Sit de coltura e attualità
in lengua milanesa		 Invia i tuoi messaggi a:
info@elmilanes.com










L’è cominciaa
on campionaa noeuv,
ma la solfa la par quella veggia
del Leo Siegel (quell de Lambraa)  Articol del 2004


Come tutti i ann, anca questa estaa l’amis Cròla, negherbloeu (interista, ndr) de fed incrollabil (scusé el gioeugh de paròll...) el m’ha supplicaa: “Dimm che l’è la vòlta bòna, che l’Inter la vinciarà finalment el scudett!” El m’ha faa tenerezza, gh’hoo lassaa on filin de speranza, ma gh’hoo l’impression che anmò ona vòlta el pòpol del Bisson el vivarà on’altra stagion grama.
Dato che gh’hoo la colpa de capì on quaicòss de fòlber, spess vedi lontan e donca me ciappi del “anti-interista”. Nient de pussee fals. Ve daroo, in sta pagina chì, i proeuv de la mia passion negrabloeu de quand seri giovinòtt. Fina dal 1954, portaa da mè pader, che l’era abbonaa, andavi a l’Arèna a vedè i mè temerari batt el Catania de Bruno Pizzul. In del 1962, in fregola “herreriana” (immens, el “mago”!) correvi a Turin per vosà quell che pensavi de la Madama biancanegra e di sò arbitri, al prezzi ragionevol de 1300 franch, senza cuntà el viagg in pulman. Come se po’ vedè dai bigliett de l’epoca. De oggett inscì prezios ghe n’hoo on cassett pien e mai je traroo via perchè fann part del mè passaa.
Ma quella l’era l’Inter del Moratti Angiol, minga del Moratti Massim ò Minim, dipend dai pont de vista.
Quell che el president (ma sì, el Giacinton el gh’entra on bell nagòtt, el mè deus di tempi d’òr l’è innocent) el combina da quand l’è rivaa, fa pù piang, ma rid. La gent interista, vegnuda sù a la scòla del Peppin Prisco, l’ha “maduraa” on sens de l’umorismo straordinari, e la se copparà mai in massa per la disperazion. Dal moment che la se ricòrda ben i lezion de l’Herrera, la giuga de rimessa e la leva ai avversari el gust di battud che te pòden toeu per el cuu. E se je fa adòss, in deperlee.
Inscì trionfa on liber de barzellett. Moratti come Tòtti. Per esempi: “cosa el rispond Moratti ai giornalista ch’el tormenten su l’Inter?” “Lassém perd!” Oppur: “cosa fann trii interista sòtta la macchina?” “Guarden la coppa!” E anmò: “l’è staa trovaa on accòrd tra i Paesi Arabi e el petrolier Moratti: lor ghe mettaran el petroli e lù i bidoni.” Per conclud: “El Moratti l’ha inauguraa on ristorant noeuv. El se ciamarà: Domà second.“
Fina a quand la durarà sta stòria chì? Dipend da quand el dio del ballon el decidarà de intervegnì per sacrosant motiv de giustizia: hinn ò hinn nò anca i interista di fioeu sò?
Intanta, i tifos negherbloeu fann collezion de tìtol che se ciamen autoironia, sopportazion, simpatia. Perchè i barzellett su l’Inter hinn ormai come quei sui carabinier (Tòtti a part): ormai ghe piasen a tucc. E el dì che el Moratti l’andarà via, ne mancaria on quaicòss.