Sit de coltura e attualità
in lengua milanesa		 Invia i tuoi messaggi a:
info@elmilanes.com


























La fabbrica di sofranei Articol del 2004 del Roberto Perotti

La stòria la comincia in del 1860, quand i padroni de la Giacomo de Medici de Milan pensen de dervì ona fabbrica de sofranei a Pont Noeuv de Magenta.
I primm ròbb che hinn vegnii foeura in staa i ceritt, de vari color e misur, in di sò scatolett de carta stampada con su vari disegn (adess gh’èe gent ch’ie cerca par collezion!) Dal 1877 la ditta la sara sù a Milan, la va a comprà di macchin noeuv in Germania, Austria e Svezia, e la tacca a fà sù i “paraffinaa”, quei con sù la cera sul gamb.
In quei temp, la ditta la faseva lavorà pussee de 600 persònn che tutti i dì preparaven 500.000 scatolett de fiamifer. La fabbrica l’era diventada voeuna di pussee fòrt in Euròpa in del sò settor e in del 1906 la dava lavorà a 1400 operari.
In quell ann s’è scopert che el fòsfor bianch che se metteva in de la cappella di sofranei el faseva vegnì on brutt malann che se ciama “necròsi fosfòrica”.
Per continuà a lavorà senza fà sì che la gent la se malass, l’ha dovuu mett denter el fòsfor ross, che l’è nò velenos, e inscì hinn nassuu i SVEDESI, dal nòmm de la nazion indoe hann faa la convenzion per doperà pù el vegg fòsfor.
Dal 1920 fina al 1980 hinn staa i ann pussee important: la ditta la disegnava e la faseva sù i macchin che la doprava. Se costruiva tuscòss denter i officinn che la Saffa (inscì l’era cambiaa el nòmm) l’aveva faa sù denter la soa proprietà.
Inscì hann poduu fà sù di macchin che strasaven nagòtt di pobbi che vegneven tajaa per fà sù i sofranei. Tucc i tocchei, anca i pussee piscinin vegneven dopraa per fà la produzion, ròba che i alter fabbrich, che gh’aveven macchin normai, podeven fà nò. Quel che se podeva nò dopraa, el vegneva miss da part per fà la “paja de legn” che la serviva per imballà ròbb delicaa. Pensa che te ripensa, i operari e i capett han trovaa anca la manera de dopraa mej sta paja:
l’han mes’ciada con la malta e hann faa sù on material che ‘l brusava nò e l’era anca legger e isolant. Se ciamava “POPULIT” e l’è staa usaa in di ann che l’Italia l’era in AUTARCHIA (cioè a bolletta sparada..).
In del 1934 hann faa sù ona fabbrica de Compensaa de pobbi, cont ona còlla special a base de caseina, che l’è vun di component del latt. Vist che la ròba la andava ben, hinn passaa a fà el compensaa cont i resin chimich, semper lì denter de la fabbrica de PONT NOEUV.
Intanta certa gent, specie quei che gh’aveven i danee e ghe piaseva fà el gagà, hann cominciaa a dì che i sofranei vann ben per pizzà la stua, minga i sigarett!
La Saffa se l’è faa minga dì dò vòlt: l’ha compraa la UNIAT de Turin che la faseva sù i accendin e l’ha s’è missa ‘dree a fai pussee bei anmò. Pensii che j’ha faa anca per el CARTIER de Paris! Quand l’è cominciada la guerra, la ditta l’è stada sòtta el contròll di militar, che gh’hann faa costruì cass per portà i munizion e la ròba al front. Finida la guerra la fabbrica l’ha cominciaa a fà sù di mòbil in legn, progettaa dal Giò Ponti, el famos architett che l’ha firmaa on sacch de prodòtt de “DESIGN”. El lavorà l’andava ben, e in del 1949, se pensa che i 500 quintai di scart de legn che restaven anmò in gir ona vòlta finii tutt i lavurazion eren tròpp. Impunemanch eren tocchei tròpp picinitt per fà la famosa paja de legn: bisognava trovà queicòss per doprai. La soluzion l’e stada quella de fà sù on stabiliment de Cartonzitt per stampa. Inscì, oltra a fà in pròpri i scatulett per i ceritt, se podeva anca vend la carta ai alter fabbrich che la dopraven per stampà. Se podaria pensà che la Saffa l’era domà lavorà, ma l’è nò inscì. De fatt, sui sò terren la ditta l’ha faa sù on asilo per i fioeu di operari, ona gesa dedicada a la Madòna del bon consili, e una mensa. Quand in del 1960, l’ann del “boom econòmich” el lavorà l’era al massim, hann costruii on asilo nid, ona scòla elementar, ona materna, e on cinema. Per la gent che la lavorava denter hann faa sù di cà, di villett, e un ver e pròpri quartier.
Per dilla in brev: se lavorava e se viveva denter del stabiliment. Ma sti bei ròbb vegneven bonn anca a chi l’era nò de la ditta: tanta gent de Magenta l’ha faa i elementar in de la scòla de la Saffa, o l’ha giugaa denter ai sò giardinett.
L’ultima òpera, pòcch ann fa l’è stada la costruzion d’ona central elettrica per fà la corrent che la serviva a fà andà i macchin, e quand ghe n’era pussee, la vegneva venduda a l’ENEL per dagh la lus a Magenta e ai alter paes visin.
Adess che se fann pù i sofranei, perchè costa men fai in Cina, e che la cartera l’è ormai sarada sù, gh’è restaa domà di mur s’ceppaa e di veder ròtt.
Se veden pù i operari vegnì foeura al son de la sirena, e i camion che passen denanz ai cancei saraa senza fermass. Disen che trarann giò tutt per fà on supermercaa (on alter!!), ma el servirà a dagh el lavorà ai nòster gent?
Pensii che on quaidun d’alter el farà sù sì la soa fabbrica, ma anca on quaicòss per chi ghe viv denter ò arent?
Speremm almen che i fabbricaa che eren i offizzi, costruii per la dogana austriaca prima de la battalia de Magenta, vegnen dopraa per quaicòss de pubblich, magara dal Comun o dal Parco del Tesin.
Almen inscì gh’avaremm quaicòss de ricordà de la “fabbrica di sofranei”