Sit de coltura e attualità
in lengua milanesa		 Invia i tuoi messaggi a:
info@elmilanes.com







I profumm di Langh del Marcello Vitali


L’è el moment giust per passà ona domenega tra i profumm de l’autunn in la campagna di Langh cont ona passeggiada nel bèll centro stòrich de Alba, città di Cent Torr.
Mej ancamò se in compagnia d’amis desideros de sentì noeuv emozion tra on calis de Nebbiolo, Barbaresco ò de Barolo e, se el portafoj l’è minga stracch ona bèlla spolverada de tartufo sora on bon risòtt.
Stì saor, stì odur, stì emozion se proeuven, in di campagn piemontes inscì prodigh de color che l’autunn el fa come on bravissim pittor sora ona tela.
Ona vòlta lassaa Milan ai spall con la soa nèbbia el sò smògh, vèmm con l’autostrada che la pòrta ad Asti, poeu con la Statal che la va vers Alba, in del spazzi d’on ora e mèzza se riva in di Langh doe el paesagg el cambia radicalment; qua e là filar de vit de mila color che l’òmen con tanta maestria e tant amor l’ha disegnaa e ona campagna pièna de piant de niscoeul e de castègn, ghe tegnen compagnia in stì strad chì de campagna ora drizz ora tutt curvi.
El profumm agher de la tèrra, l’umidità de la tèppa selvadiga e l’esalazion fòrta de la trifula la fa de compagnia ai pass del visitador ch’el po’ rimirà contrad, borgh e cascinai.
Alba la medioval, cont i cà pien de finèster bifor, torr mediovai, vialètt strenc, el Dòmm, el bellissim San Domenich e la baròcca gesètta de Santa Maria Maddalèna. E poeu el borgh de Neive con di romantich abitazion che paren taccaa su sora di strad che vann sù e giò per i collin. Facil pensà che la zòna la da la possibilità de sorseggià on bonissim biccer de Nebbiolo in on calis de veder faa appòsta per esaltann i qualità.
Dòpo che se sèmm estasiaa cont i bellèzz naturai e architettonich del pòst, ghe resta domà de saggià la cusina local. El disnà l’èmm faa in on splendid agriturismo in località Castellero a Neviglie (CN) e precisament la Locanda San Giorgio. La locanda la troeuvom dòpo che èmm faa di stradin strenc e pien de curv, sora ona collinètta, fiancheggiada dai solit filar d’uga cont i color classich de l’autunn.
El complèss bèll e ben arredaa el se troeuva sul pont pussee alt de la collina da doe se po’ vedè a perdita d’oeugg ona stupenda vallada piena de color: verd, giald, marron e chì pussee ghe n’ha pussee ghe ne mètta! On ver incant de la natura, de restà estasiaa e a bocca vèrta. L’interno ghe ciappa cont i profumm che vegnen da la cusina, a spettagh gh’è Massimo el proprietari semper alegher e sorrident che ghe pòrta a visità tutta la struttura compres el porticaa, i camer, ma soratutt la cantina. Per i appassionaa di ròbb bei e bon on pòst de scoprì, a taola Massimo ghe consilia de saggià el ross de la cà on vin de soa produzion, on vin corpos dal color ròss vermili, cont on gust pròppi bon e ch’el lassa minga el sègn.
Numm el saggiom con di taglier stracolmi de affettaa mist. I primm piatt de sòlit hinn quatter e cambien second i stagion, poeu se hinn quatta giò con la trifola ò i fung a l’è el massim.
Anca i piatt de mèzz hinn d’ona bontà verament straordinaria sia che sien de selvaggina ò de carna piemontesa e hinn cusinaa in manera perfètta el tutt compagnaa da splendid verdur, peveron, patati, fung, insalada e tant d’alter.
Per finì gh’è la sorpresa di tris de tort faa in cà, ona vera e pròpria leccòrnia e, poeu gh’è la chiusura con la grappa e chì se podom sbizzarriss ghe n’è per tucc i gust. Per chì el volèss passà da chi part consiliom la prenotazion cont ona sempliz telefonada al numer 0173/630115. e domandà del Massimo ch’el sarà entusiast de ospitav.