz ò quart mond. Ai center commerciai... Magari l’avess dii al cinema ò a teater, macchè, ai center commerciai. Te see che divertiment per i vegg andà a trovà i patati ò vedè come stann i tomates, piccà sui melon per capì se hinn madur, tastà i vestii, provass on quai para de scarp insòma divertiss a la gran pù bella. E tutt a gratis. L’è mej che guardà i sciori che mangen i sorbett. Ma el vaga lù, cara el me car scior minister de la salud, al supermercaa. El vaga, el vaga a vedè se venden l’intelligenza, magari in sald, inscì el pò profittann per comprann on ciccin, senza esagerà che la podaria fagh mal a vess minga abituaa. Mì, per mè cunt, vist che son minga completament imbesuii e al center commercial ghe voo domà se devi comprà quaicòss, ciappi el treno e me foo menà fina sul lagh de Lecch. A la facciassa del scior minister. A Mandell, a Varenna. Ò a Lierna, Còlich. L’è istess, va ben qualsiasi paesòtt ò paesett. Troeuvi de settam a l’ombrìa, se pòdi, sòtta i frasch de on bersò faa con l’uga mericana - su on sedil de preia morisnada de on cussin, e me metti a spettà la Breva intant che godi el Tivanell, ventusei che soren el caldon. Riven, riven tucc i dì ognidun a la soa ora. Né on minutt prima né vun dòpo. Stii tranquii, basta ‘vegh pazienza e vedarii che riven. Hinn minga minister, lor.
Intant, tant per impienì el temp, podaria trà giò on quai fiaa de quell Nostranell secch, bianch, quasi salaa, freschett de cròtt, che riva, ne fann ancamò on poo de bottili, dai collinett de Montaveggia. El biccer el se pana e el vin el scarliga in gola che l’è on piasè. Per quei che ghe pias el vin. I alter che se rangen. Digh de mangià i pessitt in frittura bevendogh adree ona quai porcada de bibita. Pegg per lor. E inscì, adess che son bell rilassaa, pòdi scriv on quaicòss su la piazza del Dòmm, quell pòcch che ricòrdi e dimenticamm quei stupidad del scior minister.
Come te see lontana, piazza del Dòmm... E chissà come te sbròiet. Ben, tant quei che te frequenten de on quai ann a ‘sta part, hinn abituaa a temperadur anca pussee umid. Al sò paes fa anca pussee cald. Fòrsi.
Sul basament del monument te podarisset fà coeus i oeuv in cereghin, senza accend el foeugh. A propòsit savii come el ciamaven? El “monument a la brillantina” perché tucc quei che se setten giò pòggen el coo dedree e lassen giò el vonc di cavei. Anca quand hinn lavaa hinn semper vonc e ona vòlta, quand se usava la brillantina, l’era ancamò pegg. Figh cas la prima vòlta che passii per la piazza e vardii che ombra scura che gh’è tutt in gir, a la bas del monument, altezza de crappa.
La conossii ben la Piazza? Sicur? Sii sicur debon? E allora savarii a chi l’è dedicaa el monument e cosa rappresenta el bassriliev. Se quaighedun la ricòrda minga gh’el disi mì: a Vittòri Manuell II, vun di quei voncioni sporcellentoni di Savòia che tanto mal hann faa a Milan e ai milanes, e el bassriliev l’è ona immagin de la battaglia de Magenta, cont tant de Napoleon III. Bon anca quell... Poeu gh’hinn i leoni che difenden el stemma di Savòia. Se el trassen giò doman andaria a vedè el spettacol anca cont el cald. Pagaria fina quaicòss per godè. Che poeu, a part el voncion a cavall, el monumentasc el sta anca mal de front al Dòmm. Che, el savii, come gesa, l’è dedicaa a Santa Maria Nascente.
Proeuvi spess a domandagh a la gent che viv a Milan quant hinn i pòrt del Dòmm, domà quei che se derven su la facciada. Savii in quanti sbaglien? On mucc. Ghe domandi minga di finester che podarissen vess pussee difficil de ricordà. Nò, domà i pòrt. E tanti a sbaglien. Incredibil. Eppur tutti i avarann vist centenn de vòlt e se pò minga vess nò bon de contà fina a cinch. El savevov vialter, vera?
