Sit de coltura e attualità
in lengua milanesa		 Invia i tuoi messaggi a:
info@elmilanes.com


Maria Curie


Rita Levi Montalcini


Maria Montessori


Margherita Hack		 Dònn al servizzi de l’umanità de la Emanuela Cancellieri

Chissà come saria staa el mond se Maria Curie la fudèss stada a cà a fà la calzètta e a organizzà gran riceviment come faseven i Madame del sò temp, invece la Curie, studentèssa de fisica d’origin polacca e miee del fisich frances Pierre Curie, incuriosida da la frenesia suscitada nel mond scientifich da la scoperta di raggi X, la deciduu de dedicass al studi de la radioattività.
El primm premi Nobel per stì ricerch l’è rivaa in del 1903 e l’è equament divis tra Becquerel, Pierre e Marie Curie, ma in del 1911 el second premi Nobel per la chimica el và domà a lee, Marie Curie che, dòpo che l’ha ripres i sò studi ona vòlta finida la Gran Guèrra, in doe l’aveva organizzaa on servizzi de diagnostica militar, i a pòrta avanti per tutta la soa vita indagand sora i potenzialità diagnòstich e terapeutich di radiazion anca quand l’è vegnuda a conoscenza del ris’c che l’è sottopòsta tant che la moeur de leucemia in del 1934.
La Curie l’è stada sicurament on’ apripista nel camp di radiazion, ma poeu alter dònn hann continuaa i studi intrapres e come lee hinn rivaa al premi Nobel come l’italiana Rita Levi Montalcini, ona figura de dòna fragil e gentil, ma sicurament dotada d’ona rara determinazion che l’ha portada, dòpo la laurea in medesina ciappada a Torin nel 1936, finn in America doe la se trasferiss nel 1947 (on’ epoca in la quale i italian migraven con la valisa de carton e la fuga di cervei l’era nonanmò cominciada) e doe la studia la neurologia.
Tanti hinn i moeud in di quali ona dòna la pò esprimes in del ristrètt mond de la scienza, Maria Montessori l’è stada la prima dòna in Italia a laureass in medesina nel 1896 e terminaa i studi universitari la s’è dedicada a la cura di fiolin con problemi psichich, l’era convinta, a reson, che on giust trattament educativ l’ottegniva maggior risultaa che con i cur tradizionai.
In del 1906 la fondaa la Casa di fiolin e l’ha cominciaa la soa attività educativa, destinada ai fioeu di famili pover nel quartier de San Lorenz a Ròma.
El sò metod d’insegnament, fondaa sora el pricippi de sviluppà i energii creativ di fiolin in on ambient strutturaa a misura di fioeu l’è ancamò largament diffus soratutt a l’ester.
I dònn, l’è on loeugh comun, hinn romantich, spèss gh’hann el coo tra i nivol, ona dòna però la testa tra i nivol ghe l’ha missa debon, ma per guardà i stèll, per scoprì tra el ciel el passaa e el futur de l’univers.
Margherita Hack l’è defatt voeuna di ment pussee brillant de tutta la comunità scientifica italiana, l’ha vissuu a laorà con grandissim talent per scienza astrofisica e la soa carriera scientifica la s’è intrecciada con quèlla di pussee important astronom de l’ultim secol.
Prima dòna a vèss direttris d’on osservatòri astronòmich in Italia, l’ha svòlt on’importanta attività de divulgazion e l’ha daa on valid appòrt a la ricerca per el studi e la classificazion de tanti categorii de stèll.
Per secol i unich dònn che podeven vèggh accèss a l’istruzion eren quei sarà su in di convent, basta ricordà che ancamò a l’inizzi del XX secol, in tanti paes europei ai tosann l’era vietaa l’accèss a l’università e in tanti anca al liceo.
Per quèst i dònn, scartaa da l’università, esclus da la conoscenza scientifica, hinn vegnuu foeura là in doe podeven emerg, in de l’art e in la letteradura, doe la capacità la sopperiva a la mancanza de preparazion scolastica, inscì l’è cominciaa el pregiudizzi second el quale i dònn sarien pussee adatt ai materi letterari e linguistich che minga a quei scientifich.
Ancamò al dì d’incoeu i tosann cressen in mèzz a stì pregiudizzi, se lassen spèss influenzà e catten foeura i facoltà umanistich anca contra i sò naturai inclinazion e contribuissen inscì a rafforzà i pregiudizzi stèss anca se, fortunatament, incoeu el crèss semper pussee el numer di tosann che catten foeura materi ritegnuu tipicament de mas’c come l’ingegneria, la fisica, la chimica, la matematica.
A part che dèss i dònn i a troeuvom anca in l’esercit, in polizia e in di carabinier, con risultaa verament apprezzabil.