Sit de coltura e attualità
in lengua milanesa		 Invia i tuoi messaggi a:
info@elmilanes.com













Duu milanes in Brasil
Articol del 2005, del Giovanni Nahmias e Martina Treu

Diari de viagg (e-mail), senza on attim per respirà...
tra arte, mar, sô, mangià e ona quai (dis)avventura.

Tel chì el Brasil, ma l’è nò inscì facil come a dill: a Linate in perfett orari, semm accettaa da ona coa de km. Par che ona guardia giurada la sia passada al detector con la pistòla d’ordinanza: l’ha dii: ‘Sta chì pòdi portalla?’. Allarma ross. Reciòcch a tutti i ‘pistòll’ d’ordinanza al detector, clima de spavent. Finalment in su l’aereo el capitan l’ha annunziaa: ‘Semm ‘dree a spettà 13 passeger bloccaa al contròll, perduu la partenza, el pròssim tra on’ora e mezza’. Se vosa: ‘l’è nò possibil’. ‘Ma lee in doe la gh’ha de andà?’, ‘A San Paolo e scommetti che l’aereo el me spetta nò!’. ‘Mi gh’hoo de andà a Shangai’. ‘Anca numm a San Paolo (alter ses)’ ...nient...finalment semm partii. Emm scernii de viaggià cont ona valis a man incredibila (pensand de spedì ona valisòna de acquist al ritorna), se de nò serom anmò a Paris.
Viagg perfett: mangià òttim, pòst còmod, tanto fregg, tanto sògn, a San Paolo domà 3 or de fus. Gh’hemm de telefonà: domandom a voeuna in doe se compra la scheda e lee la ne regala la soa...l’era ona scheda de 40 credit, ghe n’eren 34! Obligado!
Hotel, camera 918. Andemm de sora. Voo denter e ghe doo on’oggiada: lett minga faa, valis depertutt, lus che se pizzava nò, scarp, acqua corrent in bagn..mancava domà el cadaver sul let...Tornom indree in reception e vun el ne da la ciav 818 cont on grand sorris: camera ok, dòccia, visorin fin ai 14, poeu a gironzà in di mercaa, negòzi, parch e ges; des real varen ‘me trii euro...tutt el costa pòcch debon! Altra faccia de la medaja: comprom tusscòss (anca trii tajacart de legn ross brasilian a forma de tucan); compri duu quaderni e me regalen on lapis, compri dò collann e me regalen duu anèi de legn. Visita al center coltural Sesi con festival del linguagg elettrònich: centènn de giughett, video, installazion (chichinscì l’arte l’è a gratis!). Internett l’è nò facil de trovà: emm manomiss ona installazion de la biennal per podè scriv, doman a Bahia, mar, paletta...G&M
Biennal fantastica! Edifizzi al center de on parch che girom tutt grazie a on tassista stupid ch’el sa nò la strada e ‘l domanda a tucc senza capì i spiegazion. Unich paes al mond indoe hinn i tassista a lassà la bonaman al client (rotonden semper per difett el ragionatt). Ingress a la biennal a gratis. Scelta politica e coltural intelligenta debon! Ghe n’è pù per l’ostacol di danee (chì sentii de maledett) e per i pregiudizzi vers l’arte contemporanea.
In del palazz babysitter e fiolitt che vosen, banda de giovin criminai in majetta e senza scarp, vegg turista ingles in vestii coloniai, riden tucc, giughen, hinn curios, se divertissen. Tornand a cà, Martina con la coa de l’oeugg “...istrata”. Possibil? La Lisistrata de Aristòfane? Scòprom che la gh’è debon! Ingress... A GRATIS! Istessa politica, come el cunta sù el cappcòmich: ‘ Chi l’è che conoss Aristòfane in Brasil? Chi l’è che andaria a teater?’. Spettacoi gratis, comunicazion efficienta (el sòttitol de l’òpera l’è ‘ el sciòpero del sess’), teater pien. A l’ingress on bordell de gent (come ona scòla de samba) che la leg vita e òper de Aristòfane. Tucc in costumm, tucc a teater. L’arte la insegna, la divertiss, la educa. L’è ‘l programma coltural de on paes che l’è ‘dree a sviluppass, cont ona voeuja squas de fiolitt de corr e imparà, che l’ha trovaa la giusta soluzion a che ne superarà a la svelta! Poeu ... zèna in d’ona churrascheria: sped enòrme con different carna squisii, buffé pien de verdur, sals, contorna. 15 euro in duu: on s’giaffon a la gent sciora!
Lunedì a Bahia. Meravilia, 35 grad ventilaa. Hotel Pestana in sul mar, fòrsi el pussee bell de la nòstra vita! Girett al faro, conossom Mario, ch’el vend ona collana de somenza e ‘l gh’ha avuu ona morosa a Bològna, ma se serom todesch el se saria ciamaa Franz con la morosa a Dortmund. El ne dis che Bahia l’è sicura: se vun che lavora el ved on borsiroeu le picca perchè el manda via i turista che tornen pù e allora se cress minga! Semm invidaa a la festa de San Francesch al Pelorinho, rion stòrich e monument nazional. Aperitiv cont acqua de còcch e zèna in su la spiaggia. Nòtt con finestra averta in su l’ocean... Basitt. Gio e Marti.

Bahia l’è on sit de minga crèd! Visita al mercado modelo, banchett coloraa de mila ròbb faa a man. Domandom per on amis la majetta de DeNilson: ne riden in faccia come se in Italia se domandass quella del Cuccureddu! La città veggia, i sò leggend, i riti, pagan, ges pien de òr e legn negher, el paviment ch’el stria de sass levigaa in pendenza perchè ‘l corress via el sangh di s’ciav. Visitom la cattedral pussee veggia del Brasil cont i sò cinqu sant negher, el convent strapien de azulejos, antigh ceramich portoghes celest che mostren i different mòrt e virtù.
Incoeu a la spiaggia Pituaçu. Pièna de gent, casett de paja, venden tusscòss, cald, sô, vent e surf, gent che la balla, cana de zuccher spremuda a la svelta, fiolitt e famili : tucc in vacanza, passeggen arent la spiaggia per chilòmetri, poeu...poeu l’è cominciaa el FILM...