Sit de coltura e attualità
in lengua milanesa		 Invia i tuoi messaggi a:
info@elmilanes.com












Extracomunitari a scòla Articol del 2004 del Stefano Sportelli

El problema de l’immigrazion di stranier in la scòla italiana l’è vegnuu foeura a Brescia quand el Dirigent Scolastich del Second Istitutt Comprensiv, con 700 alliev iscritt tra elementar e medi, l’ha constataa on’elevada presenza de student extracomunitari, circa el 48%. Tanti genitor spaventaa da stì numer e soratutt da on possibil rallentament del programma scolastich, hann ritiraa i fioeu da scòla, come anca alter student de quinta elementar hann preferii cambià istitutt in prevision de la frequenza ai scòll medi, con gran fregament di man di scòll privaa.
La propòsta, quindi, partida da Brescia l’è de limità el numer di extracomunitari in di class, e de ciappai domà in on certo numer, e quei in eccèss ridistribuii in manera omogenea.
L’obbiettiv l’è de evità concentrazion che poden mètt a ris’c i tempi e la qualità de l’apprendiment sia per i student italian che per i stranier.
El minister Moratti l’ha risponduu de nò a stà ipotesi e l’ha sostegnuu che i scòll poden minga rifiudà nissun.
Dann de daggh a tucc el diritto-dovere de l’istruzion.
El dibattit s’è faa pussee incasinaa con l’intervent de tucc i politich, ognidon gh’ha semper de dì la soa.
I student extracomunitari rappresenten incoeu el 3.5% de tutta la popolazion scolastica, cont ona concentrazion maggior al Centro-Nord con percentual del 10% in città coma Mantoa ò Milan. L’è on fenòmeno de grand dimension e bisògna tegnin cunt minga domà come accoglienza, ma soratutt in l’organizzazion didattica, che i temp hinn ormai madur le dimostren i numeros interrogazion di genitor, di autorità scolastich e l’interessament di mass-media.
Ve dèmm chì de seguit di dati.
I immigraa present in di scòll italian l’ann passaa eren 30.000. nel Nord-Est 6.1% nel Nord-Ovest 5.7% Centro 4.8% Sud 0.9%.
In Italia gh’èmm ona presenza del 3.5% di student.
In Francia del 5% in Germania del 10% in Gran Bretagna del 14% in Svizzera del 22%.
Come hinn distribuii i student? El 19% in la scòla de l’infanzia materna ed elementar, el 24% in di scòll medi, el 16% in di superior.
Da doe vegnen? Da l’Albania el 18% dal Maròcch el 15% da la Romania el 10% da la Cina el 5%.
La cocentrazion maggior ghe l’èmm a Mantoa cont el 9.3%.
Ona manera per vegnì incontra ai fioeu appèna rivaa in Italia a minga restà indree e donca a minga isolass l’è quèll de dà tucc i necessari riferiment per l’integrazion.
Come? Con percors pedagogich ad hoc, con la creazion de laboratòri d’interclass con la presenza d’on maggior numer d’insegnant, tutor linguistich e cont on pian d’integrazion pussee idoneo.
Gh’èmm sentii el parer d’ona Dirigent Scolastica d’on Istitutt Comprensivi de la Provincia de Milan che la gh’ha on numer puttòst rilevant de student stranier.
La nòstra scòla l’ha oramai on’esperienza gemò consolidada circa l’accoglienza e l’integrazion di student che vegnen da alter paes. Per ognidun de questi cerchèmm de troà soluzion idatt ai pròppi origin a la pròppia coltura a la pròppia manera de stà al mond. Gh’èmm on’insegnant distaccada per alfabetizzà quei che conossen nanca on poo la nòstra lingua, de spèss domandom on suppòrt ai docent d’ingles, tanti de lor parlen ingles. Sèmm de suppòrt anca ai famili ghe parlom in continuazion con di rappòrt ciar e proficui.
Coinvolgiom anca i famili italian, che hinn on gran suppòrt per l’integrazion.
Èmm miss insèma moment de convivenza e de reciproch rispètt, spèss invidom i famili di fioeu stranier a presentagh el paes d’origin con de filmaa e con di fotografii e ghe fèmm contà la stòria.
Fèmm de tutt per facilità i rappòrt interfamiliar, anca se a vòlt l’è verament dura.
L’è de pòcch dì fà la notizzia ch’el minister Moratti l’ha convocaa ona conferenza di Direttor Scolastich Regionai per cercà de troà di rispòst adatt per risòlv tucc stì problemi che nassen da l’elevaa numer di student stranier in di nòster scòll.
In del medesim temp l’ha avviaa on’indagin per verificà el succèss formativ, seguirà dòpo el coinvolgiment di Region per rivà a on’integrazion pièna de tucc i student immigraa.