Sit de coltura e attualità
 in lengua milanesa		 Invia i tuoi messaggi a:
info@elmilanes.com


el scior “G”, on amis, on compagn de vita, on artista, on grand Milanes

La Milan ch'el cantava ch'el cüntava sü, el Giorgio Gaber, l’era la città de la soa giovinèssa. Ona città in cambiament, che però la conservava ben el savor de quèll che Milan l’aveva regalaa a generasion e generasion de persònn. Persònn che, come el “scior G”, aveven mandaa giò per i polmon on’atmosfera che, al dì d’incoeu, la par fass semper püssee fiòcca.
L’era in d’ona Milan che l’era dree pèrd la pas che el Giorgio Gaberscik l’era nassüü, de ona fàmilia de orìgin veneta. L’amor per la ghitarra el vegn per combinasion: el sonà l’è on esercissi per ona riabilitasion al brasc, che l’era staa colpii de ona paràlisi. E la ghitarra, al giovin Giorgio, el ghe cambia la vita, tant che el lassa i studi a la Boccon per sonà el jazz cont i Rocky Mountains. Al Santa Tecla, famos local milanes de tendensa, el cognoss el Jannacci, el Celentano, e anca el Mogol, che el ghe fa fà on provin. E el riva el succèss: el partiss con Ciao, ti dirò, scrivüda cont el Luigi Tenco. E poeu Non arrossire, Le nostre serate, Le strade di notte, Il Riccardo, Trani a gogò, La ballata del Cerruti, Torpedo blu, Barbera e champagne, fin a Com’è bella la città, del 1969.
L’ann dòpo, el gran cambiament: el Pìccol Teàter de Milan el ghe domanda de mètt sù on recital de portà in di piass de la Lombardia.
El nass Il signor G. Ma soratutt, el nass on segond Gaber, che el lassa l’ambient de la television (in dove l’è dree avègh on gran succèss) per comincià ona noeuva esperiensa: el teater. De Far finta di essere sani a Io non mi sento italiano (pubblicaa dòpo la soa mòrt), passand per La mia generazione ha perso (2001): ona lettura disincantada e amara di sògn e speranz andaa in fümm.
Con la generasion del Gaber, l’è facil a dì che anca Milan l’ha perdüü. Impünemanch, el “scior G” l’ha sigüttaa a vèss voeuna di ànim püssee important che l'amada città chì.
Fin a quand, stroncaa de ona longa malattia, l’è mòrt, a l’età de 63 ann, in la soa villa de Montemagno a Versilia.
L’era el primm de Genar del 2003, quand miara de Milanes (e minga domà Milanes) hinn tornaa al Pìccol, per salüdà per l’ültima vòlta on amis, on compagn de vita, on artista. On òmm che, con la soa vos, calda, ciara, bèlla, l’ha scrivüü di pàgin indimenticabil de la nòstra stòria. E de la nòstra vita.