Sit de coltura e attualità
in lengua milanesa		 Invia i tuoi messaggi a:
info@elmilanes.com











El Natal el riva, riven i consumm,
Articol del 2004 del Stefano Sportelli

El mes de dicember, in di ultim vint ann, l’è staa caratterizzaa dai acquist, da la ricerca del regal, dal vagà da on negòzzi a l’alter e l’è diventaa per tucc el mes di spes, el mes di comper a cost de tutt. E inscì la tanto desiderada e sospirada tredicesima la va a finì, minga in del cunt corrent de la famiglia, ma in di cass bondant de on bottegar ò de on centro commercial. El spariss in silenzi in di tentacol del consumismo a cost de tutt.
L’è la mana de tutti i commerciant e de tutti i esercent che spetta domà sto mes chì per vedè sparì la soa mercanzia missa in bella mostra in sui scaffai di negòzzi, e per i pussee fortunaa, anca i rest de magazzin, depositaa da l’ann prima e minga venduu.
Anca se da quand l’è “rivaa” l’euro hinn cambiaa tant i abitudin di consumador che, con tanta parsimonia, cerchen adess de trovà el regal giust a prezzi ragionevol, se va anmò a la ricerca del don, del regalin, pur de rispettà la tradizion natalizia che la voeur on regalin sòtta l’alber de Natal.
La tendenza, donca, l’è sì quella de comprà, ma con modeazion; l’acquist pussee esageraa, el comprà per fòrza l’è leggerment calaa; i famili ghe pensen pussee a sora ai sò spes.
In sti dì chì, e semm minga ancamò al colmo de la tradizional atmosfera de festa del Natal, se ved on badalucch de persònn girà per negòzzi ò per centri commerciai, a la ricerca del scunt pussee bon, del prodòtt che costa de meno.
I bottegar a soa vòlta se industrien per zaffà la possibil clientèla addobbando i vedrinn con bondanzios offert de prodòtt mettuu in vendita a prezzi scuntaa ò a strasciamercaa, de opportunità numeros propòst cont i moeud pussee divers, dal Papà Natal che rid e che parla, ai luminari faa de tanti color, da l’alber quattaa con la fiòcca finta, a presèppi pien de statoett, da rappresentazion grafich disegnaa sui vedrinn, ai paesagg de fiaba quattaa giò de nev, e de tanti alter ingegnosità pubblicitari.
I commerciant per rinforzà la voeuja a l’acquist lesinen nò anca de stampà cartellon ò locandinn con slògan contra el carovita, volantitt coloraa e faa per ingattià, presentazion per mezz de stampaa de la soa mercanzia, tutt offert a prezzi ragionevol; quei che gh’hann pussee danee fann di spòtt pubblicitari in video, filmaa e proiezion, e se propònen con quest o quell prodòtt a prezzi eccezionai.
L’è minga lassaa de part nanca el mezzo de comunicazion che oramai l’è on “accessòri” indispensabil per tantissim famili, el computer, con offert “in-red”; fin da agost, l’era assee andà denter a on sit elettrònich de on centro commercial per vedè i different offert che cambiaven a seconda de l’attualità del moment; dai quaderni ò material per la scòla (settember) ai majoni ò piumitt per fioeu (ottober), dai vin ai elettrodomestich (november), per rivà a incoeu.
In sui sit, incoeu, i agenzii de viagg propònen possibilità de trovà in vendita bigliett ferroviari e aerei, “pacchett” per i vacanz, offert de viagg vantaggios.
Ultimament el s’è mettuu anca el President de la Repubblica, Azeglio Ciampi, a invidà i venditor a sbassà i prezzi per permett a tutti i famili de acquistà i regai natalizzi a prezzi moderaa.
Fina dai primm dì de november pareva che Natal el fudess giamò rivaa, el se vedeva e el se sentiva depertutt: i strad ornaa con luminari, i vedrinn di negòzzi allestii per l’occasion, i offert de vol aerei quasi a gratis per andà in di loeugh pussee esòtich, la possibilità de prenotass per i “gran zènn” a prezzi misuraa, i viagg in pòst de sògn a strasciamercaa; senza cuntà i supermercaa de tutti i tipi, con l’offerta de aliment superscuntaa per l’occasion.
E per Natal?
I bellee hinn squas offert ai fiolett, promozion assosènn, propòst de tutti i tipi e de tutti i prodòtt, cest pienn de ògni ben de dio a strasciamercaa.
E inscì in quasi tutti i Centri Commerciai se assist a longh cov de macchin a la ricerca de on parchegg, a longh filer de gent che spetten de rivà prima ai banch de vendita, poeu a la cassa per comprà el telefonin scuntaa, la video camera digital quasi regalada, el vestii noeuv a bon mercaa.
La ven spontanea anca ona piccola riflession. Perchè andà semper a comprà el noeuv? E se taccassom a recuperà l’usaa? A mettel a pòst? A riciclall? Fariom del mal? E se pensassom debon a pensà de fà quell che faseven i nòster nòni, conservà e tirà foeura a l’occorenza on qualsesia oggett che se dopera pù e dòpo ona bella “revision”, regalall, pensii che sbagliaremm?
Pensemmegh sora on ciccinin almen!