Come savarii dove hinn piantaa i duu zeder del Libano e come la se ciama la seconda gesa che gh’è in piazza del Dòmm? La gesa, che l’è piscinina ma interessanta, la se ciama Santa Maria Annunciada in Campsant. L’è dedree del Dòmm, semper in su la piazza. E i duu zeder hinn vun de chì e l’alter de là, de l’abside. Davanti a la gesetta. La zòna la se ciama Piazza Campsant minga perché gh’era on cimiteri ma perché i piccaprei che lavoraven a la fabbrica del Dòmm faseven on “mestee sant”.
Vardemess intorna. I duu orror che gh’hinn a destra vardando el Dòmm, hinn i Arengari. In del 1876 l’architett Beruto l’aveva pensaa de costruì ona “Lòggia real” e de trà giò on fianch del Palazz Real. Poeu hinn passaa i ann e i dò ròbb hinn staa tiraa sù in del 1939 su progett de Portaluppi, Magistretti, Griffini, Muzio e me par fina ona esagerazion che se sien miss in quatter architett per trà insemma el capp d’òpera.
In del 1805 el Giusepp Pistòcch el presenta on progett per sistemà la Piazza dove ghe doveva vess ona colòna in mezz a la piazza e la cà del Comun de faccia a la gesa. Di dò part duu arch de trionf. Alter progett quell de Giulio Beccaria in del 1839. In del 1862 gh’è on concors senza vincitor. L’ann dòpo alter concors e ven cattaa foeura quell del Mengoni approvaa in del 1864 e in del 1867 se inaugura la Galleria. Tra el 1874 e el 1875 la piazza l’è finida con i pòrtich meridionai e settentrionai. In del 1875 trann giò el Rebecchin, on isolaa de cà che gh’era in piazza in de la porzion de front a quella che adess l’è Via Turin. In del 1876 poeu gh’è el pian del Beruto che emm giamò vist per la part che riguarda l’Arengari e l’ann dòpo, el 1877, gh’hann miss l’illuminazion elettrica.
El Cantù pensando a tutti i propòst, el scriv che “come tutti i progetti che devono rimanere in carta...” se pòden fà perché costa pòcch anca se al dì d’incoeu l’è minga vera perché i progett costen e come.
Napoleon, in del magg del 1805, l’aveva comandaa de finì el Dòmm cioè de fagh la facciada che l’era ona vergògna avegh on monument inscì important minga finii. El progett l’ha faa el Pòllack e l’hann rielaboraa Zanoia e Amati. Anzi Napoleon l’aveva dii che i danee i avaria procuraa lù, bastava anticipai. Sì, ciao Mario, i a spetten ancamò adess.
Poeu ghe saria la stòria de la Galleria che l’è complicada, quella del Palazz Real e de l’Arcivescovad e quella de La Rinascent ma vialter podii capì che adess gh’è finida la Breva, quindi sarann i ses or è l’è quasi el moment de mett i gambett sòtta el tavol. Chì semm in campagna, campagna lombarda, dove se usa andà a mangià sul prest minga come fann i milanes che tiren tard e a la mattina stann in lett. A propòsit de mangià savii come se dis a Milan: “Chi vòlta el cuu a Milan el vòlta el cuu al pan”, ma de chi part chì ghe gionten: “..ma chi ghe le vòlta a la Brianza ghe le vòlta a la pitanza.”
E se gh’emm de patì, patemm... Cià, giò i tovaj che me spetten i missoltitt, agoni seccaa e condii con l’asee; ona quai fetta de brisaola che la ven giò de la Val Chiavenna, piscinina e moresina, condida cont on tocchel de butter de quell giust minga come fann i milanes che ghe metten l’òli e el limon ( a dì la verità el fann anca quei de Ònn perché gh’hann la fissa de avegh on òli special); ona quai fettina de salamin nostran; poeu on pess al forna cont i patati, va ben se l’è on coregon ò ancamò mej se hinn pess persigh che podarissen vess el de sora de on risòtt in cagnon; ona insalatta de ravanèi ò de tomates; on bell tocchell de Bitto e on alter de Casera de la Valtellina e on para de formagitt de Montaveggia de quei miss sottòli, che campanen ma hinn gustos. Per bagnà el becch van ben i vin che riven de la Valtellina, tutti bon.
Piazza del Dòmm, ved de rangiass che se vedom a settember, mì son chì e sto ben anca perché de chi part de chì, parlen tucc el sò dialett e l’è facil capì quell che disen.

Ah, per piasè, saludii de part mia el scior minister e disigh de andà a Bagg. A sonà el piffer. Ciao...

(I dati, per minga fà la figura completta del ciolla, i hoo controllaa ò miss denter a cà, a Olgiaa minga a Milan) Tullo Montanari