Sit de coltura e attualità
in lengua milanesa		 Invia i tuoi messaggi a:
info@elmilanes.com










Hellas Über alles  - Campionaa Europeo anno 2004 del Giovanni Costanzo

Mattan del fòlbal d’estaa? On gioeugh nouv per la playstation? L’ultim desideri d’on condannaa a mòrt? Nò la Grecia l’ha vinciuu el Campionaa Europeo de fòlbal, con polmoni, coeur, muscol e tantissim cervèll.

L’è pròppi inscì, i campionaa europei hann emanaa l’ultima sentenza: la Grecia la strapazza per la seconda vòlta, come in la partida d’esòrdi, i padronn de cà del Portogall e la se pòrta meritatament la coppa sora a l’Olimpi.
Sì perché se n’è dii de tucc i color su sto inaspettata e, fastidios trionf grècch. Fastidios per tutti, dai calciador strapagaa e dai gamb de semolin che hann faa di prestazion vergognos, ai sponsor (quei che paghen la reclamm) che hann cileccaa, gh’hann minga avuu nas, ai giornalisti sportiv, incazzaa me di besti perché hinn minga staa bon de fà i prevision giust e hann faa la figura di giargianes.
Ma la colpa l’è minga di grècch se hinn staa ciappaa sòtt gamba per tutta la durada del torneo, eppur in di qualificazion dòpo dò sconfitt aveven infilaa ben noeuv vittòri voeuna dree a l’altra, on poo strano per ona squadra scarsa o nò?.
L’è minga colpa soa se se saren su in difesa cont lucidità, coragg, abnegazion e, spirit de sacrifizzi per poeu aspettà el moment giust per trafiggl in contrapee ò pegg ancamò su di calci piazzaa.
Hinn staa i alter che pien de campioni straordinari e miliardari hinn vegnuu a cà cont i piv in del sacch, sarà minga colpa di grècch se hinn nò bon de segnà on gol, sti calciador viziaa da contratt principeschi, ma che la metten mai denter. L’è nò per cas che i alter difensor eren on ciccin scars?, dòpo tutt i grècch hann segnaa in tucc i partid che hann giogaa, che birbant gh’hann minga fà faa on gol e lor i a faseven... ròba de matt.
E numm se fasèmm? i a offendom ghe dèmm di catenacciari sèmm pròppi come i fioeu, anzi pègg, hinn nò lor i catenacciari, ma i alter hinn bròcch, i Zidane i Raul i Nedved i Figo con quèll che hinn costaa che figurascia.. hinn nò di pelabròcch, ma tanti campion fann ona squadra? I Pelè i Maradona vinceven perché gh’aveven ona squadra al sò fianch.
Allora per giustificass parlom d’anticalcio, de la tomba del spettacol sportiv, de l’edizion pussee brutta de tutta la stòria di campionaa europei, ma fimm el piasè, che pèna accettà minga che Dellas, Charisteas e compagnia bèlla hann lottaa sora ògni ballon semper con la ment ben avèrta e che s’hinn minga faa impressionà da i cont in banca di avversari, ma al contrari aiutaven semper el compagn in difficoltà, come la gh’ha de fà ona vera squadra (per lassà a stà el spirit olimpich). E invece disom che chesschì l’è minga calcio, ma andii a scoà el mar, el calcio quèll vera l’è lamentass di calzètt ò di scarpètt come faseven i AZZURRI, ò irritass per on pareggio, se doveven fa? scannass per faggh piasè a numm, ma và là.
Hann minaccià de mòrt on pover arbitro svizzer, che adèss el gira sòtta scòrta, perché l’ha invalidaa on gol con ben duu falli in la stèssa azion, ò come disen quei d’albion, che i grècch gh’hann giugaa tròpp de mas’c,
pròppi lor el disen, contra i ceki de fatt in quèlla partida i ceki gh’hann faa el doppi de fall, ah chesschì l’è el fòlbal...
E i giornalisti? Che vergogna hinn riessii a dimostraa che Vieri gh’ha reson l’è minga staa lù a spacciass per el centravanti pussee fòrt del mond, ma hinn staa i giornalisti a dì inscì... chissà el men fòrt.
Tutti a dì che la nazional l’avaria spaccaa el mond, l’avaria vincuu a man bass, ma se sèmm andaa in Portogall per el ròtt de la scuffia èmm faa piang tucc i italian a l’ester quand andaven a vedei e el Trapatton l’è mej lassà perd, già poeu l’è facil sparà al Totti per la soa spuada, ma avarion faa pòcca strada instèss, serom fòrt, ma in doe?
Allora onor e poeu anmò onor ai grècch che con ferrea disciplina spartana e con l’intelligenza ateniesa hamm miss a tasè tucc i fanfaroni, che hann capii on bèll nagòtt,ma che hinn dree a leccass ancamò adèss i ferii.
A propòsit nel pròssim campionaa l’immenso capitan grècch Zagorakis giogherà nel Bològna, mè ven quasi voeuja de fà l’abbonament....