Sit de coltura e attualità
in lengua milanesa		 Invia i tuoi messaggi a:
info@elmilanes.com

Condoleeza Rice


Margaret Tatcher


Indira  Gandhi


Simon Veil


Nicole Fontaine


Nilde Iotti
 		Dònn e politica de la Emanuela Cancellieri

Dedree à ògni òmm grand gh’è ona dòna granda. Giamò da tanti ann però i dònn hinn diventaa protagonista su la scèna politica internazional e italiana.

In di pròssim elezion europei ona leg italiana la garantiss ai dònn ona rappresentanza minima tra i candidaa presentaa dai partii che parteciparann. L’è ona decision che la fà pensà a la dòna come al “panda” del WWF, ona specie in pericol, de proteg, inveci i dònn, se gh’hann un progett politich, on’ideal in del qual cred e per el qual var la pèna scombatt, sann benissim vegnì foeura in deperlor.
Ghe n'è ona carrettada de dònn che partecipen in di partii, che se impegnen tutti i dì in la politica mettendo d’accòrd el lavorà con la cà e la famiglia. Gh’è tra de lor di sindichi, president de provincia, deputaa, senatris e certi hinn rivaa fina ai carich istituzionai pussee important in di sò paes ò in la Union Europea a testimonianza de la strada che i dònn hann faa da quand i sufraggette ingles hann ottegnuu per lor, nel 1918, el diritto de votà.

Ona dòna, Condoleeza Rice l’è diventada in del 2000 consiglier per la sicurezza nazional de George W. Bush. in d’on paes, i Stati Uniti, indove la politica l’ha assegnaa spess ai dònn domà la part de miee e mader “esemplar”, la Rice l’è la prima dòna, de soramaròss afroamericana, avegh on incarich inscì delicaa che la vede impegnada a l’èster, a contatt dirett cont i rappòrt di ambasciad, i incartament de la CIA e i analisi del Pentagon.

Ona dòna, Margaret Tatcher, conossuda come la “sciora de ferr” (e minga certo per i sò pettenadur perfett ò per i sò tajoeur cusii in cà) l’ha guidaa dal 1979 al 1990, primm president del consili britannich in del sècol vintesim a ottegnì trii incarich de governo de fila, la pussee antiga democrazia del mond e l’ha restituii ai sò concittadin, quand tucc pensaven oramai che la Gran Bretagna la fudess adree a “tramontà”, l’orgòli de vess ingles, impegnandoi adrittura in d‚ona guerra improbabil contra l’Argentina in difesa di isol Falkland, che eren staa desmentegaa.

Ona dòna, Indira Priyadarshini Gandhi, del casaa Nehru, capp del Partii del Congress l’ha cattaa sù la difficil eredità del mahatma e l’è reussida a fà diventà l’India ona potenza importanta, governando la pussee popolosa e eterogenea democrazia del mond in del moment pussee difficil de la soa stòria, quell dell svilupp.

Dò dònn, tutt e dò frances, la prima Simon Veil dal 1979 al 1982 e la seconda Nicole Fontaine, dal 1990 al 2002 hinn staa nominaa president del parlamento europeo.

Ona dòna, Nilde Iotti l’ha presieduu, dal 1979 al 1992, per ben trèdes ann la camera di deputaa e la soa carriera politica l’è minga de sicur stada favorida da la soa relazion cont el capp del Partii Comunista, Palmiro Togliatti, conossuu in d’on inconter fatal e “galeòtt” in d’on ascensoeur de Montecitorio e cont el qual l’ha convivuu fina a la mòrt del segretari comunista in del 1964, relazion che anzi l’ha faa sì che la fudess bandida dai sò “compagn” che in tèma de famiglia eren pussee “reazionari” di cattolich pussee conservador.
L’onorevol Nilde Iotti l’è stada, fina a incoeu, la sola dòna, oltra che el primm esponent del partii Comunista in Italia a ottegnì on incarich “esplorativ” per la costituzion del governo.
L’è domà ona minima rappresentanza di tanti dònn “important” de la politica e, chi pò dill, fòrsi on dì minga tròpp lontan podaremm giontà a sto elench on president del consili italian ò on presidente di Stati Uniti dòna.