Sit de coltura e attualità
in lengua milanesa		 Invia i tuoi messaggi a:
info@elmilanes.com










L’illusion multietnica

Articol del Alberto Ronchey del Corriere della Sera del 23/09/04
 (traduzion de el Pierluigi Cròla)

Anmò sbarch sui còst italian dòpo el button del 12 de settember, quand 800 immigraa clandestin hinn vegnuu a riva a Lampedusa. Second el governa, da on poo de mes i sbarch hinn diminuii. Ma continoen. Se rivelen purtròpp dèbol, finadess, i accòrd cont i governi che stann de là del Mediterranei per impedì sti traffich chì. Ier l’Union Europea l’ha revocaa el blòcch sui fornidur de armi a la Libia, che dovaria permett de invià elicòtter, mòtovedett, sistèma radar, visor notturni e alter. Ma prima che la decision la pòda fà effett sui fluss migratòri, ghe vorarà del temp. Sia ben ciar poeu che per arginà i pression de massa -egizian, maghrebin, subsaharian- sarann mai assee i polizii. Salta anmò foeura donca la necessità de dà ona man a favorì el svilupp econòmich de quei paes che gh’hann el problèma de l’immigrazion. Impresa dura, se pensom ai risors limitaa de l’UE al dì d’incoeu, come i modalità de finanziament e di contròll de gestion. Ma intanta, se l’Africa la gh’ha la “tendenza a scarligà” vers l’Euròpa, l’è necessari misurà l’entità del fenòmeno migratòri, sia quell regolar che quell illegal. Se pensa che i african hinn 818 milioni, contra i 378 di europei UE (con 15 paes) ò 453 (con 25 paes). Domà in del 2003, dòpo l’ultima sanatòria per i clandestin, in Italia i resident legai hinn rivaa fina a squas 58 milioni (Istat). In del stess ann, circa 41 mila di ultim 106 mila clandestin individoaa eren anmò chì (Cort di Cunt). I forestee legalment in Italia hinn 2,6 milioni, inveci se pensa che i extracomunitari clandestin sien circa 800 mila. Pòca gent che la torna a cà soa, centri de prima accoglienza che hinn minga assee, responsabil che hann lassaa corr perchè eren minga bon ò per indulgenza. Ma poeu, preson piènn. Second on’indagin de l’Istitutt Cattaneo, i detenuu forestee riven al 31,3% e quei denonziaa per traffich de dròga al 27,5%. Questa l’è, finadess, la società “plurietnica” italiana, anca se di vòlt on quaidun el cerca paragon per consolass che tornen indree fina a l’esperienza imperial de la Ròma de Giovenal cont i sò persian, egizi, siriach, pannònich.
E in Euròpa, saria possibil debon acettà moviment migratòri de massa compagn de quei de l’America? Ghe creden i acces “spantegador” de ògni ottimismo, sia stòrich che fideistich. Eppur la densità de popolazion in America, a dispett di ultim ondad migratòri de l’America del Sud e de l’Asia, l’è de appèna 31 abitant per chilòmetro quadraa contra i 117 UE (con 15 paes) ò 114 (con 25 paes). In Italia la densità de popolazion l’è pusse de 190 ormai. De soramaròss, la macrosocietà del melting pot american, l’è stada fondada giamò dal princìppi sui immigrazion, stratificaa ma anca tormentaa in di ultim temp. Diversa l’è la stòria de l’Euròpa, cont i sò different nazionalità, in d’on territòri limitaa, “complement geografich de l’Asia”, in cerca de ona confederazion sia parzial che gradual. L’è donca inverosimil che l’UE di 15 ò di 25 la pòda ricev anmò, su vasta scala, pòpol e razz de alter continent dòpo quei che l’ha giamò ospitaa e che spess s’hinn non anmò integraa. E nepunemanch, rispondendo ai ottimista fiducios in la vision multietnica e multicoltural, el mond l’è semper andaa vers novità che pareven impossibil. L’è vera, domà che nissun l’ha mai poduu prevedè quai sarien staa né con quai risultaa. L’ultima paròla sui risultaa l’è semper stada rinviada al futur, giudes illuminaa e imparzial che però, come se sa, el riva tròpp tardi.